Milli Məclisdə Qərbi Azərbaycan üzrə xüsusi komissiya yaradılır...
Qasım Hacıyev: “Qərbi azərbaycanlıların beynəlxalq təminat altında öz tarixi yurdlarına qaytarılması məsələsinin gerçəkləşməsi üçün...”
Milli Məclisdə “Qərbi Azərbaycana qayıdış” komissiyasının yaradılması aktuallaşıb. Bu barədə fikirlər Qərbi Azərbaycan İcmasının bəyanatında yer alıb.
“...Bəyan edirik ki, Ermənistan bu təhlükəli siyasətdən əl çəkməsə, onda biz Azərbaycan Respublikasında mühacirətdə olan Qərbi Azərbaycan hökumətinin təsis edilməsi istiqamətində işlərə başlayacaq və bu xüsusda, ilk olaraq yeni seçilmiş parlamentdə “Qərbi Azərbaycana qayıdış”komissiyasının yaradılması məqsədilə Milli Məclisə müraciət ünvanlayacağıq”.
“Milli Məclisin nəzdində belə bir komissiyanın yaradılması ideyasının reallaşması günün tələbidir, tarixi zərurətdir”
AMEA-nın Qafqazşünaslıq İnstitutunun Qafqaz Tarixi şöbəsinin müdiri, professor Qasım Hacıyev “Bakı-Xəbər”ə şərhində bildirdi ki, Milli Məclisdə belə bir komissiyanın yaradılması artıq zərurətə çevrilib. Q.Hacıyev bildirdi ki, Ermənistandakı revanşist qüvvələr, o cümlədən də separatçıların tör-töküntüləri yenidən aktivləşiblər və Azərbaycana qarşı əsassız ərazi iddialarını davam etdirirlər.
Azərbaycanın ərazi bütövlüynə qarşı təhdid yaratmaq niyyətində olan bu qüvvələrin ermənilərin “beynəlxalq təminat altında Qarabağa qayıdış”ını ortaya atmasının bizim də bir sıra addımlar atmağımız üçün əsas yaratdığını deyən Q.Hacıyev qeyd etdi ki, Qərbi azərbaycanlıların geri qayıdışının təmin edilməsinə görə bütün mümkün işləri görməliyik. “Çox təəssüflər olsun ki, separatçılar bu gün də öz qeyri-qanuni əməllərindən əl çəkmək istəmirlər. Onlar baş verənlərdən dərs götürmək əvəzinə, yenidən təxribatla məşğul olmağa başlayıblar. Əlbəttə, bu yolverilməzdir.
Milli Məclisdə “Qərbi Azərbaycana qayıdış” komissiyasının yaradılması çox yaxşı bir ideyadır və bunun effektiv olacağı şübhə doğurmur. Bu, məsələnin həll olunması yolunun, istiqamətinin müəyyənləşdirilməsi üçün çox səmərəli olacaq. Bilirsiz, tarixdə çox ədalətsizliklər baş verib və nəhayət, sonradan illər keçsə də haqq-ədalət öz yerini tapıb, problemlər həll olunub. Qərbi azərbaycanlıların son deportasiyası uzaq tarixdə baş verməyib, yaxın tariximizin faciələrindən biridir.
XX əsrdə dəfələrlə Qərbi Azərbaycandan, öz ata-baba yurdlarından azərbaycanlılar deportasiya edilib, qovulub, zülm çəkib. O deportasiyaları, o faciələri törədənlər isə bu gün nəinki peşman olmayıb, hətta xalqımızın geriyə, öz vətənlərinə qayıtmalarına imkan vermirlər, hansısa tələblərlə çıxış edirlər, bizə təhdid yaratmağa çalışırlar. Bugünə qədər Ermənistan tərəfindən Qərbi azərbaycanlılara qarşı çox böyük ədalətsiz münasibət göstərlir və bu münasibəti bundan sonra da davam etdirmək fikrindədirlər”.
