Avropa Birliyi Azərbaycanın daxili işinə bu məqsədlə müdaxilə edir - bu müxalifətçilərin əli ilə...
Yadigar Məmmədli: “Məqsəd radikal qüvvələrlə təmasları artırıb ölkədə sabitliyi pozmaqdır”
Avropa ölkələrinin Azərbaycandakı səfirləri Azərbaycan Xalq Cəbhəsi Partiyasının sədri Əli Kərimli, Müsavat Partiyasının başqanı İsa Qəmbərlə görüşüb.
Əvvəlcə Böyük Britaniya Birləşmiş Krallığının Azərbaycandakı səfiri Fergus Auldi ilə görüş olub. Daha sonra Avropa İttifaqının Bakıdakı nümayəndəliyində səfir Peter Mixalkonun təşkilatçılığı ilə Avroittifaqın üzv dövlətlərin səfir və digər diplomatları ilə görüşləri olub. Keçirilən görüşdə ölkədəki ictimai-siyasi vəziyyət, sentyabrın 1-nə təyin olunmuş növbədənkənar parlament seçkiləri, siyasi məhbuslar, Avropa İttifaqı ilə Azərbaycan arasında münasibətlər və digər məsələlər müzakirə olunub.
Bax bu, Avropa İttifaqının növbəti dəfə Azərbaycanın daxili işlərinə belə müdaxilə cəhdi hansı planlardan xəbər verir?
“Dövlət hər zaman olduğundan daha güclüdür, cəmiyyətimiz daha həmrəydir”
Sözügedən məsələyə aydınlıq gətirən media eksperti Yadigar Məmmədli “Bakı-Xəbər”ə açıqlamasında qeyd etdi ki, köhnə ssenariləri yenidən işə salmaq istəyirlər: “Hər seçki dönəmində Avropa təsisatları, bəzi Qərb dövlətləri Azərbaycanda fəallaşmağa çalışırlar. Məqsəd radikal qüvvələrlə təmasları artırıb ölkədə sabitliyi pozmaqdır. Bu da əslində bizim üçün yeni bir şey deyil. Çünki əvvəlki seçkilərdə dəfələrlə buna bənzər halların şahidi olmuşuq. Azərbaycanın daxili işinə müdaxilə etməyə, ölkədə sabitliyi pozmağa, cəmiyyətdə parçalanma və qarşıdurma yaratmağa cəhd ediblər. Postsovet ölkələrinin bəzilərində Qərb öz məqsədlərinə çata bilsə də, Azərbaycanın timsalında buna nail ola bilməyiblər. Ona görə ki, bizdə dövlət güclüdür. Xalqla hakimiyyət arasında həmrəylik mövcuddur. Cəmiyətimiz stabilliyin pozulmasında maraqlı deyil. Ona görə də belə təxribatlara uymur, pozucu qüvvələrin arxasınca getmir. Baxmayaraq ki, Avropa təsisatlarının əvvəlki seçkilərdə təxribatları baş tutmayıb, bununla bağlı planları həyata keçməyib, yenə də o qaranlıq niyyətlərindən əl çəkmək istəmirlər. Bunlar anlamaq istəmirlər ki, radikal müxalifətin cəmiyyətdə sosial dayaqları çox zəifdir. Bu, danılması mümkün olmayan bir reallıqdır. Əfsuslar olsun ki, Avropa İttifaqı qurumları bu reallığı görmək, qəbul etmək istəmirlər. Müxtəlif vasitələrlə Azərbaycanın daxili işinə, sekilərə müdaxilə etməyə çalışırlar. Ancaq hesab edirəm ki, əvvəlki dövrlərdə olduğu kimi, bu dəfə də öz məqsədlərinə çata bilməyəcəklər. Bunu şərtləndirən odur ki, Azərbaycan dövləti hər zaman olduğundan daha güclüdür. Cəmiyyətimiz daha həmrəydir. Ona görə ki, Azərbaycan qalib dövlətdir. Öz ərazi bütövlüyünü və suverenliyini tam təmin edib”.
Vidadi ORDAHALLI
