Sui-qəsd edilən namizədlər çox hallarda ABŞ prezidenti seçiliblər - Tramp yüksəlişdə…
![Image](/uploads/posts/2024-07/trump.webp)
Abutalıb Səmədov: “Dünya özünü Trampın prezidentliyinə hazırlamalıdır”
ABŞ-da baş verən son hadisələr bütün dünyada siyasi şok yaşanmasına səbəb olub. Hazırda ABŞ-ın dostları, rəqibləri, hətta düşmənləri belə, baş verənlərə reaksiya göstərir. Üstəlik, bu reaksiyalar məzmun etibarilə Bayden administrasiyasının siyasi maraqlarına zidd xarakter daşıyır.
ABŞ-da prezident seçkilərinə hələ bir neçə ay qalsa da, onun mütləq qalibi artıq indidən məlum oldu. Donald Tramp prezident Co Baydeni onsuz da üstələyirdi, uğursuz sui-qəsd cəhdindən sonra isə onun seçkilərdə qalib gəlmə şansının 75 faizin üzərinə çıxdığı bildirilir.
Rusiya Xarici İşlər Nazirliyinin (XİN) sözçüsü Mariya Zaxarova bildirib ki, ABŞ-da prezidentlərə hücumlar ölkənin daxili-siyasi həyatında ənənəyə çevrilib:
"Sui-qəsd cəhdi, təəssüf ki, normaya çevrilən bir ənənədir".
Doğrudan da Kennedi, Reyqana da sui-qəsd edilib. Bu hadisədən doğan nəticələr nə olacaq?
Müstəqil siyasətçi Abutalıb Səmədov “Bakı-Xəbər”ə açıqlamasında bildirdi ki, Respublikaçılar Partiyası bu gün prezident seçkilərində iştirak edəcək namizəd barədə son qərarını verəcək: “Namizədin keçmiş prezident Donald Tramp olacağı heç kimdə şübhə doğurmur. Böyük əksəriyyət ondan əmin idi ki, Trampı prezident seçkilərinin qalibi saymaq olar. Qeyri-adi nəsə baş verməliydi ki, onu prezidentliyə gedən yolda saxlamaq mümkün olsun. Əvvəl televiziyada keçirilən debatda ağır məğlubiyyətə uğrayan Bayden ikinci ağır zərbəni aldı. Çoxları bu sui-qəsddə Baydeni günahkar elan etməkdən çəkinmir. Düzdü, sui-qəsddən sonra Bayden bəyanatla çıxış etdi və bildirdi ki, ABŞ - da siyasi ritorika çox qızışıb, soyumaq lazımdı, siyasəti döyüş meydanına çevirmək olmaz. Ancaq siyasi ritorikanın qızışmasında, kəskinləşməsində Baydenin rolu çoxdur. Son teledebatlar zamanı açıq-aşkar uduzduğunu hiss etdiyinə görə, acizliyini gördüyünə görə Trampı təhqir etməkdən də, ona avtoritar faşist deməkdən də çəkinmədi. Onu ABŞ demokratiyası üçün əsas təhlükə elan etdi. Çünki acizliyini, gücsüzlüyünü hiss edirdi. Çox təəssüf ki, bu hal çox geniş yayılıb. Siyasətdə təsadüfi olan adamlar arqument çatışmayanda qarşındakını düşmən elan etməkdən başqa yol tuta bilmir və bir-birini müxtəlif ölkələrin agentləri elan edirlər. Bizdə də belə siyasətçilər var. Bəzən hakimiyyət orqanları da belə dırnaqarası siyasətçilərə qarşı çox səbrli davranır. Onların haqqında vaxtında zəruri addımlar atmırlar. Baydenin Trampa qarşı istifadə etdiyi ağır ittihamlar ona gətirib çıxartdı ki, psixikası tam formalaşmamış 20 yaşında bir gənc Trampı ABŞ demokratiyası üçün təhlükə hesab etdi. Görünür, dövlətini və xalqını ondan qorumaq istədi, Baydenin avtoritar faşist elan etdiyi Trampı öldürmək qərarına gəldi. Son nəticədə heç bir günahı olmayan mitinq iştirakçısı, sui-qəsd planlayanın özü öldürüldü. ABŞ-da keçirilən prezident seçkilərinə həlledici təsiri oldu. Bu sui-qəsd cəhdi Trampı seçkilərin əsas favoritinə çevirdi. Əgər ona kimi Baydenin müəyyən şansı qalırdısa, bundan sonra çox güman, onun bu vəziyyəti düzəltmək şansı olmayacaq. Tramp bu hadisə zamanı daha bir üstünlüyünü ortaya qoydu. Sona qədər şoudan çəkilmədi. Belə məqamlarda insanların xarakteri aydın şəkildə ortaya çıxır. Tramp qorxmadı, qaçmadı, mübarizəsini davam etdirmək istədiyini hər kəsə nümayiş etdirdi. Bu davranış pilləkəndən düşə bilməyən, nə danışdığını bəzən unudan, çox halsız, enerjisiz danışan, prezidentləri dəyişik salan Baydenlə müqayisədə Trampa böyük üstünlük qazandırdı. Bütün dünya belə hesab edir ki, artıq Trampı prezident seçkilərinin qalibi hesab etmək olar. Demokratlar namizədlərini dəyişsələr də onların yenə də şansı qalmayacaq. Rəy sorğularında Trampın üstünlüyü görünsə də, bu hadisədən sonra üstünlüyün xeyli artacağı məlumdur. Dünya özünü Trampın prezidentliyinə hazırlamalıdır”.
Məhəmmədəli QƏRİBLİ