Paşinyanla “Qarabağ klanı”nın yeni savaşı başladı...
![Image](/uploads/posts/2023-12/pas-separat.webp)
Qarabağı tərk edən ermənilərin Nikol Paşinyan hakimiyyəti üçün ciddi təhdidə çevrilə biləcəyinə dair verilən proqnozlar özünü doğruldur. Belə ki, həmin ermənilərin Ermənistanın “Qarabağ klanı” ilə birləşməsi istiqamətində addımlar atıldığı bildirilir.
Bu da, öz növbəsində, Paşinyan hakimiyyəti üçün böyük təhlükə deməkdir. İndiki halda Ermənistan hakimiyyəti 44 günlük müharibəni araşdıran komissiya vasitəsilə separatçıları cilovlamağa çalışır. Artıq bu fonda separatçıların sonuncu “başçısı” Samvel Şahramanyan da komissiyada dindirilib.
Baş verənlər fonunda “Qraparak” nəşri yazır ki, dindirilmə məxfi şəraitdə baş tutub. Komissiya üzvləri olan hakimiyyət nümayəndələri Şahramanyanı qorxutmağa çalışıblar, lakin sonuncu könüllü şəkildə hər şeyi etiraf edib: “Şahramanyan qondarma rejimin buraxılması haqda qərarı niyə imzaladığını açıqlayıb. Bildirib ki, separatçıların keçmiş “başçıları” da vəziyyətdən çıxış yolunu bilmirdilər və buna məcbur idilər. Keçmiş “başçıların” Rusiya sükhməramlılarının qərargahında gizləndiyini də qeyd edib. Bununla yanaşı, əvvəllər danışdığı hər şeyi təkrarlayıb”. Şahramanyandan Ermənistanda siyasətlə məşğul olub-olmayacağı soruşulub. O bildirib ki, siyasətlə məşğul olmayacaq və Qarabağdan E rmənistana qayıdan əhaliyə “rəhbərlik” etməyəcək. Nəşr yazır ki, hakim komandanın üzvləri sonda hər şeydən razı qalıblar: “Hətta sonda Şahramanyanın şərəfinə qonaqlıq da veriblər. Şahramanyan açıq mətnlə Paşinyana sədaqət andı içib və bildirib ki, “narahat olmayın, mən hakimiyyətə qarşı heç bir aksiyada iştirak etməyəcəm”. Amma Şahramanyandan fərqli olaraq, digər separatçılar yenidən qruplaşmaq və Paşinyan hakimiyyəti ilə mübarizə aparmaq niyyətilərini gizlətmirlər. Qeyd edilir ki, separatçıların qondarma “parlamentinin spikeri” olmuş Aşot Qulyan bu məsələdə xüsusilə fəallıq göstərir. Amma erməni mediasında belə məlumatlar da yayılır ki, heç Şahramanyan özü də Paşinyana sadiq deyil. Separatçı rejimin Təhlükəsizlik Şurasının katibi olmuş Samvel Babayanın açıqlamaları da bunu təsdiq edir. Məlumatlara əsasən, Babayan Şahramanyanla bağlı şok açlqlamalar verərək bildirib ki, o, qondarma rejimin və “Daşnaksütyun”un vasitəsilə Ermənistanda hakimiyyət dəyişikliyi həyata keçirməyi planlaşdırır. Şahramanyanın Ermənistanın üçüncü prezidenti Serj Sarkisyanla gizli görüş keçirməsi də bu fonda diqqətdən yayınmır. “Qarabağ klanı”nın liderlərindən sayılan Sarkisyanın Şahramanyanla görüş keçirməsi Paşinyan hökumətinə qarşı bir planın qurulmasından xəbər verir.
Samvel Babayan bu fonda Paşinyana qarşı ittihamları artırır. Məsələn, o qeyd edir ki, Nikol Paşinyan Qarabağın erməni sakinlərinin işləri üzrə xüsusi şöbə yaratmaqdan imtina edib. Babayan qeyd edib ki, imtina səbəbləri məlum deyil, çünki o, Paşinyanla şəxsən görüşüb dialoq aparmayıb. Belə vəziyyətdə Paşinyan da Qarabağ ermənilərindən separatçı rejimdə vəzifə tutanları sıxışdırmaq, incitmək, birləşməyə imkan verməmək, təşkilatlanmalarının qarşısını almaq üçün müxtəlif göstərişlər verir. İrəvan sakini, bloger Natali Aleksanyanın belə bir vaxtda açıqlamaları sürətlə Paşinyanın əlinə işləyir. O bildirib ki, ermənilərin Qarabağı tərk etmələri məhz “Qarabağ klanı”nın göstərişilə olub: “Bir neçə ay əvvəl baş verənləri isə deportasiya adlandırmaq olmaz. Mən 24 saat qarabağlı ermənilərlə təmasda olmuşam. Onları Qarabağdan zorla çıxarmayıblar. Onlar azərbaycanlıları görməyiblər, sadəcə sərhəddə qarşılaşıblar və normal münasibətlə üzləşiblər. Ermənilərin Qarabağı tərk etmələri məhz “Qarabağ klanı”nın göstərişilə olub. İnsanlar hədə-qorxu ilə evlərindən çıxarılırdı”. Bütün bunlar “Qarabağ klanı”nını ittiham etmək üçün Paşinyana əlavə arqumentlər verir. Hələlik isə belə hesab olunur ki, “Qarabağ klanı” da daxil olmaqla, Paşinyan hakimiyyətinə müxalif olan erməni siyasi qüvvələrinin koalisiyası reallığa çevrilsə, Ermənistanda daxili silahlı toqquşmalar qaçılmaz olacaq. Bütün bunlar Rusiya-Ermənistan münasibətlərinin maksimum həddə qədər gərginləşdiyi bir situasiyada o qədər də təəccüblü görünmür. “Qarabağ klanı” Rusiya dəstəyinə ümid edir. İndi İrəvan hesab edir ki, Qarabağdan könüllü şəkildə Ermənistana köçən ermənilər xarici ölkələrin əlində alətə çevrilə bilər. Paşinyan hakimiyyətinin təmsilçiləri eyham vururlar ki, xüsusilə də Rusiyanın Qarabağ ermənilərindən Ermənistanda çevriliş planlarını reallaşdırmaq üçün istifadə imkanları mövcuddur. Ermənistan hakimiyyətinə yaxın media bu vəziyyətdə Qarabağ ermənilərini sərt tənqid edir. Məsələn, Paşinyanı dəstəkləyən erməni jurnalist Vahram Atanesyan bildirib ki, “artsax elitası” artıq bitib: “Etiraf etmək lazımdır ki, “artsax elitası” tükənib. 1924-cü ildə “Daşnaksütyun”un heç bir işi qalmadığı kimi, bu gün də “artsaxın klassik elitası”nın heç bir işi qalmayıb”. İstənilən halda, baş verənlər Ermənistanda hakimiyyətlə separatçıların qarşıdurmasının kəskinləşdiyini göstərir. Hər iki tərəf sona qədər mövqelərini qorumaqda israrlıdır.
Nahid SALAYEV