907-ci Düzəlişə Senatın qadağa qərarından imtina ediləcək - Blinkenin zəngi(?)...
Əli Mustafa: “Bu, Birləşmiş Ştatlar siyasi simasının bir sınağıdır”
Məlum olduğu kimi, münasibətlər gərgin olan vaxt ABŞ Senatının Xarici Əlaqələr Komitəsi Azərbaycana yardımla bağlı səlahiyyətlərdən imtinanı nəzərdə tutan S.3000 qanun layihəsini təsdiqləyib və bununla da ölkəyə qarşı açıq-aşkar qeyri-dost addım atıb.
Senator Petersin təşəbbüsü ilə hazırlanan qanun Azərbaycanla bağlı 907-ci Düzəlişin qüvvəsini dayandırmamağı nəzərdə tutur. Qərar qüvvəyə minməzdən əvvəl Nümayəndələr Palatası tərəfindən təsdiq edilməli və prezident tərəfindən imzalanmalıdır.
O da məlumdur ki, dövlət katibi Entoni Blinken Prezident İlham Əliyevə zəng edib və tərəflər bir sıra məsələləri müzakirə ediblər. Bəzi məsələlərlə bağlı razılıq əldə olunub.
Maraqlıdır, Blinkenin zəngindən sonra Azərbaycana dövlət yardımını qadağan edən 907-ci Düzəliş dondurulacaq, yoxsa qüvvədə qalacaq?
“ABŞ bu sınaqdan üzüağ çıxmaq istəyirsə, 907-yə yox deməlidir”
Sözügedən məsələyə aydınlıq gətirən Demokratik Dəyişim Partiyası Təşkilat Komitəsinin sədri Əli Mustafa bununla bağlı bir sıra məqamlara toxundu: “ABŞ-da qanunvericilik sistemi elədir ki, orada palatalardan birinin qəbul etdiyi düzəliş və yaxud da qanun layihəsi digər palata tərəfindən təsdiqlənməlidir. Daha sonra prezident imzaladıqdan sonra qüvvəyə minir. Bu, doğru təsbitdir və hüquqi baxımdan da belədir. Senatın Xarici Əlaqələr Komitəsinin qəbul etdiyi qərar ABŞ-Azərbaycan münasibətlərinin ruhuna ziddir. Birləşmiş Ştatların bəyan etdiyi demokratik dəyərlərə, prinsiplərə ziddir. Çünki burada Azərbaycan tərəfi haqlıdır. O cümlədən, işğalçını dəf edən tərəfdir. Ermənistan işğalına 30 il göz yuman Konqres, onun palataları, ölkə prezidentləri çox təəssüf ki, Azərbaycanın haqlı mübarizəsinə göz yumur. Hətta bir formada Azərbaycanın öz məğlubiyyəti ilə barışmasını istəyib. Buna nail olmadıqda isə ölkəmizə təzyiqlər edir. O baxımdan hesab edirəm ki, bu, daha çox siyasi təzyiq instrumentidir. Ümumiyyətlə, 907-ci Düzəlişin özü antidemokratik sənəddir. Çünki bu, ABŞ-ın özünün dünyaya bəyan etdiyi demokratik prinsiplərə ziddir. Əgər ABŞ doğrudan da dünyada sülhün və təhlükəsizliyin təminatına, demokratik dəyərlərə dəstək verən bir dövlətdirsə, sözün həqiqi mənasında ədaləti və azadlığı dəstəkləyirsə, 907-ci Düzəlişi ləğv etməlidir. Çünki məlum düzəliş saxta əsaslara, arqumentlərə söykənir. Orada söhbət Azərbaycanın Ermənistanı blokadaya almasından gedir. Halbuki, Azərbaycan ərazisi olan Naxçıvan bu gün də Ermənistanın blokadasındadır. Yaxşı olardı ki, konqresmenlər və senatorlar bunu görsünlər. Bu, siyası korluq və naşılıq deyil. Daha çox qərəzli və çox qüsurlu yanaşmadır. Eyni zamanda, ayrıseçkilik və ikili yanaşmadır, erməni-xristian təəssübkeşliyidir. Ona görə də qəbuledilməzdir. ABŞ Azərbaycanla yaxın münasibətləri davam etdirmək istəyirsə, 907-ci Düzəlişi dondurmalıdır. Necə ki, 907-ci Düzəliş 2002-ci ildən bəri ABŞ prezidenti tərəfindən hər il dayandırılır, bu davam etdirilməlidir. O cümlədən, konkret olaraq S.3000 qanun layihəsi Nümayəndələr Palatasında təsdiq olunmamalıdır. Yox, Nümayəndələr Palatası bunu təsdiq edərsə, prezident Bayden buna veto qoymalıdır. Bu, Birləşmiş Ştatlar siyasi simasının bir sınağıdır. ABŞ bu sınaqdan üzüağ çıxmaq istəyirsə, 907-yə yox deməlidir. Azərbaycanla Ermənistana eyni yanaşma sərgiləməlidir”.
Vidadi ORDAHALLI
