Astaranın qəhrəman oğlu Əli
Astara camaatının qürur yeri, iftixar mənbəyi olan Vətən müharibəsi şəhidi Əli Malik oğlu Feyziyevin 31 yaşı tamam oldu.
Şərəfli ömrü ilə milyonların ürəyində özünə əzəmətli abidə ucaldan, şəhidlik zirvəsindən gələcəyə boylanan Əlinin adını özündə yaşadan çoxlu yadigarlar yaratmaqla astaralılar hər an, hər yerdə onu ehtiramla xatırlayırlar. Bu günlər isə astaralılar ölümsüzlüyə qovuşan qəhrəman oğulun doğum günü ilə əlaqədar doğma kəndində məzarını ziyarət edib, önünə təzə güllər düzüblər. Daha sonra ziyarətçilər şəhidin evində ailə üzvləri ilə görüşüb, onlara ehtiramlarını bildiriblər.
Həmçinin çıxışlar zamanı deyilib ki, Əli Vətənin yaşaması naminə canını fəda edib. Odur ki, onun ömür yolu ən qədər qısa olsa da, şərəfli və örnək sayılır. Qərinələr keçəcək, gələcək nəsillər də onu torpağa bağlı, layiqli vətəndaş olaraq daim minnətdarlıqla xatırlayacaq. Bəli, Əli kimi qəhrəmanların şəhidliyi bizim kimliyimizi, mənliyimizi bir daha dünyaya bildirdi.
Azərbaycanın və dünyanın hərb tarixinə qızıl hərflərlə yazılan 44 günlük haqq savaşımızın şəhidi Əli Malik oğlu 1993-cü ildə Astara rayonunun Ərçivan qəsəbəsində anadan olub. Həyatı dərk edən gündən ömrünün mənasını Vətənə, xalqa təmənnasız xidmətdə görən Astaranın igid oğlu İkinci Qarabağ müharibəsi başlanan andan düşmənlə ölüm-dirim savaşına atılıb, neçə-neçə döyüşdən zəfərlə çıxıb. Füzulidə, Cəbrayılda, Şuşada üçrəngli bayrağımızı ucalandıranların önündə gedib. Vətən yolunda hər an ölümə hazır olan igid döyüşçü qələbə gününə qədər düşmənə qan qusdurub. Noyabrın 8-də Şuşada Vətənə tuşlanan düşmən gülləsini sinəsi ilə dəf edən zaman şəhidlik zirvəsinə ucalıb. Cısmən aramızdan getsə də, adını tarixə yazıb.
Qeyd edək ki, Əli ölkə başçısının müvafiq sərəncamları ilə ölümündən sonra Cəbrayılın, Xocavəndin, Şuşanın azadlığına görə, “Vətən uğrunda” və “Cəsur döyüşçü” medalları ilə təltif edilib. Eləcə də, qəhrəmanlığı dillərdə dastan olan Əlinin yarımçıq arzularını cücərdəcək iki övladı bizlərə əmanət qalıb.
Zəfər ORUCOĞLU
Azərbaycan Jurnalistlər Birliyinin üzvü
