Polşanın “Şimal axını”na hücumda Ukrayna ilə yaxından əməkdaşlıq etdiyi ortaya çıxdı – Alman kəşfiyyat şefindən ŞOK İDDİA...
Almaniya Xarici Kəşfiyyat Xidmətinin (BND) keçmiş rəisi Avqust Hanninq, Polşa və Ukraynanın 2022-ci ildə Rusiya qazını Avropaya daşıyan "Şimal Axını" Boru Kəmərinə edilən hücumlarda əməkdaşlıq etdiyini iddia edib.
1998-2005-ci illərdə BND-nin rəhbəri olmuş Avqust Hanninq Welt televiziya kanalına verdiyi açıqlamada bu cür hücumların güclü dövlət dəstəyi olmadan həyata keçirilə bilməyəcəyini deyib.
Bunun indi göründüyü kimi bir dalğıc təlimatçısının etdiyi xüsusi bir hərəkət olmadığına diqqət çəkən Hanninq deyib: "Xeyr, bu, hərbi cəhətdən böyük ölçüdə dəstəklənib. Düşünürəm ki, Polşa və Ukrayna hərbçiləri və kəşfiyyat xidmətləri də bu əməliyyatda böyük rol oynayıblar".
İstintaqın nəticələrinə görə, hücumlarda bir Ukrayna qrupunun iştirak etdiyinin görüldüyünə diqqət çəkən Hanninq deyib ki, bu, yalnız Polşanın güclü logistik dəstəyi ilə mümkün olub və bu cür qərarlar aşağı səviyyədə deyil, ən yüksək siyasi səviyyədə verilir: "Burada (Ukrayna) Prezident Zelenski ilə (Polşa) Prezident (Anjej) Duda arasında bu hücumu həyata keçirmək üçün bir razılaşma olduğunu düşünürəm".
Hanninq iddia edib ki, Polşa hücuma hazırlıqda ciddi şəkildə iştirak etdiyi üçün bununla bağlı istintaqın dürüst aparılmasına maraq göstərmir.
Almaniyanın keçmiş kəşfiyyat rəisi qeyd edib ki, boru kəmərlərinə böyük ziyan dəyib və Almaniya hökumətinin buna görə təzminat tələb edəcəyini gözləyir.
Alman mətbuatında, Federal Prokurorluğun tərəfindən Baltik dənizində təxminən 2 il əvvəl "Şimal axını" boru kəmərlərinə edilən hücumlarla bağlı Ukrayna vətəndaşı olan Volodimir Z. haqqında Avropa ərazisində həbs qərarı çıxarıldığı bildirilib. Qeyd edilir ki, dalğıc olan şübhəlinin sonuncu dəfə Polşada yaşadığını düşünən Almaniya rəsmiləri, iyun ayında Volodimir Z. barəsində çıxarılan həbs qərarını Polşaya çatdırıb, lakin Polşa tərəfi Almaniyanın hüquqi yardım tələbinə cavab verməyib.
Polşa Prokurorluğu Almaniya mətbuatına şübhəlinin yaşadığı yerdə olmadığını və Polşa-Ukrayna sərhədini keçdiyini açıqlayıb.
Qeyd edək ki, 2022-ci ilin sentyabrında "Şimal axını" boru kəmərlərinə edilən hücumlar Baltik dənizi vasitəsilə Rusiya və Almaniyanı birləşdirən boru kəmərlərinə böyük ziyan vurub. Boru kəmərlərində partlayışlar Baltik dənizində Danimarkanın Bornholm adası yaxınlığında qeydə alınıb.
Təxribat kimi qələmə verilən hücumlarla bağlı Almaniyadan başqa Danimarka və İsveçdəki qurumlar da araşdırmalara başlayıb, lakin Danimarka və İsveç bir müddət sonra araşdırmaları dayandırıb.
TAHİR
