Rusiya Paşinyanın Britaniya ilə də hərbi əməkdaşlığını malalayır... Niyə?...
Ramil Hüseynov: “Bunun başlıca səbəblərindən biri əsas diqqətin Ukraynaya yönəlməsi ilə bağlıdır”
Rusiya Ermənistanı müttəfiqi hesab edir. Bunu Kremlin mətbuat katibi Dmitri Peskov bildirib. Onun sözlərinə görə, Rusiya Ermənistanla münasibətləri inkişaf etdirməyi planlaşdırır.
“Ermənistan suveren ölkədir, kiminlə lazım bilirsə, onunla münasibətləri inkişaf etdirir. Rusiya Ermənistanı müttəfiq, dost ölkə hesab edir və müttəfiqlik münasibətlərini inkişaf etdirməyi planlaşdırır”, - Kremlin sözçüsü Ermənistanın Böyük Britaniya ilə hərbi əməkdaşlığına dair sualı cavablandırarkən deyib.
Ermənistan KTMT üzvi ola-ola NATO ölkələri ilə açıq şəkildə hərbi müstəvidə əməkdaşlığını genişləndirir. Bunun Rusiyanın maraqlarına zidd olmasına rəğmən, Kreml təmkinli davranmaqda davam edir.
Maraqlıdır, Rusiya nə vaxta qədər Ermənistanın Qərblə hərbi müstəvidə əməkdaşlığını malalayacaq?
“Ermənistan qadağan olunan məhsulların Rusiyaya ötürülməsində fəal rol oynayır”
Sözügedən məsələni “Bakı-Xəbər”ə şərh edən “Yeni Xətt” Müstəqil Siyasi Tədqiqatlar Mərkəzinin rəhbəri Ramil Hüseynov bunun səbəbini bir sıra amillərlə əlaqələndirdi: “Bunun başlıca səbəblərindən biri Rusiyanın əsas diqqətinin Ukraynaya yönəlməsi ilə bağlıdır. Rusiyada hesab edirlər ki, Ermənistan böyük ölçüdə iqtisadi baxımdan onlardan asılı olduğu üçün çox uzağa gedə bilməz. Kreml bu səbəbdən Paşinyan hakimiyyətini cəzalandırmağa tələsmir. Rusiya hakimiyyəti hesab edir ki, Paşinyan Ermənistan deyil. Hansısa mərhələdə Nikolu zərərsizləşdirsələr, vəziyyəti öz xeyirlərinə dəyişəcəklər. Ancaq məsələ göründüyü qədər sadə deyil. Bu gün Ermənistan cəmiyyəti, cəmiyyətdəki əhval-ruhiyyə Qərbə köklənib. Bunun nəticəsidir ki, Paşinyan və onun komandası cəsarətlə Qərbə doğru siyasi reveranslar edir. Digər tərəfdən, Ermənistan Rusiyanın sanksiyalardan yayınmasında vacib halqadır. Faktiki olaraq, Ermənistan bir sıra qadağan olunmuş məhsulların reeksportu ilə məşğuldur. İki il ərzində Ermənistan Rusiyaya 3,7 milyard dollarlıq mikroçip və yarımkeçirici ixrac edib. Bəlli məsələdir ki, bu məhsullar Ermənistanda istehsal olunmur. Rusiya bu məhsulları Ermənistan vasitəsi ilə almaqla, hərbi sənayesini ayaqda saxlayır. Bunu Qərb də yaxşı bilir. Ermənistan bütün bunlardan qazansın deyə, Qərb bünu görməzdən gəlir. Hesab edirəm ki, Peskovun Ermənistanın Böyük Britaniya ilə hərbi əməkdaşlığı malalaması həm də bununla əlaqədardır. Nə də olsa, Ermənistan qadağan olunan məhsulların Rusiyaya ötürülməsində fəal rol oynayır. Çox güman ki, fürsət düşən kimi Rusiya bütün vasitələrlə Paşinyanı neytrallaşdırmağa çalışacaq. Ancaq hələ ki, belə bir imkan real görünmür”.
Vidadi ORDAHALLI
