2-ci sinif şagirdini oxuduğu məktəbdə bu günə qoyublar...
![Image](/uploads/posts/2023-11/mek.webp)
Sosial şəbəkələrdə ikinci sinif şagirdinin oxuduğu məktəbdə döyülməsi ilə bağlı məlumat yayılıb. İddialara görə, hadisə Sabunçu rayonu Ramana qəsəbəsində yerləşən 90 nömrəli tam orta məktəbdə baş verib. Paylaşımda məktəbli qızın üz nahiyəsindən güclü zərbə aldığı görünür.
Görüntü sosial şəbəkədə narazılığa səbəb olub. İkinci sinif şagirdinin döyülməsi, gözünün qap-qara olması bir sıra sualların yaranmasına səbəb olub. Uşaq bu vəziyyətə düşənə kimi müəllim harda idi? Vəziyyətə niyə vaxtında müdaxilə etməyib?
Şagirdin anası Vüsalə Quliyeva məsələ ilə bağlı ATV-nin “Xəbərin olsun” proqramının canlı efirinə qoşulub. Ana çox pis olduğunu, övladının müalicə aldığını bildirib: “Hazırda övladım müalicə altındadır. 7 noyabrdan məlum məsələyə görə övladım dərslərdə iştirak etmir. Ana kimi mənə təsir edən odur ki, ən azı biz yolda gedərkən yıxılan insanı görürüksə, əlindən tutub ona yardım edirik. Bu bizim insanlıq borcumuzdur. Deyirlər, uşaqlar toqquşub. Kamera görüntüsü tələb etmişdim. Müstəntiq ilə məktəbə baxarkən, akt zalında kameranın olmadığını gördük”.
90 nömrəli məktəb: “2F sinfinin iki şagirdi qaçarkən toqquşub”
Məsələ ilə bağlı məktəbdən bildirilir ki, 07.11.2023-cü il tarixində məktəbin 2F sinfinin iki şagirdi qaçarkən toqquşub: “Məktəb rəhbəri tərəfindən hadisə barədə vaxtında məlumat verilmədiyinə görə ibtidai sinif müəlliminin izahatı alınaraq ona töhmət verilib. Şagirdlərin birində heç bir iz müşahidə olunmasa da, digəri xəsarət alıb”.
Kamran Əsədov: “Orta məktəb şagirdləri arasında ciddi problemlər mövcuddur”
Təhsil eksperti Kamran Əsədov “Bakı-Xəbər”ə açıqlamasında qeyd etdi ki, məktəblərdə kişi müəllimlərinin sayının kəskin az olması təhsilin keyfiyyətinə ciddi şəkildə mənfi təsir göstərir: “Aparılan tədqiqatlar göstərir ki, kişi müəllimlərin dərsində şagirdlərin aktivliyi, dərsə davamiyyəti, hazırlığı qadın müəllimlərlə müqayisədə kifayət qədər fərqlidir, yəni müsbət göstəricilər kişi müəllimlərə aiddir. Bu gün məktəblərdə qəribə vəziyyət müşahidə olunur. Şagirdlər dərsə deyil, sanki qiyamət qoparmağa gedir. Məlumat üçün bildirim ki, Dövlət İmtahan Mərkəzi (DİM) tərəfindən 2023-cü ildə keçirilən imtahanlarda şagirdlərin üzərindən qadağan edilmiş əşyalar aşkarlandı. Yəni artıq şagirdlər təkcə küçədə yox, məktəbdə, imtahana gedəndə üzərlərində kəsici, deşici alətlər gəzdirirlər. Təəssüf ki, pandemiyadan sonra şagirdlər tərəfindən məktəb binasına əlavə köməkçi vasitələrin gətirilməsi, birinin digərinə xəsarət yetirməsi hallarında artım müşahidə olunur. Təəccüblü məqam odur ki, şagirdlər məktəbə kəsici-deşici alətlər, bıçaq, alışqan, təsbeh apara bilirlər. Sanki onlar mafiya kinolarındakı obrazları canlandırırlar”.
Ekspert hesab edir ki, orta məktəb şagirdləri arasında ciddi problemlər mövcuddur. Məktəbə qələm, karandaşla gəlməli olan şagirdlər indi təsbehlə, bıçaqla gəlirlər. Son dövrün statistik göstəricilərinə baxdıqda, yeniyetmələrin iştirakı ilə xüsusi amansızlıqla törədilən cinayət hallarında artım müşahidə olunur. Elm və Təhsil Nazirliyi məktəblərə nəzari artırsa da, sosial şəbəkələr daha çox mənfi təsirini göstərə bilir. Xüsusən məktəblilərin iştirakı ilə elə məktəblərdə kriminonoloji hadisələrin törədilməsinin həcminin artdığını müşahidə etmək mümkündür: “Məktəblərdə kişi müəllimlərin azlığı bu tipli neqativlərin artmasına gətirib çıxarır. Ümumilikdə, maarifləndirmə işləri aparılmalıdır. 2-ci sinif şagirdinin videosu ilə bağlı araşdırma aparılır. Ilkin olaraq məlum olub ki, iki uşaq qaçarkən bir-birinə toqquşub, nəticədə belə hal yaşanıb. Burda əsas səhv müəllimin diqqətsizliyi olub”.
Günel CƏLİLOVA