Seçkidən sonra Azərbaycan-ABŞ münasibətləri dəyişəcək - Əliyevin proqnozu...
Qabil Hüseynli: “ABŞ-ın uzunmüddətli strategiyaları bir seçki ilə dəyişməyəcək”
Prezident İlham Əliyev “Yalan məlumatların ifşası: Dezinformasiyaya qarşı mübarizə” mövzusunda 2-ci Şuşa Qlobal Media Forumunda çıxışında deyib ki, biz bəzən açıq ictimai şəkildə, bəzən də pərdəarxası mesajlarımızı veririk:
“Deyirik ki, Cənubi Qafqazda Azərbaycanın maraqları təmin edilməlidir, kimsə bizim maraqlarımızı görməzdən gəlməyə çalışsa, əlbəttə ki, onlar yanılacaq və uğursuzluğa düçar olacaqlar. Mən səmimi deyirəm ki, anti-Azərbaycan fəaliyyətin (ABŞ-da – red.) bir hissəsi prezident seçkiləri ilə bağlıdır. Onlar ermənilərin səslərini istəyirdilər, onlar onu təmin etmək istəyirdilər. Zənnimcə, bu mənim fikrimdir ki, bəlkə də məqsəd məhz bundan ibarət idi”.
Prezident seçkilərdən sonra Vaşinqtonda və Avropada Azərbaycan, bizim potensialımız, bizim rolumuz haqqında daha yaxşı anlayışın olacağına ümid etdiyini vurğulayıb.
ABŞ-dakı seçkidən sonra Azərbaycan-ABŞ münasibətləri daha da yaxşılaşa bilərmi?
Politoloq Qabil Hüseynli “Bakı-Xəbər”ə açıqlamasında bildirdi ki,
Prezident Əliyev Donald Trampın hakimiyyəti dönəmində müharibələrin məhdud olduğunu bildirib və onun təmsil etdiyi ənənəvi dəyərlərə müsbət yanaşdığını ifadə edib: “Co Baydenin prezidentliyə namizədliyini geri götürməsi vitse-prezident Kamala Harrisin namizədliyinin irəli sürülməsi seçkinin mahiyyətini dəyişməyəcək. Yenə də favorit Trampdır. ABŞ-ın seçki tarixində ilk dəfədir ki, prezidentliyə namizəd öz namizədliyini geri götürür və onun yerinə vitse-prezidentin namizədliyi irəli sürülür.
Harrisin prezident seçilməsi ehtimalı çox yüksək deyil. Hətta o seçilsə belə, onun prezident olması ABŞ-Azərbaycan münasibətlərinə ciddi təsir etməyəcək. Harrisin hakimiyyətə gəlməsi o demək olacaq ki, Bayden hakimiyyətinin kursu davam edəcək. Demokratların Azərbaycana münasibəti həmişə Respublikaçıların münasibətilə müqayisədə sərin olub. ABŞ-Azərbaycan münasibətləri Respublikaçıların hakimiyyətdə olduqları zamanlarda daha yaxşı olub. Bir neçə həftə öncə Azərbaycan Prezidenti İlham Əliyev ABŞ-ın müstəqillik günü münasibətilə Co Baydenə göndərdiyi məktubda iki ölkə arasında münasibətlərin xüsusi əhəmiyyət kəsb etdiyini bildirib. Düşünmürəm ki, hansısa dəyişikliklər və yaxud eyni administrasiyanın davam etməsi ABŞ-Azərbaycan münasibətlərinə çox ciddi bir təsir göstərəcək.
ABŞ, adətən, seçkiqabağı dövrdə xarici siyasətdə, əsasən, strateji müttəfiqlərinin rolunu artırır. Burada Türkiyə ilə yaxınlaşmanı da müşahidə edirik. Bunun fonunda Azərbaycan ilə də müəyyən dərəcədə normallaşma baş verir. Seçkidən sonra bu, daha yaxşı bəlli olacaq. ABŞ-ın uzunmüddətli strategiyaları bir seçki ilə dəyişməyəcək. Trampın seçilmə şansı daha çoxdur. Onun prezidentliyi dönəmində isə münasibətlər bundan da yaxşı olacaq”.
Məhəmmədəli QƏRİBLİ
