Fransa azərbaycanlıların insan haqlarını kobudcasına pozdu - cavabını artıqlaması ilə aldı...
2024-cü il Paris Yay Olimpiya Oyunlarının açılış mərasimində Azərbaycanda haqlı narazılıqlara səbəb olan insident baş verib. Fransanın "France 2" telekanalında canlı yayımda aparıcılar Azərbaycan idmançılarına qarşı təxribat xarakterli açıqlamalar veriblər.
Erməni komandasının keçidi zamanı kanalın aparıcılarından biri öz simpatiyasını gizlədə bilməyib:
"Ermənistan, bizim erməni dostlarımız, tarixən fransızların ürəyinə yaxın bir ölkə".
Aparıcı, həmçinin, Qarabağdakı qondarma rejimin tarixdən silinməsi ilə bağlı təxribatçı fikirlər səsləndirib. Bu sözlər Azərbaycan və Ermənistan idmançılarının keçidi kontekstində deyilib və bu da Azərbaycan ictimaiyyətinin mənfi reaksiyasına səbəb olub.
Bunun ardınca Azərbaycan komandasının keçidi zamanı aparıcı ölkəmizi "Ermənistanla ərazi məsələsində münaqişədə olan Qafqaz respublikası" kimi təqdim edib. Bu isə, öz növbəsində, şərhçinin Ermənistan komandası ilə bağlı fikirlərinə münasibətdə kəskin ziddiyyət təşkil edib və qərəzli olmasını göstərib.
Tarixən Olimpiya Oyunları həmişə sülhə və müharibəyə son qoymağa çağırıb. Lakin Fransa televiziya kanalı siyasi qərəz nümayiş etdirərək Olimpiya prinsiplərini pozdu. Sual yaranır: niyə Fransa komandası keçəndə müstəmləkəçilik mövzularının adı çəkilmir? Parisin əsrlər boyu başqa xalqlara verdiyi bütün ağrılar xatırladılmır?
Rəsmi Bakı, çox güman ki, olimpiya prinsiplərinin kobud şəkildə pozulması ilə bağlı Beynəlxalq Olimpiya Komitəsinə (BOK) şikayətlə müraciət edəcək… Ölkəmiz, çox güman ki, Parisdən narazılığını həmçinin diplomatik kanallar vasitəsilə də bildirəcək.
İki dövlət qurumu və QAİ Azərbaycana qarşı təxribatla bağlı bəyanat yaydı
Fransanın etdiyi bu qərəzlə addımla bağlı Azərbaycanın rəsmi qurumları etiraz bəyanatı yayıblar. Gənclər və İdman Nazirliyi ilə Milli Olimpiya Komitəsinin Paris Olimpiadasında Azərbaycana qarşı təxribatla bağlı bəyanatında deyilir ki, bu, faktiki olaraq Olimpiya Xartiyasının Əsas Prinsiplərinin pozulmasıdır. Bu cür təbliğat oyunların ruhuna zidd olmaqla yanaşı, Azərbaycan və Ermənistan arasında sülh səylərini pozmağa xidmət edir. Buna görə də BOK-dan Paris-2024 Olimpiadası zamanı idmanın siyasiləşdirilməsinə qarşı qəti mövqe göstərilməsi, açıq bəyanat verməklə Fransa hökumətinə, Fransa Milli Olimpiya və İdman Komitəsinə, eləcə də adıçəkilən telekanala etiraz bildirilməsi tələb edilib.
Qərbi Azərbaycan İcmasının bəyanatında isə bildirilir ki, “France 2” ictimai televiziya kanalının aparıcısı Ermənistanın və Azərbaycanın komandalarını təqdim edərkən ayrıseçkilik xarakteri daşıyan, olimpiya dəyərlərinə və beynəlxalq hüquqa zidd siyasi bəyanatlar səsləndirib: “Fransa hökumətinin sifarişi ilə atılması şübhə doğurmayan bu addımla Azərbaycanın ərazi bütövlüyünə xələl gətirilməyə və bölgədə gərginliyi qızışdırmağa cəhd edilib”.
Qeyd olunub ki, olimpiadanın açılış mərasimində milyardlarla insanın heysiyyətinə toxunan rəzalət nümayişlərini də nəzərə alsaq, Fransa tərəfinin rasionallığı tamamilə şübhə altındadır. Qərbi Azərbaycan İcması 2024-cü il Paris olimpiadasında Azərbaycana qarşı yol verilmiş təxribatı sərt şəkildə qınayıb və Fransadan bu əməllərinə son verməyi tələb edib.
Olimpiada, yoxsa nifrət, kin təbliği?..
Olimpiada miqyasına görə ən böyük idman bayramıdır. Olimpiada dostluq, birlik, həmrəylik və barış aksiyasıdır. Bu mənada on minlərlə idmançının müxtəlif idman növləri üzrə mübarizə apardığı bu böyük idman bayramına siyasi nifrət qatmaq, onun tribunasından irqi, dini ayrıseçkilik təbliğ etmək, əlbəttə ki, yolverilməzdir. Bu, eyni zamanda insan haqlarının kobud şəkildə pozulmasıdır.
Son illərin hadisələri deməyə əsas verir ki, köhnə və “təcrübəli” müstəmləkəçi Fransadan bundan artıq nəsə gözləmək sadəlövhlük olar. Lakin Olimpiada kimi böyük bir idman tədbirini siyasi manipulyasiyalar arenasına çevirmək, əlbəttə ki, yolverilməzdir. Olimpiya idman prinsiplərinin kobudcasına pozulmasına görə yəqin ki, Azərbaycan lazımi addımlar atacaq.
Bəli, Paris artıq “sevgi, moda, arzular və romantika şəhəri” deyil, sadəcə dünyaya kin, qorxu və nifrət püskürən Fransanın paytaxtıdır.
Fransanın təşkilatçılıqla bağlı da ciddi problemləri var və bütün bunlar yarışların çox çətin, problemli keçəcəyindən xəbər verir. Açılış mərasimi həm texniki, həm də yaradıcı tərəfdən çox uğursuz idi. Eyni zamanda Azərbaycana qarşı qərəzli hərəkətlə onlar insan haqlarını da pozmuş oldular. Bunların fonunda bəzi çağırışlar, mesajlar, təhqirlərin mövcud olması vəziyyəti daha da gərginləşdirir. Beynəlxalq media və idman mətbuatı dünəndən bu hadisələrdən yazır. Fransa böyük bir fiasko ilə üz-üzədir. Olimpiya kəndindən dayanmadan şikayətlər edilir. Çünki orada yemək, yataqla bağlı problemlərin olması idman zallarının uzaqda yerləşməsi idmançılar üçün ciddi problem yaradır.
Azərbaycan bu cür haqsızlıqlara çox məruz qalıb, amma əsassız ittihamların cavabı meydanda verilib. Arzu edək ki, idmançılarımız tamamilə yarışa fokuslanacaq və cavab yenə meydanda veriləcək.
Məhəmmədəli QƏRİBLİ
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
