Paşinyan 1 ilin içində Müstəqillik Bəyannaməsinə münasibətini kəskin dəyişdi - ötən il daha ağıllı danışırdı
Əli Orucov: “Bir il əvvəllə müqayisədə Nikola həm dəstək, həm də daxildən təzyiqlər artıb”
Ermənistanın baş naziri Nikol Paşinyan ölkənin Müstəqillik Bəyannaməsinin qəbulunun 34-cü ildönümü münasibətilə təbrikində deyib ki, Ermənistan Konstitusiyasında bu bəyannaməyə istinad var, lakin bu heç də bəyannamənin konstitusiyanın tərkibində olması anlamına gəlmir.
Paşinyan vurğulayıb ki, müstəsna əhəmiyyətə malik Müstəqillik Bəyannaməsi Ermənistanda Qarabağ hərəkatının zirvə nöqtəsinə çatdığı və SSRİ-də iqtisadi, siyasi və ideoloji böhranın baş verdiyi bir vaxtda qəbul olunub: “2020-ci il müharibəsindən əvvəl, xüsusilə də müharibədən sonra mən Bəyannamənin mətnini təkrar-təkrar oxumuşam. Etiraf etməliyəm ki, mənim bu sənəddən müharibədən sonra aldığım təəssürat müharibədən əvvəlki təəssüratdan fərqlənirdi”.
Diqqəti çəkən məqam odur ki, Paşinyanın 1 il əvvəl ölkənin Müstəqillik Bəyannaməsinin qəbul edilməsinin ildönümü ilə bağlı çıxışında səsləndirdiyi mesajlar builki ictimai mesajının mətnindən yığışdırılıb. Baş nazir ötən il Bəyannamənin təftişinə girişib onu ölkənin müstəqilliyinə, təhlükəsizliyinə təhdid mənbəyi sayırdısa, budəfəki çıxışında bu fikrindən daşındığını aydın görünür. Maraqlıdır, ötən bir ildə Paşinyanın Ermənistanın gələcəyi haqqında Azərbaycanda da müsbət qarşılanan strategiyasındakı ciddi dəyişikliyin səbəbi nədir?
“Bunun digər səbəbi Cənubi Qafqazda geosiyasi mübarizənin kəskinləşməsi ilə bağlıdır”
Sözügedən məsələyə aydınlıq gətirən AMİP funksioneri Əli Orucov “Bakı-Xəbər”ə açıqlamasında son bir ildə Paşinyanın Konstitusiya ilə bağlı ritorikasının dəyişməsini bir sıra amillərlə əlaqləndirdi: “Məsələ ondadır ki, bir il əvvəllə müqayisədə Paşinyana həm dəstək, həm də daxildən təzyiqlər artıb. Qərbin Paşinyan hakimiyyətinə dəstəyi hiss olunan dərəcədə artıb. Bu, təkcə siyasi dəstəklə ölçülmür. Həm də iqtisadi və hərbi yardımla ölçülür. Faktiki olaraq, bir sıra Qərb ölkələri Ermənistanı yavaş-yavaş silahlandırırlar. İki il əvvəl belə gözləntilər yox idi və yaxud da bu dərəcədə deyildi. Paşinyanın ritorikasının sərtləşməsinin ikinci səbəbi daxili təzyiqlərlə bağlıdır. Düzdür, revanşist, Rusiyapərəst müxalifətin nüfuzu yoxdur, sosial dayaqları zəifdir. Ancaq keşiş Baqratın rəhbərliyi ilə keçirilən kütləvi aksiyalar, Paşinyanın guya birtərəfli güzəştlərə getdiyi barədə yaradılan mif içtimai rəyə təsirsiz ötüşmədi. Keçirilən etirazlar hakimiyyətin dəyişdirilməsi üçün kifayət etməsə də, Paşinyan hakimiyyətinin dayaqlarına təsirsiz ötüşməsi. Baş nazirin reytinqi 17 faizə düşdü. Ehtimal ki, Qərb bu amilə diqqətlə yanaşaraq Paşinyana ictimai rəyi nəzərə almağı tövsiyə edib. Çünki belə bir rəy formalaşdırıldı ki, Paşinyan Konstitusiya dəyişikliklərinə məhz Azərbaycanın tələbi əsasında gedir. Bütün vasitələrlə cəmiyyətdə bununla bağlı Nikola qarşı qıcıq yarada bildilər. Üçüncü səbəb, Cənubi Qafqazda geosiyasi mübarizənin kəskinləşməsi ilə bağlıdır. Məsələ ondadır ki, Qərbin Zəngəzur dəhlizinə Rusiyanın nəzarət etməsinə qarşı olması, İranın ümumiyyətlə bu dəhlizə qarşı olması mürəkkəb vəziyyət yaradır. Çünki bir sıra ölkələrin tez-tələsik Qafanda konsulluqlar açmaq qərarları bütün bu oyunların tərkib hissəsidir. Ona görə də bir il əvvəllə müqayisədə Paşinyan Konstitusiya ilə bağlı əvvəlki mövqeyini dəyişir və ritorikanı sərtləşdirir. Bir sözlə, Paşinyan iqtidarı erməni cəmiyyətini qıcıqlandıran mövzuları ikinci plana atır. Onların içərisində də konstitusiya islahatları məsələsi öndə gəlir”.
Vidadi ORDAHALLI
