Özbəkistandan pambıq emalı sənayemizə 90 milyon manat yatırım - İmişlidə "günəş doğur"…
Akif Nəsirli: “Pambıq yağı texnologiyasının ölkəmizdə inkişafı müsbətdir”
Özbəkistana məxsus "Tukımachı Sanoat Tekstıl" MMC Azərbaycanda 5 müəssisənin yaradılmasına 92,5 milyon manat investisiya yatıracaq. Bununla bağlı İmişlidə müqavilə imzalanıb.
Müqaviləyə İmişli Rayon İcra Hakimiyyətinin başçısı Elçin Rzayev və "Tukımachı Sanoat Tekstıl"in Azərbaycanda yaratdığı "TST Textile Group" MMC-nin rəhbəri Rahib İsayev imza atıb. Sənəd İqtisadiyyat Nazirliyi yanında İqtisadi Zonaların İnkişafı Agentliyinin idarəçiliyində olan, İmişlidə yerləşən aqroparkın 5 826 hektar təsərrüfat sahəsinin Özbəkistan şirkətinin uzunmüddətli istifadəsinə verilməsini nəzərdə tutur.
Şirkət ilkin olaraq 28,7 milyon manat investisiya qoyaraq ərazidə pambıq sahəsi salacaq, 2025-2029-ci illərdə isə pambıq emalı zavodu, iplik, toxuculuq və tikiş fabrikləri, həmçinin pambıq yağı zavodu quracaq. Pambıq emalı və yağı zavodları aqroparkın, iplik, toxuculuq və tikiş fabrikləri isə Mingəçevir Sənaye Parkının ərazisində yaradılacaq. Layihənin icrası nəticəsində 1 130 yeni iş yerinin yaradılması planlaşdırılır.
“Özbəkistanın pambıqçılığın inkişafı ilə bağlı ölkəmizlə əməkdaşlığı təqdirəlayiqdir”
Müəssisələrin yaradılmasına özəl kapitalla yanaşı, Azərbaycan-Özbəkistan İnvestisiya Fondunun da vəsait ayıracağı gözlənilir. Beləliklə, ölkədə pambıqçılıq sahəsində ilk dəfə Özbəkistan təcrübəsi əsasında klasterləşmə formalaşacaq. Məsələ barədə fikir bildirən Liberal İqtisadçılar Birliyinin sədri Akif Nəsirli “Bakı-Xəbər”ə şərhində bildirdi ki, Azərbaycanda pambıqçılığın məcburi inkişaf etdirilməsinin əleyhinədir. Onun fikrincə, pambıqçılığın geniş şəkildə inkişaf etdirilməsi perspektivli deyil: “Ancaq pambıqçılığın inkişafı üçün atılan hər bir addım təqdirəlayiqdir. Pambıqçılıq sahəsini inkişaf etdirməklə toxuculuğu yüksəltmək olar. Pambıq yağı texnologiyasının ölkəmizdə inkişafı müsbətdir. Gələcəkdə pambıq yağı xammalını Qazaxıstan, Türkmənistan, Özbəkistan və digər qonşu ölkələrdən almaq mümkündür. Özbəkistanın pambıqçılığın inkişafı ilə bağlı ölkəmizlə əməkdaşlığı təqdirəlayiqdir”.
Ekspertin sözlərinə görə, daxildə də pambıq istehsalı və becərilməsi mümkündür: “Məlumat üçün deyim ki, pambıq istehsalı üçün Azərbaycanın ən optimal rayonu Bərdədir, digər bölgələrdə yetişən pambığın dünya standartlarına uyğunluğu şübhə altındadır. Bu səbəbdən də Azərbaycan Türkiyədən başqa heç bir ölkəyə pambıq ixrac edə bilmir. Buna səbəbsə ölkəmizdə istehsal edilən pambığın keyfiyyətinin aşağı olmasıdır”.
Günel CƏLİLOVA
