Dil-ədəbiyyat müəllimlərini "bəladan" qurtarmağın asan yolu var...
![Image](/uploads/posts/2024-07/muellimler.webp)
Cavanşir Əliyev: “Bu gün işsiz müəllimlər arasında savadlı kadrlar da var”
Xəbər verdiyimiz kimi, müəllimlərin işə qəbulu (MİQ) üzrə müsabiqənin test imtahanı mərhələsi keçirilib. Müsabiqənin test imtahanı mərhələsində ümumilikdə 61 000-ə yaxın namizəd iştirak edib. Müsabiqədə iştirak edənlər arasında razı olanlarla yanaşı, narazılar da var. Narazılar arasında Azərbaycan dili və ədəbiyyat müəllimləri də var.
Ekspertlər hesab edir ki, vakansiya sayı az olduğu üçün rəqabət də artır. Qeyd edək ki, müsabiqədə müəyyən sayda vakant yer uğrunda minlərlə müəllim iştirak edir və Azərbaycan dili və ədəbiyyatı müəllimləri üstünlük təşkil edir. Onu da nəzərə almaq lazımdır ki, vakansiya az olanda kənarda qalan savadlı müəllimlərin sayı da çox olur. Bu səbəbdən də təklif edilir ki, imtahan suallarını çətinləşdirməklə bərabər, Azərbaycan dili və ədəbiyyat müəllimləri üçün vakant yerlərin sayı artmalıdır.
“Orta məktəblərdə vakant yerlərin gizlədilməsinin qarşısını almaq lazımdır”
Təhsil eksperti Cavanşir Əliyev “Bakı-Xəbər”ə şərhində bildirdi ki, heç bir ölkənin təhsilinin səviyyəsi müəlliminin səviyyəsindən artıq deyil: “Müəllimlərin test tapşırıqlarının ağırlıq səviyyəsi ilə bağlı şikayət etməsi heç bir düşüncəyə sığmır. Müəllimlərin bir çoxu öz üzərində işləmir. Nəticənin belə olması təbiidir. Müəllim insan kapitalını yetişdirir. Onun peşəkarlığı ən üst səviyyədə olmalıdır. Müəllimin tədris etdiyi fənlə bağlı ən elementar sualı bilməməsi təəssüf doğurur. Onların bu prosesdən şikayət etməsi, sualların çətin olduğunu deməsi absurddur. Çətin odur ki, onu bilmirsən”.
Həmsöhbətimiz onu da əlavə etdi ki, bu gün işsiz müəllimlər arasında savadlı kadrlar da var. Onlar həyəcandan, stresdən suallara düzgün cavab verə bilməyiblər: “Həmçinin, az bal fərqi ilə kəsilən müəllimləri də nəzərə almaq lazımdır. Savadlı müəllimlərin kənarda qalmasının səbəblərindən biri də vakansiyanın az olması ilə bağlıdır. Orta məktəblərdə vakant yerlərin gizlədilməsinin qarşısını almaq lazımdır”.
Günel CƏLİLOVA