Namizədlər ödənişli media təşviqatından hələ uzaq qaçır - ilginc səbəblər var...
Avqustun 9-dan etibarən deputatlığa namizədlərin təbliğat-təşviqat kampaniyası başlayıb. Namizədlərin yerli KİV-də ödənişli təbliğat kampaniyası üçün şərait də yaradılıb.
Amma deputatlığa namizədlır mediada ödənişli təşviqata hələ meyl etmir. Səbəb nədir?
Azər Həsrət: “Zaman, dövran dəyişib, alternativlər, imkanlar çoxdur, bu səbəbdən də media üzərindən ödənişli təşviqat...”
Siyasi şərhçi Azər Həsrət “Bakı-Xəbər”ə “Yəqin namizədlər buna zərurət duymurlar. Çünki Azərbaycanda seçki dairələri elə də böyük deyil. Üstəlik media, özəlliklə də çap mətbuatı hazırda seçicilər üçün əlçatan deyil. Yəni qəzetlərimizin tirajı 3-5 mindir. Təsəvvür edin ki, o da heç gedib ucqarlardakı seçki dairələrinə çıxmır. Yəni orda çap etmək effektiv deyil. Onlayn mediada da alternativlər çoxdur. Yəni pullu təşviqat aparmağa o qədər də zərurət yoxdur. O təşviqata xərclənən pulu elə özəl materiallar çap edib qapı-qapı dağıtmağa sərf etmək daha uyğundur deyə düşünürəm. Yəni ona görə də, deputatlığa namizədlər pullu təşviqata meyl etmirlər. Zaman, dövran dəyişib, alternativlər, imkanlar çoxdur, bu səbəbdən də media üzərindən ödənişli təşviqat o qədər də effektiv sayılmır”-deyə bildirdi.
Şakir Ağayev: “Təəssüflər olsun ki, namizədlər ənənəvi media üçün pul xərcləmək istəmirlər”
“Novoye vremya” qəzetinin baş redaktoru Şakir Ağayev isə “Bakı-Xəbər”ə təəssüflə bildirdi ki, deputatlığa namizədlər təbliğat-təşviqat kampaniyalarını aparmaq üçün yalnız sosial mediaya üstünlük verirlər. “Çox təəssüflər olsun ki, namizədlər çap mediasında təbliğat və təşviqat kampaniyalarını aparmırlar. Ola bilsin, telekanalların qiymətləri çox bahadır. Amma yazılı mətbuatda, qəzetlərdə və saytlarda pul verib reklam olunmaq istəmirlər. Bunun birinci səbəbi odur ki, onlar sosial mediada təbliğat kampaniyasını pulsuz aparırlar. Yaxud pul versələr də bu çox aşağı qiymətədir. İkincisi, təəssüflər olsun ki, sosial media ənənəvi medianı üstələyir. Bu, ənənəvi media üçün çox təəssüfedici haldır. Çünki sosial mediada insanlar daha çox vaxt keçirir, xüsusən də Tik-Tokda. Seçicilərini cəlb etmək üçün bu platformaları daha önəmli sayırlar. Bunlara sosial media yox, sosial şəbəkələr deyərdim, çünki onlar media ola bilməz. Yalanla, təhqirlərlə, kobud sözlərlə dolu olan, dezinformasiyalardan qurulan bir sosial şəbəkə media olmaqdan uzaqdır”.
Namizədlərin bu platformalarda özlərini reklam etdiyini deyən Ş.Ağayev qeyd etdi ki, onların fikrincə, orada baxıcı sayı daha çoxdur, bu səbəbdən də ənənəvi mediadan qaçıb bu məkanda təbliğat aparmağı üstün tuturlar. “Bu, ənənəvi mediaya bir siqnaldır. Yəni ənənəvi media artıq düşünməlidir ki, belə aşağı səviyyəli sosial şəbəkələr ənənəvi medianı üstələyib. Reklamlarını da, namizədlərin təbliğat-təşviqat kampaniyasını da orda aparmağı üstün tuturlar. Başa düşürəm, dünyada sosial şəbəkələrdən çox istifadə olunur, eyni zamanda ənənəvi mediadan da istifadə edilir. Çox təəssüflər olsun ki, bizdə namizədlər yalnız bu yolu seçiblər. Biz ənənəvi medai olaraq bunun üzərində ciddi düşünməliyik. Təəssüflər olsun ki, namizədlər ənənəvi media üçün pul xərcləmək istəmirlər, daha rahat yolla təbliğat-təşviqat kampaniyalarını aparmaq istəyirlər”-deyə bildirən Ş.Ağayev hesab edir ki, Azərbaycanda ənənəvi çap mediasının səviyyəsi hər kəsə məlumdur. Onun sözlərinə görə, namizədlərin qəzetlərdən, mediadan qaçmasının əsas səbəbi onların ödəniş etmədən sosial şəbəkələr vasitəsilə öz təbliğat-təşviqat işlərini qura bilməsidir.
İradə SARIYEVA
