Paşinyanın 1-2 yumşaq jesti Putinin "ürəyini soyutmadı”...
Turab Rzayev: “KTMT tədbirlərinə qatılmamaqla Rusiyaya qarşı dirəniş nümayiş etdirən Paşinyan indi adi bir şənlikdə Putinlə təmasa can atır”
“Hazırda Rusiya Prezidenti Vladimir Putinlə Ermənistanın Baş naziri Nikol Paşinyan arasında görüş planı yoxdur”. Bunu Kremlin sözçüsü Dmitri Peskov deyib. Onun sözlərinə görə, Paşinyan dekabrın sonunda Sankt-Peterburqa qeyri-rəsmi görüşə gəlsə, bu, iki lider arasında dialoq üçün əla fürsət olacaq.
O, belə bir söhbətin Putinin planlarında olub-olmaması sualına cavab verərək, “hazırda yox” deyib.
Kreml nümayəndəsi xatırladıb ki, dekabrın sonunda Sankt-Peterburqda Yeni il qabağı ənənəvi tədbirlərin keçirilməsi planlaşdırılır. “Fakt budur ki, onlar sırf bayram tədbiri olmayacaq, iş gündəliyi olan tədbirlər olacaq. Əgər cənab Paşinyan ora gəlsə və onlar da hamı kimi onu da gözləyirlərsə, o zaman danışmaq üçün böyük fürsət yaranacaq. Əgər dövlət başçıları bunu daha əvvəl zəruri hesab etməsələr, bu onların qərarı olacaq”.
Paşinyanın Rusiyaya yumşaq jest etməsi belə Putini razı salmayıbsa, bunun sonu necə olacaq?
Siyasi şərhçi Turab Rzayev “Bakı-Xəbər”ə açıqlamasında bildirdi ki, Rusiya ilə Ermənistan arasındakı problemıərin kökü çox dərindir: “Rusiya keçmiş SSRİ məkanında hakimiyyətini bərpa etmək istəyir. Paşinyan isə bunun əksinə olan Qərbdəki qüvvələrin istəklərinə uyğun olaraq Ermənistanı Rusiyadan ayırıb, Qərbə calamaq strategiyasını yürüdür. Rusiya bilirdi ki, yaxın vaxtlarda onu gərgin mərhələ gözləyəcək. Buna görə də öz nüfuz dairəsini genişləndirməyə çalışırdı. Rusiya öz təsir dairəsində olan ərazilərdən Qərbə qarşı bufer zona kimi istifadə etməlidir ki, duruş gətirə bilsin. Putinin əsas hədəfi məhz budur. Ona görə də, yaxın ətrafdakı ölkələrdən tabeçilik gözləyirdi. Putin bu ölkələrə əvvəlki kimi balanslı siyasət aparmağa imkan vermirdi. Biz bunu Belarusda gördük - Lukaşenkonun qeyd-şərtsiz tabeliyi əldə olundu. Biz bunu Mərkəzi Asiya hadisələrində gördük. Rusiya həmin regionlarda öz hərbi mövcudluğunu KTMT vasitəsilə təmin etməyə çalışır. Ukraynadan da bu tələb edilirdi. Ancaq razılıq olmadı deyə, müharibə ilə nəticələndi. Rusiya açıq şəkildə ona tabe olmağa çağırış edirdi. Ermənistanla Rusiyanı bir-birinə sıx tellər birləşdirir. Erməni elitası Rusiyada oturuşub. Ermənistanda isə Rusiyanın hərbi bazası var. Həmin ölkənin sərhədlərini də Rusiya hərbçiləri qoruyur. Dəmiryol, qazpaylaçı şəbəkə Rusiyanın nəzarətindədir. Rusiya Paşinyanın fərqli çıxışlar etməsinə ciddi reaksiya vermirdi.
Paşinyanın getdikcə əndazəni aşması, daha aqressiv mövqe sərgiləməsi Rusiyanı özündən çıxardı. Zaxarova açıq şəkildə bildirdi ki, Zəngəzurda erməni yox, Rusiya hərbçiləri olacaq. Açıq mesaj verildi ki, Rusiya Ermənistanda fərqli oriyentasiyaya imkan verməyəcək. Paşinyan Rusiya ilə bağlı belə ziqzaqlı gedişlər edib, Rusiya bunu qəbul edib. Bundan sonra isə onun nazı ilə oynamayacaq. Paşinyan ümid edir ki, bəlkə Putin onunla görüşdü. Bu şansı əldə etmək üçün fürsət axtarır. Paşinyan belə davranırsa, onun Qərblə problemləri yarana bilər. KTMT tədbirlərinə qatılmamaqla Rusiyaya qarşı dirəniş nümayiş etdirən Paşinyan, indi adi bir şənlikdə Putinlə təmasa can atır”.
Məhəmmədəli QƏRİBLİ
