Azərbaycanın Avroittifaqla enerji strategiyasını pozmaq erməni lobbisinin 1 saylı hədəfində...
Elşad Həsənov: “Enerji daşıyıcılarımızın əsas alıcısı Avropa İttifaqı ölkələridir”
Avropa qurumlarının Azərbaycana yönəlik qərəzli fəaliyyəti dayanmaq bilmir. Bu arada Avropa Parlamenti Komitəsi Azərbaycana qarşı sanksiyalar tətbiq etməyə çağırıb.
Belə ki, Avropa Parlamentinin Xarici Əlaqələr Komitəsi ümumi xarici və təhlükəsizlik siyasətinin həyata keçirilməsinə dair illik hesabat qəbul edib. Orada Azərbaycanın antiterror tədbirləri pislənilib. İllik hesabatda Azərbaycanın həyata keçirdiyi hücumun nəticəsiz qala bilməyəcəyi bildirilir. Həmçinin Aİ-ni atəşkəsin çoxsaylı pozuntularına görə məsuliyyət daşıyan Azərbaycan hakimiyyətinə qarşı sanksiyalar tətbiq etməyə çağırır. Sənəddə enerji üzrə anlaşma memorandumunun dayandırılması və Azərbaycanda insan haqları ilə bağlı dramatik vəziyyəti nəzərə alaraq, Azərbaycanla yeni tərəfdaşlıq sazişi üzrə danışıqların dayandırılması tələb olunur.
Burada əsas məqsəd Azərbaycanın Avropa İttifaqı ilə enerji sahəsində strateji əməkdaşlıq memarandumunu pozmaq cəhdidir.
“İndi Azərbaycana qarşı olan dairələrin strateji məqsədləri odur ki, bunu pozsunlar”
Sözügedən məsələ ilə bağlı fikirlərini “Bakı-Xəbər”lə bölüşən siyasi ekspert Elşad Həsənov hesab edir ki, son vaxtlar bir sıra Avropa qurumları sistemli şəkildə anti-Azərbaycan ritorikası ilə çıxış etməyə başlayıblar: “Bütün bunların hamısı bir mərkəzdən idarə olunur. Məqsəd odur ki, Azərbaycanı hədəf alsınlar və son nəticədə zəiflətsinlər. Ölkəmizə qarşı olan dairələr yaxşı bilirlər ki, Azərbaycanın əsas gəlirləri enerji daşıyıcılarının ixracı hesabına formalaşır. O cümlədən, enerji daşıyıcılarımızın əsas alıcısı Avropa İttifaqı ölkələridir. Azərbaycan Avropa ölkələrinin enerji təhlükəsizliyinə dəstək verir. Avropa İttifaqı Komissiyasının sədri Ursula fon der Leyenin 2022-ci ilin iyununda ölkəmizə rəsmi səfəri zamanı Azərbaycanla Avroittifaq arasında enerji sahəsində Strateji Tərəfdaşlıq üzrə Anlaşma Memorandumu imzalanıb. İndi həmin dairələrin strateji məqsədləri odur ki, bunu pozsunlar. İstəmirlər ki, Avroittifaq Cənub Qaz Dəhlizinin genişlənnməsinə vəsait ayırsın. Söhbət bununla bağlı qaz kəmərinin keçdiyi ölkələrdə genişləndirmə işlərinin aparılmasından gedir. Kəmər genişləndirilməlidir ki, daha çox qaz ixrac etmək mümkün olsun. Fikrimcə, Avropa Parlamenti Komitəsinin məqsədi həm də bundan ibarətdir. Çünki ölkəmizə qarşı olan qüvvələr yaxşı bilirlər ki, bir sıra Avropa dövlətləri Azərbaycandan qaz və elektrik enerjisi idxal etməkdə qərarlıdır. Ona görə də Ermənistana dəstək adı altında bu işi pozmaq istəyirlər. Avropa dövlətləri Azərbaycandan qaz idxal etməsələr belə, itirən tərəf onlar olacaq. Çünki bizim qazımızın alıcısı var və mütləq deyil ki, bu, Avropa İttifaqı ölkələri olsun”.
Vidadi ORDAHALLI
