Ermənistan Bakı ilə vasitəçisiz danışıqlardan çəkilə bilər...
Əli Mustafa: "Onlar bizim haqlı tələblərimizin qarşısında təkbaşına dura bilməyəcəklərini anlayırlar"
Ermənistan və Azərbaycan arasında dövlət sərhədinin təhlükəsizliyi və demarkasiyası üzrə komissiyaların işi çərçivəsində Ermənistan-Azərbaycan sərhədinin İcevan və Qazax hissəsində Ermənistan baş nazirinin müavini Mher Qriqoryan və Azərbaycan baş nazirinin müavini Şahin Mustafayev arasında görüş keçirilib.
Demokratik Alternativ Partiyasının sədri Suren Surenyants bildirib ki, bu komissiyanın nümayəndələrinin əvvəlki iclaslarında siyasi danışıqlar vasitəçilik platformalarında aparılırdısa, indi mənzərə dəyişib. Rəsmi Bakı danışıqları vasitəçisiz aparmağı təklif edəndə, görünür, İrəvan vasitəçisiz danışıqlara hazır olmadığını açıq şəkildə bildirməklə yanaşı, həm də əks təkliflə çıxış edərək Ermənistan-Azərbaycan sərhədində sərhəd komissiyalarının iclasının keçirilməsini təklif edib.
Suren Surenyantsın sözlərinə görə, rəsmi İrəvan bu addımı ilə bir tərəfdən Bakının təklifini rədd edib, digər tərəfdən isə onu yarı yolda qarşılamağa razılaşıb:
"Trend təhlükəlidir, əgər Azərbaycan bu görüşü presedent kimi təqdim edərsə və bundan sonra siyasi danışıqların vasitəçilərsiz aparılmasını tələb edərsə, bu, Ermənistanın növbəti diplomatik məğlubiyyəti demək olar. Ermənistanın təslim olması üçün "yol xəritəsi"də saymaq olar".
Ermənilərin vasitəçilərsiz danışıqlardan bu şəkildə ehtiyat etmələri nə ilə bağlıdır?
Müstəqil siyasətçi Əli Mustafa "Bakı-Xəbər"ə açıqlamasında bildirdi ki, ermənilərin bu narazılığını başa düşmək olmur: " Ola bilsin, onlar düşünürlər ki, birbaşa görüşdə onların dostlarını, Qərbdə olan müttəfiqlərini incidərlər və onlar tək qalarlar. Yəqin ki, məsələlərdən biri budur. İkinci, onlar başa düşürlər ki, müttəfiqlərin də maraqları var, onların kənara qoyulması müttəfiqləri də narazı salır. Eyni zamanda, güc nisbəti məsələsində də haqlıdırlar. Onlar Azərbaycana müqabil daha zəif olduqlarının fərqindədirlər, orda qeyd olunduğu kimi, hesab edirlər ki, vasitəçilər olmazsa, Azərbaycanla Ermənistanın görüşləri, danışıqları Ermənistanın tam kapitulyasiyasına gətirib çıxara bilər. Burda da haqlıdırlar. Azərbaycan həqiqətən güclüdür və daha ciddi məsələlər diqtə etmək hüququ var. Bəllidir ki, ərazimizin əhəmiyyətli hissəsi Ermənistanın işğalı altındadır. Yəni1920-ci ildə Demokratik Cümhuriyyətin ərazilərinin sonradan ruslar tərəfindən alınıb Ermənistana verilməsi, ordan əhalinin köçürülməsi məsələsi var. Zəngəzur dəhlizinin açılmaması, Naxçıvanın blokadada qalması məsələsi var. Həmçinin Ermənistanın Azərbaycana vurduğu zərərlə bağlı kompensasiya məsələsi, Qarabağda olan cinayətlərə görə Azərbaycanın cinayətkarları tələb etmə haqqını da bildirə bilərik. Əlbəttə, Azərbaycan Ermənistana çox ciddi şəkildə beynəlxalq məhkəmələr vasitəsilə tələb irəli sürüb, dəymiş zərərin kompensasiya ilə ödənilməsini tələb edə bilər və etməlidir. Sonrasında da qanunsuz olaraq əldə olunan ərazilərimizi geri istəyəcəyik. Bütün bunların hamısını, haqsız olduqlarını Azərbaycanın haqlı tələbləri qarşısında heç nə edə bilməyəcəklərini ermənilər başa düşürlər. Ona görə də, onlara bu zəiflikləri səbəbindən dostlarının dəstəyi lazımdır. Uzun müddət Rusiyanı da arxalarına aldılar ki, Rusiyanın köməyi ilə bizimlə üz - üzə dursunlar. İndi də Fransa, Amerika, bütün Qərb dövlətlərini arxalarına almağa, məsələləri örtməyə çalışırlar. Onlar bizim haqlı tələblərimizin qarşısında təkbaşına dura bilməyəcəklərini anlayırlar. Bu baxımdan ermənilərlə bağlı deyilən arqumentləri anlayıram və hesab edirəm ki, Azərbaycan bütün hallarda öz haqlı tələblərində israrlı olmalıdır".
Məhəmmədəli QƏRİBLİ
