Oyuncaq mağazalarında deşici gücə malik lazer fənərlər nə ixtiyarla satılır...
“Satışda olan lazer işığı adlı oyuncaq hansısa əşyanı yandırıb deşirsə, bunun uşaqlar üçün…”
Oyuncaq uşaqların gündəlik həyatının ayrılmaz parçasıdır. Uşaqların çoxu öz vaxtını sevimli oyuncaqları ilə keçirir. Körpələrin ən xoşbəxt anı isə valideynləri onlara sevdiyi oyuncaqları bağışladıqları andır. Bu gün satışda müxtəlif növ oyuncaqlar var.
Həmin oyuncaqlar arasında elələri var ki, uşaqların həyatı üçün təhlükəlidir. Belə ki, Bakıda bəzi oyuncaq mağazalarında lazer fənərlər satılır. Bu oyuncaq lazerlərin digərlərindən fərqi isə istənilən əşyanı deşmək gücünə malik olmasındadır.
Maraqlıdır, belə təhlükəli oyuncaqlar necə satışa buraxılıb?
“Oyuncaqların təhlükəsizliyi təmin edilməlidir, çünki keyfiyyətsiz oyuncaqla təmas zamanı uşaqlarda ağır metallarla zəhərlənmə və autizm xəstəliyi əmələ gələ bilər”
Psixoloq Könül İsmayılova “Bakı-Xəbər”ə açıqlamasında qeyd etdi ki, bir çox oyuncaqlar oyun fonuna aid deyil: “Belə oyuncaqlara mozaikalar, deşici, kəsici alətlər daxildir. Satışda olan lazer işığı adlı oyuncaq hansısa əşyanı yandırıb deşirsə, bunun uşaqlar üçün, eləcə də digər şəxslər və əmlaklar üçün təhlükəli vəziyyətləri ola bilər. Valideynlər bu cür məsələlərdə diqqətli olmalı və uşaqları çəkindirməlidirlər. Sahibkar görsə ki, bu cür təhlükəli oyuncaqlara tələbat azdır, həmin əşyalar satışdan yığışdırılacaq. Ümumiyyətlə, oyuncaqların təhlükəsizliyi təmin edilməlidir. Çünki keyfiyyətsiz oyuncaqla təmas zamanı uşaqlarda ağır metallarla zəhərlənmə və autizm xəstəliyi əmələ gələ bilər. Plastmas qoxusu gələn mağazadan oyuncaq almaq təhlükəlidir. Ağ yaş tənziflə oyuncağı silərkən rəng çıxırsa, bu oyuncağı uşağa vermək olmaz”.
Həmsöhbətimiz hesab edir ki, deşici, kəsici, yandırıcı tipli oyuncaqlar satışdan yığışdırılmalıdır. Aidiyyəti qurumlar bu məsələni diqqətə götürməlidir: “Bütün yaşda olan uşaqlar üçün silah heç də yaxşı hədiyyə deyil. Gülləli pnevmatik tapançalar, arbaletlər, iti ucları olan oxlar, yaylar, qılınclar, xəncərlər kifayət qədər travmatikdir və uşaqların sağlamlığına ciddi ziyan vura bilər. Pərli oyuncaqlar da təhlükəlidir. Onlar işə salındıqda uşağın üzünü və ya gözlərini zədələyə bilər. Danılmaz faktdır ki, bu gün satışda uşaq psixikasına da zərər yetirən çoxlu sayda oyuncaqlar var. Bədheybətlər şəklində oyuncaqlar uşaqlara alınmamalıdır”.
Günel CƏLİLOVA
