Azərbaycanda ən çox müştəri narazılığı doğuran banklar... Sayları bəllidir
Əkrəm Həsənov: “Müştərilər daha çox bank kreditləri ilə bağlı narazılıq edir”
Mərkəzi Bank oktyabr ayı ərzində əhalinin narazılıq etdiyi bir neçə bankın adını açıqlayıb. Bildirilib ki, indeks bank müştərilərinə göstərilən kassa, hesablaşma, kart əməliyyatları və s. xidmətlərlə bağlı Mərkəzi Banka daxil olan şikayətlər əsasında bankların sıralamasını əks etdirir.
23 bankın olduğu siyahının ilk beşliyində Bank VTB ASC, Bank BTB ASC, Bank of Baku ASC, Accsesbank QSC və Azərbaycan Sənaye Bankı ASC yer alıb.
Qeyd edək ki, bu il ölkədə Mərkəzi Bank tərəfindən iki bank bağlanıb. Lisenziyası ləğv edilən banklar arasında “Günay Bank” ASC və “Muğan Bank” ASC yer alıb. O da məlumdur ki, hər iki bankın bağlanmasına səbəb müflis olmalarıdır.
Maraqlıdır, müştərilərin narazı qaldığı məqamlar nədir və ən çox şikayət olunan banklardan hansılar bağlana bilər?
“Banklar bəzən kredit borcunu düzgün hesablamır, vətəndaşa daha çox borc yazılır, bu da təbii olaraq narazılığa səbəb olur”
Bank sahəsi üzrə ekspert Əkrəm Həsənov “Bakı-Xəbər”ə açıqlamasında qeyd etdi ki, müştərilər daha çox bank kreditləri ilə bağlı narazılıq edir: “Banklar bəzən kredit borcunu düzgün hesablamır, vətəndaşa daha çox borc yazılır. Bu da təbii olaraq narazılığa səbəb olur. Bununla yanaşı, bank əmanətləri, kartlardan vəsaitin anidən silinməsi, pul köçürmələrilə də bağlı problem olur. Bu kimi problemlərin sayı çoxdur”.
Ekspert hesab edir ki, vətəndaşların banklardan narazı qalması onların fəaliyyətinə heç bir təsir etməyəcək. Buna görə bank bağlana bilməz. Vətəndaş şikayətində haqlıdırsa məhkəməyə müraciət edə bilər. Məhkəmə də onun iddiasını təmin edər: “Onu da deyim ki, ən çox şikayət olunan banklar vətəndaşlarla işləyənlərdir. Elə bank var ki, vətəndaşlarla az işləyir. Bu banklardan biri Paşa Bankdır. Qeyd etdiyim bank şirkətlərlə əməkdaşlığa daha çox üstünlük verir. Bu tip banklar istehlakçı ilə az işlədiyi üçün şikayət də çox olmur”.
Günel CƏLİLOVA