Q.Hacıyev bildirdi ki, Qarabağın ermənilərə heç bir aidiyyəti olmadığı halda onların indi də bizim ərazilərə qarşı iddia irəli sürməsi gülüncdür. Q.Hacıyevin sözlərinə görə, Çar Rusiyası tərəfindən Azərbaycanın Qarabağ və digər bölgələrinə köçürülən ermənilər ərazilərimizdə yerləşəndən sonra xaricdəki havadarlarının dəstəyinə arxalanıb ərazi bütövlüyümüzə qarşı pozuculuq addımları atdılar. “Ermənilər özləri onlara aid olmayan Qarabağ torpağından könüllü şəkildə köçüb getdilər. Baxmayaraq ki, Azərbaycan dövləti dəfələrlə onlara çağırış edib “qalın, Azərbaycan vətəndaşlığını qəbul edib yaşayın” dedi, amma onlar qalmadılar, çıxıb getdilər. Azərbaycan dövləti onları qovmadı, Ermənistandakı və xaricdəki havadarlarının “əl işarəsi” ilə ərazilərimizi tərk etdilər. İndi də gedib bizim ərazilərimizlə bağlı uydurmalar yaradırlar. Qondarma təşkilatlar yaradıb Azərbaycana qarşı əsassız iddialar irəli sürürlər, “beynəlxalq təminat altında” yenidən qayıtmaq istəyirlər. Halbuki, ora qayıtmağa onların heç bir hüquqi əsasları da yoxdur. Amma XX əsrdə üç dəfə azərbaycanlılar indiki Ermənistandan, tarixi Qərbi Azərbaycandan deportasiya olunublar. Bəs nə üçün Ermənistan hökuməti azərbaycanlıları öz tarixi yurdlarına, dədə-baba ocaqlarına qaytarmaq istəmir? Qərbi azərbaycanlılarının qayıdış hüququnu niyə pozur? Beynəlxalq təminatla Qərbi azərbaycanlılar öz yurdlarına qayıtmalıdır, çünki buna onların tarixi və hüququ əsasları var. Qərbi Azərbvaycan ərazisində Ermənistan adlı dövlət qurulmazdan əvvəl də orda azərbaycanlılar yaşayıb, ora Azərbaycan türklərinin tarixi torpaqlarıdır, tarixi Vətənləridir. Bu gün də onların yaddaşında o tarixi torpaqlar yaşayır. Oradakı toponiumlər, hidronimlər, oykonimlər, bütün tarixi faktlar, abidələr göstərir ki, ora Azərbaycan türklərinin tarixi yurdudur. Ona görə də, Qərbi Azərbaycana qayıdış çox vacibdir, çox aktualdır. Qərbi azərbaycanlıların beynəlxalq təminat altında öz tarixi yurdlarına qaytarılması məsələsinin gerçəkləşməsi üçün belə bir komissiyanın yaradılması zərurətə çevrilib. Qərbi Azərbaycan türklərinə qarşı Ermənistanın ədalətsiz yanaşmasını aradan qaldırmaq üçün o torpaqlara böyük qayıdış başlamalıdır. İndidən biz bu istiqamətdə işləri gücləndirməliyik. Hesab edirəm ki, indidən o fikirlər səslənir, planlar işlənilir, onların da həyata keçirilməsi üçün Milli Məclisin tərkibində belə bir komissiyanın yaradılması çox vacibdir. Milli Məclisin nəzdində belə bir komissiyanın yaradılması ideyasının reallaşması günün tələbidir, tarixi zərurətdir. Bunu alqışlayıram. Dünya ictimaiyyətinin bütün sülhpərvər, ədalətli, prinsipial dövlətləri, cəmiyyətləri, xalqları, təşkilatları da bu işə dəstək verməlidir. Ona görə də, belə hesab edirəm ki, belə bir komissiyanın yaradılması çox yaxşı bir ideyadır”-deyə Q.Hacıyev qeyd etdi.
İradə SARIYEVA
