Rusiyanın Ukraynadakı itkiləri ilə bağlı şok rəqəmlər açıqlandı - Moskva Qafqaz və Orta Asiyada da təsirini itirir...
NATO-nun baş katibi Yens Stoltenberq NATO Xarici İşlər Nazirləri Toplantısının sonunda təşkil edilən mətbuat konfransında iki gün ərzində Ukrayna, Çin və Qərbi Balkanlar kimi bir çox mövzunu müzakirə etdiklərini bildirib. Ukraynadakı vəziyyəti yerində qiymətləndirdiklərini ifadə edən Stoltenberq Rusiyanın ələ keçirdiyi bölgələrin yüzdə 50-nin Ukrayna ordusu tərəfindən geri alındığını bildirib.
Ukraynanın suveren dövlət olaraq mövcudluğunu davam etdirdiyini və bunun mühüm nailiyyət olduğunu vurğulayan Stoltenberq Rusiyanın müharibələrdə böyük itkilər verdiyini və iqtisadi cəhətdən zəiflədiyini iddia edib.
Rusiyanın siyasi baxımdan təkcə Ukraynada deyil, yaxın ətrafı Qafqazda və Orta Asiyada da təsirini itirdiyini ifadə edən Stoltenberq bildirib ki, Rusiya Çindən daha çox asılı vəziyyətə düşür: "Moskva gələcəyini Pekinə girov qoyur. Rusiya hərbi baxımdan qüvvələrinin əhəmiyyətli hissəsini itirdi. Yüzlərlə təyyarə, minlərlə tank və 300 mindən çox itki verdi".
Rusiyanın iqtisadi təzyiq altında olduğunu, neft və qaz gəlirlərinin azaldığını, 1000-dən çox xarici şirkətin ölkədəki fəaliyyətini dayandırdığını və ya miqyasını azaltdığını, keçən il 1,3 milyon insanın Rusiyanı tərk etdiyini bildirən Stoltenberq deyib ki, bütün bunlar Putinin Ukraynanı işğal etməklə strateji səhvə yol verdiyini göstərir.
Stoltenberq Rusiyanın ciddiyə alınması gərəgdiyini ifadə edərək, ölkənin hədəflərinin dəyişmədiyini bildirib: "Rusiya iqtisadiyyatı müharibə vəziyyətindədir. Putinin itkilərə qarşı dözümlülüyü yüksəkdir. Rusiyanın Ukraynadakı hədəfləri dəyişməyib. Rusiya qışdan əvvəl böyük bir raket ehtiyatı yaratdı. Ukraynanın enerji infrastrukturuna zərbə vurmaq üçün yeni cəhdlərini görürük, o, Ukraynanı qaranlıqda və soyuqda qoymağa çalışır".
TAHİR
