“Una əhəng qatılır" iddiaları sürətlə yayıldı...
Gündəlik tələbat məhsullarından olan çörəklə bağlı da vəziyyət acınacaqlıdır. Bakıda istehsal olunan çörək və çörək məhsullarının keyfiyyəti ilə bağlı mediada yayılan məlumatlar da buna sübutdur. Çörəyin içindən yad əşyanın (dəmir parçası, ip və s.) çıxması ilə bağlı xəbərlərlə demək olar ki, vaxtaşırı rastlaşırıq.
Bu kimi neqativ hallar Bakıda fəaliyyət göstərən ən xırda çörək sexindən tutmuş, ən nüfuzlu fabrik və zavodların istehal etdiyi çörəklərdə müşahidə olunub. Ən ciddi problemlərdən biri də çörəkbişirmə prosesində istifadə olunan un və qatqı maddələri ilə bağlıdır. Bu günlərdə sosial şəbəkədə unun tərkibinə əhəng qatılması ilə bağlı video görüntü yayılıb. Hərçənd bir çox hallarda un məhsulları ilə bağlı problem aşkarlanıb. Ancaq əhəng kimi bir maddənin unun tərkibinə qarışması olduqca narahatedicidir, çünki istehlakçı bunu ayıra bilməz.
Elxan Əliyev: "Əhəng insan orqanizmi üçün zərərlidir"
Sosial sahə üzrə ekspert Elxan Əliyev "Bakı-Xəbər"ə açıqlamasında qeyd etdi ki, unun ağardılması, yapışqanlığının artırılması, ondan hazırlanan çörəyin gec boyatlaması və s. məqsədlər üçün tərkibinə müxtəlif kimyəvi qatqılar vurulur: "Buraya Vitamin C, dəmir mineralı, xörək duzu kimi təhlükəli olmayan və ya faydalı qatqılarla yanaşı insan orqanizminə təhlükə yaradan qatqılar da daxildir. Məsələn, unun ağardılması üçün Benzoil peroksid adlı E928 ilə markalanmış kimyəvi maddədən istifadə edilir ki, bu maddə də ciddi allergiya törədən xüsusiyyətə malikdir. Və ya bu cür markalanmış çoxsaylı maddələr, hətta heyvan tükündən hazırlandığı bildirilən maddələrin qatılması haqqında da məlumatlar verilir. Unun tərkibinə əhəng qarışdırılırsa, bununla bağlı fakt varsa həmin məlumat araşdırılmalıdır. Nəzərə almaq lazımdır ki, əhəng insan orqanizmi üçün zərərlidir".
Ekspert onu da əlavə etdi ki, unun tərkibinə qatılan bəzi maddələr insan səhhəti üçün ziyanlıdır: "Son zamanlar unun tərkibinə bir çox maddələr qatılır. Bunun səbəbi isə çörəyin tərkibini zənginləşdirmək, qidalılıq dəyərini və saxlanma vaxtını artırmaqla bağlıdır. Amma əslində yaxşı üsulla üyüdülmüş təbii buğdanın bu kimi qatqılara ehtiyacı yoxdur. Yəni buradakı əsas məsələ üyüdülmə prosesinin düzgün aparılmasıdır. Belə ki, elektrik dəyirmanları buğdanın tərkibini yandırır. Ona görə son zamanlar çörəklərdən alışdığımız əvvəlki ətri, qoxunu ala bilmirik. Unun tərkibinə hansısa maddələri əlavə etməkdənsə, üyüdülmə texnologiyasını araşdırsalar, daha yaxşı olar".
Eyyub Hüseynov: "Əhəng insan orqanizmi üçün arzuolunmaz komponentdir və bu..."
Azad İstehlakçılar Birliyinin sədri Eyyub Hüseynov "Bakı-Xəbər"ə şərhində bildirdi ki, unun tərkibinə əhəngin qarışdırılması istisna olunur: "Çünki ərzaq mallarının hamısı Qida Təhlükəsizliyi Agentliyinin ciddi nəzarəti altındadır. Düzdür, mənə illər boyu məlumat gəlir ki, una hər hansısa başqa bir ağ maddə qarışdırılır, hətta onun İrandan gətirildiyini iddia edirlər. Bu, ola bilər ki, unun yapışqanlığını artırmaq üçün hansısa bir maddədir. Ancaq əhəng insan orqanizmi üçün arzuolunmaz komponentdir və una qarışdırıla bilməz".
Günel CƏLİLOVA
