Kibercinayətkarlar yeni üsullarla oğurluqlara başlayıb - DİN-dən vətəndaşlara XƏBƏRDARLIQ...
"Kibercinayətkarlar yeni üsullarla oğurluqlara başlayıb". Bunu Daxili İşlər Nazirliyinin Mətbuat xidmətinin rəisi Elşad Hacıyev bildirib.
“Saxta sosial şəbəkə səhifə və profillərin hekayələrində “forex” vasitəsilə yüksək məbləğlərdə - 10000, 20000, 40000, 50000 min manat uduş əldə etdiklərinə görə hansısa naməlum şəxslərə təşəkkür mətnləri yazılır. Guya, həmin şəxs ona pul qazanmağa yardım edib. Bunu görən bir başqa vətəndaş dərhal həmin şəxsdən kömək istəyir, ona da qazanmaq üçün fürsət yaradılmasını xahiş edir. Beləliklə, naməlum adam israrlı xahişlərdən sonra ondan şəxsi bank kart məlumatlarını alır. İlkin yatırım üçün kartda bəlli bir vəsaitin olacağı təqdirdə ona kömək edəcəyini vəd edir”, - Hacıyev qeyd edib. turbo az mercedes
Onun sözlərinə görə, xırda məbləğlər köçürüldükdən sonra daha böyük məbləğlər tələb olunur:
“Xırda məbləğləri könüllü olaraq köçürən vətəndaşımıza bildirilir ki, pul azdır, faiz ödənişləri artıb, sizi oyuna daxil edə bilmirik, əlavə vəsait köçürülməlidir. Vətəndaşımız həmin hesaba pulun köçürülməsi üçün naməlum şəxsə bank kartı məlumatlarını, göndərilən məxfi şifrəni verdikdən sonra kartında olan bütün vəsaiti oğurlanır”.
Qurum rəsmisi yenidən vətəndaşlara müraciət edib: “Sosial şəbəkə səhifələrində cəlbedici qazanc təklifləri ilə bağlı paylaşımlara həssas yanaşın, heç bir halda şəxsi məlumatları naməlum şəxslərə verməyin. Təhlükə var, tələyə düşə bilərsiniz, diqqətli olun!”
ZÜMRÜD
