Pakistanda İmran Xanı məhkəmədə qorumaq üçün xüsusi polis bölməsi yaradıldı
Pakistanda dövlət sirri barədə qanunu pozmaqda ittiham olunan ölkənin sabiq Baş naziri İmran Xanı məhkəmə iclasında qorumaq üçün xüsusi polis bölməsi formalaşdırılıb.
“Dawn” qəzeti yazır ki, müxalif “Ədalət Uğrunda Hərəkat” partiyasının lideri İmran Xanın həyatına təhlükə ilə bağlı gücləndirilmiş təhlükəsizlik tədbirləri görülüb.
Dinləmələr İslamabad şəhərindəki Federal Məhkəmə Kompleksində keçiriləcək. İmran Xan məhkəməyə zirehli avtomobillər də daxil olmaqla, maşın karvanının müşayiəti ilə gətiriləcək. Kompleksə gedən yollara polis kontingenti yerləşdiriləcək. Federal məhkəmə kompleksinə yaxın ərazidə nəqliyyatın hərəkəti məhdudlaşdırılacaq.
Bir müddət öncə Pakistan paytaxtının Ali Məhkəməsi ölkənin sabiq Baş naziri İmran Xana və sabiq xarici işlər naziri Şah Mahmud Qureşiyə qarşı məhkəmə prosesini qanunsuz və etibarsız elan edərək onların açıq dinləmələrdə mühakimə olunmasına göstəriş verib.
İmran Xana qarşı təhqiqat onun 2022-ci il martın 27-də Pakistanın Vaşinqtondakı səfirindən şifrəli teleqram aldığını elan etməsindən sonra başlayib. Sabiq Baş nazirin sözlərinə görə, ABŞ nümayəndələri diplomatik missiyanın rəhbəri ilə söhbətində 2022-ci ilin fevralında Moskvaya səfəri zamanı nümayiş etdirdiyi Rusiya yönümlü mövqeyinə görə hökumət başçısının hakimiyyətdən uzaqlaşdırılmalı olduğunu tövsiyə edib.
Qeyd edək ki, İmran Xan 2022-ci ilin aprelində parlamentin aşağı palatasının etimadsızlıq səsverməsi nəticəsində Baş nazir postundan kənarlaşdırılıb. Bu vəzifədə İmran Xanı əvəzləyən Pakistan Müsəlman Liqasının sədri Şahbaz Şərif Birləşmiş Ştatların ölkədə rejim dəyişikliyinə heç bir təsir göstərmədiyini deyib.
