Brüsseldə silahlı hücuma məruz qalan diplomatımız danışdı - Bıçaqla hədələyərək...
Azərbaycan Respublikasının NATO yanında Nümayəndəliyinin başçısı Cəfər Hüseynzadə və həyat yoldaşı Brüsseldə soyğunçuluğa məruz qalıblar. Bu barədə Brüsselin "Sudinfo La Capitale" nəşri məlumat yayıb.
Nəşr yazıb ki, hadisə Brüsseldəki Stefani meydanının yaxınlığında baş verib. Azərbaycanlı diplomat xanımı ilə icarəyə götürdüyü skuterdə olan zaman iki nəfər şəxs revolverin qundağı ilə onların başına vurub. Daha sonra onlara məxsus 90 min avro dəyərində iki ədəd "Rolex” saatını oğurlayıblar. Qeyd edilir zərərçəkənlər xəstəxanaya çatdırılıb. Brüssel Prokurorluğu araşdırmalara başlayıb.
Avqustun 5-də Brüsseldə qarət məqsədilə ona və həyat yoldaşına hücumu KİV-ə şərh edən Azərbaycanın NATO-dakı səfiri Cəfər Hüseynzadə deyib ki, yaşadıqları binaya girərkən iki naməlum şəxsin hücumuna məruz qalıblar.
"5 avqust tarixində məzuniyyətdə olarkən Brüssel vaxtı ilə saat 15:00-da Belçikada yaşadığım evin qarşısında mən və xanımım naməlum iki nəfər tərəfindən hücuma məruz qaldıq. Bu şəxslər biz binanın girişindən içəri girərkən zorla içəri soxularaq, bizi silah və bıçaqla hədələyərək, üzərlərimizdəki əşyaların onlara verilməsini tələb etdilər.
Onlar xanımımın çantasını və qollarımızdakı "Rolex" model saatları götürərək, bizə yüngül xəsarət yetirərək ərazidən kənarlaşdılar. Polis dərhal əraziyə gələrək, hadisənin araşdırılmasına başladı. Polis tərəfindən verilmiş məlumata əsasən hal-hazırda cinayətkarların məsuliyyətə cəlb edilməsi məqsədilə müvafiq istintaq tədbirləri davam etdirilir.
Həmçinin qeyd edim ki, Belçika mətbuatında yaşadığımız binanın şəkillərinin dərc olunması təhlükəsizlik səbəbindən qəbuledilməzdir. Qarət edilən saatlarımızın qiymətinin mətbuatda hədsiz dərəcədə və dəfələrlə şişirdilməsi də təəssüf doğurur. Bizə məxsus saatlar "Rolex" markalı olsa da, onlar metalik və sadə modellər olub. Bu hücum hadisəsi barədə həmçinin Belçika tərəfinə rəsmən səfirliyimiz tərəfindən müraciət edilib və diplomatların toxunulmazlığının təmin olunması və onlara qarşı bu kimi hücumların qarşısının alınması üçün Diplomatik əlaqələr haqqında Vyana Konvensiyası çərçivəsində tədbirlər görülməsi tələb olunub", - deyə diplomat bildirib.
ZÜMRÜD
