1-ci sinif uşağına nə sınaq imtahanı? - "Hərədən 20 manat qoparmaq üsuludur"...
Bu gün bütün siniflər üzrə sınaq imtahanları keçirilir. Məktəblinin hansı sinifdə oxumasından asılı olmayaraq sınaq imtahanları kurslar tərəfindən təşkil olunur. İbtidai sinif şagirdlərinin sınaq imtahanlarında iştirak etməsi isə böyük narazılığa səbəb olub.
Valideynlər bunu müəllimlərin növbəti fırıldaqlığı kimi qiymətləndirir. Onlar 1-ci sinif uşaqlarının 3 aydır dərsə getdiyini qeyd edir: “İbtidai sinif müəllimləri hansısa özəl hazırlıq kursu ilə anlaşır və bazar günləri "sınaq imtahanı" adı altında birinciləri imtahana dəvət edirlər. İmtahana girmək üçün isə hər valideyndən uşağına görə 20 manat pul alınır".
Valideynlər iddia edir ki, bu məsələdə hazırlıq kursunun direktoru ilə müəllimin şərikdir.
Məlumat üçün bildirək ki, dünyanın aparıcı ölkələrində uşaqlar, demək olar ki, imtahan nədir bilmir. Bu proses onlarda çox rahat və əyləncəli şəkildə aparılır. Ancaq bizdə isə əksinədir. 6 yaşından etibarən uşaqlar imtahan stressi ilə yaşayır.
Nizami Hüseynov: “İmtahanda şagirdin yaş xüsusiyyətinə və psixologiyasına uyğun olmayan test tapşırıqları olur ki, bu testlər şagirdi daima stresdə saxlayır”
Təhsil eksperti Nizami Hüseynov “Bakı-Xəbər”ə açıqlamasında qeyd etdi ki, dünyanın inkişaf etmiş təhsilinə malik olan Finlandiya, Cənubi Koreyada təhsil alan şagirdlər ibtidai sinfi başa vurana qədər heç bir imtahan vermirlər: "Bizdə isə təzə məktəbə qədəm qoyan şagirdlər ayda bir dəfə KSQ, BSQ imtahanları verir ki, bu da onların il ərzində ciddi stresə girməsinə gətirib çıxarır. İmtahan sualları isə heç bir standarta əsaslanmayan, şagirdin yaş xüsusiyyətinə və psixologiyasına uyğun olmayan test tapşırıqları olur ki, bu testlər şagirdi daima stresdə saxlayır. Bu isə uşağın fiziki inkişafına mane olur”.
Ekspert hesab edir ki, ibtidai sinifdə təhsil alan şagirdləri mütəmadi olaraq imtahan etmək olmaz. İbtidai sinif şagirdlərinin əldə etdiyi bilik və bacarıqların, oxuyub-anlama bacarıqlarının ilkin vəziyyətinin müəyyənləşdirilməsi məqsədilə sadə imtahanlar, yoxlamalar keçirmək olar.
Könül İsmayılova: “İmtahan gərginliyi uşaqlarda stres və ruh düşkünlüyü yaradır”
Psixoloq Könül İsmayılova “Bakı-Xəbər”ə açıqlamasında bildirdi ki, imtahan gərginliyi uşaqlarda stres və ruh düşkünlüyü yaradır: “İmtahandan keçməyən azyaşlı daxili stres yaşamamalıdır. Uşaqlar var ki, bir-iki balla kəsilir. Bu onlara qarşı haqsızlıqdır. Hələ yeniyetmələrin intihar statistikasinin qarşısında aciz qaldığımız bir zamanda kiçikləri gərəksiz stresə salmaq düzgün deyil. Psixoloji problemi olan fərdin vətənə, millətə, cəmiyyətə nə faydası olacaq? Bütün bunları nəzərə alıb, azyaşlıları daha az stresə salmaq lazımdır".
Günel CƏLİLOVA
