Prezident də bunu dedi - rayonlardakı Olimpiya mərkəzlərindən tam istifadə olunsaydı...
Teymur Maqsudov: “Olimpiya komplekslərinin potensialından uzun illər lazımı səviyyədə istifadə olunmayıb”
“...Daha çox medal qazana bilərdik, bəli, qazana bilərdik. Amma bu idmandır, idmanda qələbə də olur, məğlubiyyət də olur. Əsas odur bu Oyunlar bir daha göstərdi ki, Azərbaycanda idmanın inkişafı ardıcıl surətdə gedir. Onu da bildirməliyəm ki, bizim idmançılarımız beş idman növündə medallar qazanmışlar: cüdo, boks, taekvondo, yunan-Roma güləşi, sərbəst güləş üzrə. Yəni, bu da onu göstərir ki, Azərbaycanda idmanın bir çox növləri inkişaf edir”. Bu fikirləri Prezident İlham Əliyev Paris Yay Olimpiya Oyunlarında medal qazanmış Azərbaycan idmançılarını və onların məşqçilərini qəbul edərkən səsləndirib.
Bəli, Prezident tamamilə haqlıdır, nəticə daha da böyük, medallarımızın sayı daha çox ola bilərdi.
Əlbəttə, bütün idman strukturları öz vəzifələrinə lazımı səviyyədə yanaşsaydılar bu belə olardı. Məsələn, rayonlarda saysız Olimpiya kompleksləri var və o komplekslərin bəzilərinin, hətta bir çoxlarının hansı vəziyyətdə olduğu ilə bağlı informasiyalar yayılır ki, baxımsızdır, qapıları idmançıların üzünə açılmır və sair. Hər halda, belə informasiyalar olub.
Bu gün üçün Olimpiya komplekslərinin nə vəziyyətdə olduğunu deyə bilmərik, amma bir - iki il əvvəl üçün bu komplekslərin bir çoxları barədə çox narahatedici faktlar, məlumatlar yayılırdı. Əgər rayonlardakı saysız Olimpiya komplekslərinin potensialından son beş - on ildə lazımı səviyyədə istifadə olunmuş olsaydı, yəqin ki, Olimpiadada əldə olunmuş nəticələrin mənzərəsi daha böyük olardı.
Olimpiya komplekslərinin potensialından lazımı qədər istifadə olunmamasının Paris Olimpiadasında qələbələlərimizin daha böyük olmasına mənfi təsiri barədə nə demək olar?
“O komplekslər gənc idmançılarla dolu olmalıdır”
Tanınmış idman şərhçisi Teymur Maqsudov “Bakı-Xəbər”ə “Təbii ki, medalların sayı daha çox ola bilərdi. Bu dəfə güləşçilərimiz bizi bir o qədər də sevindirə bilməyiblər. Cəmi bir qızıl qazana bilsəydilər, biz artıq tarixi uğurdan danışardıq. Amma unutmayaq ki, sonuncu dəfə 2 qızıl medal 12 il əvvəl London Olimpiya oyunlarında olmuşdu. Ona görə də bu nəticəni heç cür uğursuzluq kimi qiymətləndirə bilmərik. Amma bu nəticələr bir çox federasiyalar üçün ciddi siqnal olmalıdı. Güləş və boks federasiyaları lazımı nəticələr çıxarmalıdırlar. Taekvondo həmçinin. Cəmi bir nəfərlə təmsil olunmaq, o idmançı medal qazansa belə, düşündürücü məqamdır. Və nəzərə almalıyıq ki, həm boksda, həm taekvondoda medalı legioner idmançı qazanıb.
Olimpiya komplekslərinin potensialından uzun illər lazımı səviyyədə istifadə olunmayıb. Son bir necə ildə vəziyyət dəyişib. Hazırda indiki idman rəhbərliyinin fəaliyyəti daha effektiv görünür.
O komplekslər gənc idmançılarla dolu olmalıdır”-deyə bildirdi.
T.Maqsudovun fikrincə, təbii ki, bu, kütləviliyə birbaşa təsir edən amillərdəndı. O qeyd edir ki, bu sahədə federasiyalar da aktivliklərini artırmalıdır. “Gənc idmançılar hardansa üzə çıxmalıdırlar. Cüdo Federasiyası bu mənada fərqlənir. Müxtəlif rayonlarda zallar təmir olunur və ya tikilir, kütləvilik artır. Digər federasiyalar da aktiv olmalıdırlar. Ümumiyyətlə, bir idmançının yetişməsi üçün illər lazım olur. 2-3 ilə bunu etmək mümkün deyil. Artıq indidən 2028 və hətta 2032-ci ildə keçiriləcək Olimpiya oyunlarını düşünməliyik”-deyə T.Maqsudov qeyd etdi.
İradə SARIYEVA
