Qərb COP29-da Azərbaycandan bunu gözləyir - sabiq səfir işarə verdi...
Vüqar Bayramov: “BP ilə əməkdaşlıq inkişaf edən dinamika ilə davam edəcək və ölkəmiz…”
Azərbaycan daha bir mötəbər tədbirə - BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) evsahibliyi etməyə hazırlaşır. Noyabr ayında ölkəmizin paytaxtında keçiriləcək COP29 indidən dünya ölkələrinin, nüfuzlu beynəlxalq təşkilatların diqqət mərkəzindədir.
Qeyd etdiyimiz bütün dünyanın gözü, diqqəti Azərbaycanın üzərindədir.
Böyük Britaniyanın Azərbaycan, Qazaxıstan və Qırğızıstandakı keçmiş səfiri Ceyms Şarp ölkəmizdə keçiriləcək COP29-la bağlı fikir bildirərkən qeyd edib ki, Qazaxıstan Azərbaycan üzərindən təkcə neft yox, həm də yaşıl enerji ixrac etməyi düşünür: “Mən hər iki ölkənin bərpa olunan enerji potensialını artırdığını görməkdən çox məmnunam. Böyük Britaniya səfirliyi tərəfindən maliyyələşdirilən araşdırmadan məlum oldu ki, Azərbaycanın dəniz külək enerjisi üçün böyük potensialı var. Qazaxıstan isə quruda külək və günəş enerjisindən istifadə etmək üçün böyük imkanlar olan nəhəng əraziyə malikdir. Ümid edirəm ki, həm Azərbaycan, həm də Qazaxıstan bu il COP29-da öhdəliyini götürəcək”.
Maraqlıdır, qərb xüsusilə Böyük Britaniya Azərbaycanda COP29-da hansı öhdəlikləri gözləyir?
“Yaxın vaxtlarda Xəzərin yaşıl enerjisi Avropa bazarına çıxarıla bilər”
Millət vəkili Vüqar Bayramov “Bakı-Xəbər”ə açıqlamasında qeyd etdi ki, bir sıra aparıcı ölkələr Xəzər dənizi yaşıl enerjisinin Avropa İttifaqından çıxarılmasında maraqlı olduğunu nümayiş etdirir. Bu müsbət haldır: “Azərbaycan, Qazaxıstan və digər ölkələrlə əməkdaşlıq gücləndiriləcək. Bu konteksdən həm Qazaxıstan və Azərbaycanın kifayət qədər böyük yaşıl enerji potensialı var. Məlumdur ki, hər iki ölkənin külək və günəş enerji potensialı imkanları genişdir. Bəllidir ki, BP uzun müddətdir ki, Azərbaycanda strateji əməkdaşlıq edir. Bununla yanaşı, BP Azərbaycana yaşıl enerji investisiya qoyuluşlarını həyata keçirir. Bu səbəbdən də hesab edirəm ki, məlum əməkdaşlıq inkişaf edən dinamika ilə davam edəcək”.
V.Bayramov hesab edir ki, yaxın vaxtlarda Xəzərin yaşıl enerjisi Avropa bazarına çıxarıla bilər. Bu da ölkəmiz üçün olduqca əhəmiyyətlidir.
Həmsöhbətimizin sözlərinə görə, COP dünyanın ən böyük tədbirlərindən hesab olunur. COP29 da bu kontekstdən fərqlənən tədbir olacaq: “Azərbaycanın belə bir mötəbər tədbirə ev sahibliyi etməsi ölkəyə yerli, regional və beynəlxalq miqyasda çox böyük dividendlər qazandıracaqdır. İqtisadi inkişaf startegiyasına əsasən postneft dövündə iqtisadiyyatın əsas istiqamətlərindən biri turzim sektoru olacaq. Bütövlükdə COP29 Azərbaycan üçün həm siyasi, həm iqtisadi baxımdan vacib tədbirlərdəndir. Ona görə də bu, ölkəmiz üçün strateji əhəmiyyət daşıyan tədbir hesab olunur".
Günel CƏLİLOVA
