Banklarımız bir ayda 141 milyon manat əmanət itiriblər, niyə?..
Kamran Məmmədli: “Banklardakı depozit gəlirlərinin fevral ayından etibarən vergiyə cəlb edilməsi də əmanətlərin həcminə təsir göstərir”
Bank sektorunda real vəziyyətin təhlili müəyyəm maraqlı məqamları üzə çıxarmaqdadır. Söhbət ondan gedir ki, bankların əsas maliyyə qaynaqlarından biri olan əmanətlərin azalması davam edir.
Bunun bank sektorunun maliyyə dayanıqlığına təsiri getdikcə əsas müzakirə predmetlərindən birinə çevrilir.
Qeyd edək ki, əhalinin banklardakı əmanətlərinin həcmində müəyyən müddətdir azalma müşahidə olunub. Son 1 ayda banklarda əmanətlərin həcmi 12 milyard 705 milyon manatdan 12 milyard 564 milyon manatadək azalıb. Bu o deməkdir ki, yalnız 1 ayda bank əmanətlərində 141 milyon manat azalma qeydə alınıb.
Ekspertlər bank əmanətlərinin azalmasını depozitlərə tətbiq edilən vergi qərarı ilə əsaslandırır. Həmçinin, cari il ərzində iki bankın bağlanması da əhalinin bu sahəyə olan inamının azalmasına səbəb olub.
“Ölkədə inflyasiyanın hökm sürdüyü indiki şəraitdə insanlar əllərindəki pulu əmanət olaraq saxlamağa deyil,..”
İqtisadçı Kamran Məmmədli “Bakı-Xəbər”ə açıqlamasında qeyd etdi ki, banklardakı depozit gəlirlərinin fevral ayından etibarən vergiyə cəlb edilməsi də əmanətlərin həcminə təsir göstərir: “Əmanətlərin həcminin azalmasında “Muğan Bank”ın müflis olmasının da rolu var. Qarşıdakı aylarda bank əmanətlərinin həcmi daha da azalacaq. Banklardakı depozit gəlirlərinin ferval ayından etibarən vergiyə cəlb edilməsi də əmanətlərin həcminə təsir göstərib”.
Ekspert onu da əlavə etdi ki, ölkədə inflyasiyanın hökm sürdüyü indiki şəraitdə insanlar əllərindəki pulu əmanət olaraq saxlamağa deyil, daha çox əmtəəyə və ya daşınmaz əmlaka sərmayə etməyə üstünlük verirlər: "İnsanlar belə olan halda daha az risk aldıqlarını düşünürlər. Düşünürəm ki, Azərbaycanda bankların və ya bank olmayan kredit təşkilatlarının təqdim etdiyi maliyyə məhsulları çox azdır. İnsanların marağını cəlb edəcək maliyyə xidmətləri təqdim olunmalıdır. Depozit faizlərinin aşağı olmasını da ayrıca qeyd etmək istərdim. Bankların təklif etdiyi əmanət faizləri 5-9 faiz arasında dəyişir, ən yaxşı halda 11 faiz təklif olunur ki, bu da yalnız bir-iki bankla məhdudlaşır".
Günel CƏLİLOVA
