Bakıda insanları intihara sövq edən kofe içkisinin kütləvi satışı başlayıb...
Aydın Xan Əbilov: “Vətəndaşları intihara təhrik edən qəhvə-köşklər çox uğursuz reklamdır”
Bakıda sakinləri ölümə səsləyən kofe-köşklər fəaliyyətə başlayıb. Belə köşklər paytaxtın Yasamal rayonunda fəaliyyət göstərir. Məlumata görə, həmin səyyar satış məntəqəsi artıq şəbəkə şəklində fəaliyyət göstərir. Köşkün üzərindəki yazıları diqqətlə oxuduqda görünür ki, paytaxtın mərkəzi, ən işlək küçələrindən biri, üstəgəl gənclərin, tələbələrin ən çox istifadə etdiyi ərazidə intiharın təbliğatı ilə məşğul olunur.
Menyuda müştərilərə təqdim edilən içki "intihar kofe" adlandırılıb. "Arauşağı" adı altında fəaliyyəti göstərən qəhvə şəbəkəsinin köşkə müştəri cəlb etmək üçün seçdiyi uğursuz şüar isə "bu gün intihar edim, yoxsa kofe içim?" olub.
“İstər milli-mənəvi dəyərlər, istər dini, istərsə də qanunvericilik baxımından insanların intihara təhrik edilməsi qadağandır”
Məlum məsələ ilə bağlı fikir bildirən Yeni Yazarlar və Sənətçilər İctimai Birliyinin sədri, kitabxana.net – Mir Cəlal Paşayev adına Milli Virtual Kitabxananın təsisçisi, Prezident təqaüdcüsü, yazıçı-kulturoloq Aydın Xan Əbilov “Bakı-Xəbər”ə şərhində bildirdi ki, istər milli-mənəvi dəyərlər, istər dini, istərsə də qanunvericilik baxımından insanların intihara təhrik edilməsi qadağandır: “Yasamal rayonunda vətəndaşları intihara təhrik edən qəhvə köşklər çox uğursuz reklamdır. Reklam mətnində qeyd edilir ki, “intihar etməkdənsə kofe iç”. Mənasız kampaniyadır. Bu işlə aidiyyəti qurumlar məşğul olmalıdır. Ümumiyyətlə, intihar, ölümə, qana çağırışla bağlı qanunvericilikdə sərt cəzalar tətbiq edilir. Nəzərə almaq lazımdır ki, bizim coğrafi məkanda yerləşən insanların beyni yüklüdür. Əbəs yerə bizə “qanı qaynar qafqazlı” deyilmir. Bu səbəbdən də intihar, qətl, ölümə çağırışlar edilməməlidir. İntihar sosial – psixoloji bəladır. Danılmaz faktdır ki, son illər dünyada və ölkəmizdə intiharlar artır. Ailəsində problemi olan, maddi gəliri olmayan, imtahandan kəsilən şəxslər arasında intihar edənlər az deyil. Belə olan halda bu cür piarların aparılması düzgün deyil. Bu cür kampaniyalara etiraz edilməlidir. Ümumiyyətlə, mənfi təzahürlərə qarşı aparılan hər bir addım sərt olmalıdır. Onu da nəzərə almaq lazımdır ki, illərdir ermənilər Azərbaycana qarşı qan, ölüm davası aparıb. Indinin özündə də bəzi ərazilərimiz ermənilər tərəfindən minalanıb. Mina qurbanlarının sayı günü-gündən artır. Bununla yanaşı, yol qəza hadisələrinin də sayı artır. Öz iradəsinə hakim ola bilməyib canına qəsd edənlər də az deyil. Belə bir məqamda intiharın təbliğ edilməsi, reklamının aparılması insanları qıcıqlandırır”.
Günel CƏLİLOVA
