“2023-ün sentyabrında Türkiyə və Azərbaycanın arasında gərginlik var idi” - “Xankəndini tuta bilərdilər”
İlyas Hüseynov: "Türkiyə ilə Azərbaycan arasında olan dostluq, qardaşlıq, hərbi müttəfiqlik münasibətlərini də Ermənistan tərəfi zədələməyə çalışır"
Ermənistanda istər hakimiyyətdə olan qüvvələr, istərsə də müxalifət təmsilçiləri mütəmadi olaraq Azərbaycan-Türkiyə münasibətlərini hədəfə almaqla, boş, cəfəng iddialar ortaya atmaqla suyu bulandırmaqla məşğuldurlar.
Növbəti əsassız fikirlərlə Ermənistanın müxalif "Şərəfim var" fraksiyasının katibi Tiqran Abramyan çıxış edib. T.Abramyanın erməni mətbuatında yayımlanan iddiasına görə, Türkiyə qoşunları 2023-cü ilin sentyabrında atəşkəs razılaşmasından sonra guya Xankəndini tutmağa cəhd edib. Belə rəy yaratmaq istəyir ki, guya 2023-cü ilin sentyabrında Azərbaycanla Türkiyə arasında gərginlik olub.
Bugünlərdə Türkiyə Prezidenti Rəcəb Tayyib Ərdoğanın AKP-nin Rizə təşkilatının tədbirində çıxışı zamanı İsrailin ünvanına "Biz Qarabağa, Liviyaya necə girdiksə, eynisini onlara da edərik" fikrinə öz aləmində şərh verən Abramyan Türkiyə Prezidentinin bəyanatını ermənisayağı şərh edib.
O iddia edib ki, guya Türkiyə təkcə 44 günlük müharibədə birbaşa iştirak etməyib, həm də sonradan "Artsaxın" "işğal olunmuş" ərazilərində hərbi mövcudluğunu təmin edib.
"Zahirən Türkiyənin varlığı Ağdamda Rusiya-Türkiyə monitorinq mərkəzi kimi təqdim edilirdi, lakin bu, türk qoşunlarının mövcudluğunun formal hissəsi idi.
2020-ci il müharibəsindən sonra Türkiyə Şuşa və Kaşatağda çevik reaksiya deyilən funksiyaları daşıyan komando briqadaları yerləşdirdi"-deyə sərsəmləyən Abramyan iddia edib ki, Türkiyə qoşunları da guya 2023-cü ilin sentyabrında "hücumda" "fəal iştirak edib" və atəşkəs razılaşmasından sonra Xankəndi şəhərini "işğal etməyə cəhd etsə də, ağır itki verərək geri çəkilib".
Abramyan deyib ki, guya Azərbaycan Silahlı Qüvvələrinin komandanlığının əmri ilə deyil, birbaşa Türkiyə Baş Qərargahının göstərişi ilə hərəkət ediblər. Guya buna görə də Türkiyə ilə Azərbaycan arasında müəyyən "gərginlik yaranıb". "Nəhayət ki, iki ölkə liderləri arasında telefon danışığından sonra məsələ həll olunub"-deyə Abramyan sərsəmləyib.
"Ermənistan tərəfin hazırkı fürsətdən istifadə edərək müxtəlif şaiyələri ictimai rəyə təqim etmək cəhdləri də fiaskoya uğrayacaq və heç bir nəticə verməyəcək"
Abramyanın cəfəng iddialarına münasibət bildirən politoloq İlyas Hüseynov "Bakı-Xəbər"ə şərhində "Hazırda Azərbaycan və Ermənistan arasında sülh müqaviləsinin mətni ilə bağlı müzakirələr getdiyi fonda irəli sürülən iddialar, müxtəlif fikirlər ümumilikdə təhlükəsizlik sisteminə təsir göstərir. Ermənistan tərəfin həm iqtidarda, həm də müxalifətdə olan qüvvələrinin fikirləri ümumilikdə təhlükəsizlik sisteminin qurulması əleyhinədir. Digər tərəfdən qeyd etməliyəm ki, Türkiyə ilə Azərbaycan arasında olan dostluq, qardaşlıq, hərbi müttəfiqlik münasibətlərini də Ermənistan tərəf zədələməyə çalışır. Bir yandan Türkiyə ilə Ermənistan arasında sərhədin açılmasına dair görüşlər keçirilir. Bu görüşlərdə bir sıra razılaşmalar əldə olunur, həm diplomatik pasporta malik olan şəxslərin, həm də üçüncü dövlətə aid olan şəxslərin "Marqara" sərhəd məntəqəsindən keçidi ilə bağlı məsələlər müzakirə olunur, digər tərəfdən də Ermənistan arxada qalan bir sıra məsələləri qabardaraq onu təhrif edilmiş formada təqdim edərək öz məqsədlərinə çatmağa çalışır. Mənə elə gəlir ki, bu yanaşmalar tamamilə yolverilməzdir və həm Vətən müharibəsində, həm də lokal xarakterli antiterror tədbirləri zamanı Azərbaycana siyasi və mənəvi dəstək verdi. Belə də olmalı idi. Çünki biz bir millət, iki dövlətik, bizim vahid mövqeyimiz var"-deyə bildirdi.
İ.Hüseynov qeyd etdi ki, Azərbaycanın milli maraqları və mənafeləri Türkiyə üçün müstəsna əhəmiyyət kəsb edir və siyasi gündəlikdə prioritet olan bir məsələdir. "Lakin bu da danılmaz həqiqətdir ki, Azərbaycan öz gücü, ordusu, iqtisadiyyatı, xalqın Ali Baş Komandan ətrafında birləşməsi hesabına öz torpaqlarını işğaldan azad edib. Azərbaycan xüsusi təyinatlıları çox böyük bir şücaət yolu keçiblər və bununla bağlı dünyanın aparıcı hərbi məktəblərində, hərbi dərsliklərində bu xüsusi vurğulanır. Ona görə də, Ermənistan tərəfin hazırkı fürsətdən istifadə edərək müxtəlif şaiyələri ictimai rəyə təqdim etmək cəhdləri də fiaskoya uğrayacaq və heç bir nəticə verməyəcək"-deyə İ.Hüseynov qeyd etdi.
İradə SARIYEVA
