Rusiya Ermənistanı sözlə hədələməkdən hələ kənara çıxa bilmir - vəziyyət 2 kürsüdə oturmaqdan da pisdir...
Təbriz Musayev: “Kreml Paşinyanla konfrontasiyaya gedib Cənubi Qafqazda ikinci cəbhə açmaq istəmir”
Ermənistan Qərbə doğru səmtlənməsini davam etdirdikcə, öz təhlükəsizliyini daha böyük təhdid altında qoyur. Bunu Rusiya xarici işlər nazirinin müavini Mixail Qaluzin İrəvanın NATO sammitində iştirakını şərh edərkən deyib.
Onun sözlərinə görə, İrəvan eyni zamanda iki kürsüdə otura bilməz: “İrəvanın narahatlıqlarına konstruktiv yanaşma əvəzinə, təəssüf ki, onlar fərqli yol seçiblər. Ermənistan NATO və onun ayrı-ayrı üzvləri ilə, xüsusilə də NATO standartlarının tətbiqi mənasında, qarşılıqlı əlaqələri gücləndirir, onlardan silah alır və bu hərbi-siyasi blokun bugünlərdə Vaşinqtonda keçirilən sammitində iştirak bir yana, alyans üzvləri ilə birgə hərbi təlimlər keçirir. İrəvan eyni zamanda iki kürsüdə otura bilməz”.
Qaluzin vurğulayıb ki, Qərbin Ermənistanla yaxınlaşması Rusiyanın maraqlarına qarşı yönəlib: “Məqsədi Rusiyanın “strateji məğlubiyyəti” olanlarla əməkdaşlığın belə sürətlə dərinləşdirilməsi ilə İrəvan öz əlləri ilə Cənubi Qafqazdakı vəziyyəti, öz təhlükəsizliyi də daxil, ciddi şəkildə sabitsizləşdirmək risqinə girir”.
Bütün bunlara baxmayaraq, Rusiya Ermənistanı sözlə hədələməkdən o tərəfə keçə bilmir.
“İvanişvilinin partiyası həlledici qələbə qazansa, o zaman Moskva İrəvanın Avropa yolunu əngəlləməyə çalışacaq”
Sözügedən məsələni “Bakı-Xəbər”ə şərh edən İrəvan Azadlıq Təşkilatının sədri Təbriz Musayev Moskvanın Paşinyan hakimiyyətinə belə təmkinli yanaşmasını bir sıra amillərlə əlaqələndirdi: “Bunun bir neçə səbəbi var. Başlıca səbəb odur ki, Rusiyanın Ukraynaya başı qarışıb. Müharibə səbəbindən Rusiyaya qarşı genişmiqyaslı sanksiyalar tətbiq olunur. Üstəlik, Rusiyanın iki həftəyə bütün Ukraynanı işğal planı baş tutmadı. Vəziyyət Ukrayna üçün nə qədər ağır olsa da, Rusiyanın da durumu çox ağırdır. Söhbət Rusiyanın üzləşdiyi böyük maddi, hərbi, insani resurs itkilərindən gedir. Belə bir şəraitdə Kreml Paşinyan iqtidarı ilə konfrontasiyaya gedib Cənubi Qafqazda ikinci cəbhə açmaq istəmir. Ən azından, Rusiya iki cəbhədə vuruşmaq iqtidarında deyil. Digər tərəfdən, məlum olduğu kimi, Ermənistan Rusiyanın sanksiyalardan yayınmasında körpü rolunu oynayır. Minlərlə Rusiya vətəndaşı, o cümlədən erməni əsilli şəxslər biznesini Ermənistana köçürüb. Ermənistan üzərindən Rusiyaya reeksport həyata keçirilir. Həmçinin bunu Qərb də bilir, amma Ermənistanın qazancı naminə bu ölkənin sanksiyaları pozmasına göz yumurlar. Rusiyanın sərt addımlar atmamasının bir səbəbi də bununla bağlıdır. Başqa bir səbəb Ermənistanın hələ ki, KTMT və Avrasiya İqtisadi İttifaqından rəsmən çıxmaması ilə əlaqədardır. Ən nəhayət, Rusiya Gürcüstanda gedən proseslərin sonunu gözləyir. Gürcüstanın Qərblə münasibətləri gərginləşir. Avropa İttifaqı bu ölkə ilə danışıqları dayandırıb. Oktyabrda keçirilən parlament seçkilərində Bdzina İvanişvilinin partiyası həlledici qələbə qazansa, Moskva Ermənistanın Avropa yolunu əngəlləməyə çalışacaq. Bu zaman Paşinyana təzyiqlər üçün daha çox Kremlin əlində imkan olacaq. O baxımdan hesab edirəm ki, Rusiyanın gözləmə mövqeyində durması bu səbəblərlə bağlıdır”.
Vidadi ORDAHALLI
