Makron ən böyük siyasi rəqibini baş prokurorun əli ilə susdurmağa qalxdı...
Elşad Həsənov: “Apardığı siyasət nəticəsində Fransa xalqının sevgisini yox, nifrətini qazanmış Makron siyasətdən getməlidir”
Yaradılmasında Macarıstanın Baş naziri Viktor Orbanın iştirak etdiyi "Avropa üçün Vətənpərvərlər" sağçı alyansı Avropa Parlamentində (AP) rəsmi fraksiya statusu almaq üçün kifayət qədər dəstəyə nail ola bildi.
Qaydalara görə, fraksiya statusu almaq üçün bir qrupda 7 ölkədən 23 deputat olmalıdır. Belçikanın “Flemish Interest” partiyası ona qoşulduqdan sonra “Avropa üçün Vətənpərvərlər” kifayət qədər say toplayıb.
Marin Le Pen tərəfindən yaradılan Fransa Milli Ralli partiyasının üzvlərinin AP-dəki digər qruplarla danışıqlar apardığı, nəticədə partiyanın “Avropa üçün Vətənpərvərlər” alyansına qoşula biləcəyi daha əvvəl bildirilib.
İyunun 30-da V.Orban Vyanada keçirilən görüşdə Avropa Parlamentində Herbert Kiklin Avstriya Azadlıq Partiyası və Çexiyanın sabiq Baş naziri Andrey Babişin ANO 2011 partiyasının da daxil olacağı yeni sağçı qrupun yaradılması planlarını açıqlayıb.
Göründüyü kimi, ölkənin daxilində seçkilərdə Makrona ciddi problem yaradan, Avropa Parlamentinə keçirilən seçkiləri udan Le Pen ciddi gedişlər edir, hətta Makrona qarşı olan beynəlxalq koalisiyaya qoşulur. İndi görək Fransa rəsmi qurumları onunla bağlı hansı addımları atır?
Paris prokurorluğu “Milli birlik” parlament fraksiyasının lideri Marin Le Penə qarşı təhqiqata başlayıb. O, 2022-ci ildə seçki kampaniyasının maliyyələşdirilməsi qaydalarını pozmaqda şübhəli bilinir.
Təhqiqata seçkilər zamanı namizədlərin xərclərinin geri qaytarılmasının qanuniliyini araşdıran komissiyanın müraciəti səbəb olub. Qurum 2022-ci il prezident seçkiləri zamanı bəzi namizədlərlə bağlı prokurorluğa bir neçə sorğu göndərib. Lakin təhqiqat yalnız Marin Le Pen barəsində başladılıb.
Burada “təşviqat kampaniyasının maliyyələşdirilməsi mənbələri” ilə bağlı problemdən söhbət gedir.
Fransa qanunlarına görə, seçki kampaniyaları zamanı namizədlərin müəyyən edilən xərc limitini aşması qadağandır. Şərtlər yerinə yetiriləcəyi təqdirdə dövlət xərclərin bir hissəsini geri ödəyir. Əks halda, müvafiq komissiya seçki hesablarına düzəlişlər edə, ödənilməli olan kompensasiya məbləğini azalda və lazım gələrsə, məsələ ilə bağlı prokurorluğa sorğu göndərə bilər.
Özünü demokratik ölkə sayan Fransanın müxalif siyasi liderə qarşı bu cür administrativ və hüquqi təzyiqlərə əl atması necə dəyərləndirilə bilər?
Siyasi şərhçi Elşad Həsənov “Bakı-Xəbər”ə açıqlamasında bildirdi ki, təəssüf bu günkü Fransa özünü demokratik ölkə saysa da, əslində demokratiyadan əsər - əlamət yoxdu: “Makron apardığı xarici siyasətində ancaq öz neqativ maraqlarını gözləyir, özünün vəzifədə qalması üçün addımlar atır. Fransa hər zaman qeyri - obyektiv siyasət aparıb. Biz bunu Ermənistanın Azərbaycan torpaqlarını işğal etdiyi 30 il müddətində də gördük. Fransa ATƏT - ə həmsədrlik etdiyi dövrdə də hər zaman birtərəfli mövqe tutub. Haqqın yanında yox, nahaqqın yanında olub. Bu gün də bu siyasət davam etdirilir. Ona görə də Fransa xalqı da Makronun apardığı siyasətdən narazıdır. Avropa Parlamentinə seçkilər zamanı da bu özünü göstərdi. Müxalifət liderin partiyası qalib gəldi. Daxildəki seçkilərdə isə Makron öz təsir imkanlarından istifadə etdi. Ancaq buna baxmayaraq, Makron və onun partiyası mütləq qələbə çala bilmədi. Xalq Cəbhəsi partiyası birinci yeri götürdü və indi baş naziri də onlar irəli sürəcəklər. Görünən odur ki, Fransa artıq çalxalanır. Orada hakimiyyət dəyişikliyi mütləq vacibdir, olacaqdır. Çünki Makron siyasətçi kimi özünü doğrultmadı, Fransanı nüfuzdan saldı. Bu gün də bu davam edir. Çox maraqlıdır ki, 2022 - ci ildə olan seçkilərdə onun maliyyələşməsinin düz olub - olmamasını iki il keçəndən sonra ortaya çıxarırlar. Bu, dövlətin, hakimiyyətin marağındadır. Ona görə də indi başlayıblar. Sözün həqiqi mənasında demokratiyadan dəm vuran Fransa neokolonializm siyasətini yeritməyə çalışır, digər dövlətlərin daxili işlərinə qarışır və apardığı siyasət də hər yerdə iflasa uğrayır. Ona görə də, Fransada yaxın zamanlarda yeni baş nazir seçiləndən sonra Makronun hakimiyyətdə qalması sual altında olacaq. Çünki Makron artıq dövləti idarə edə bilmir, nüfuzu düşüb, əhali onu istəmir. Hətta Fransada parlament seçkilərində təşviqat işlərində Makronun portretləri yığışdırıldı. Özləri də etiraf etdi ki, onun portreti əhali arasında qıcıq yaradır. Bəli, həqiqətən belədir. Ölkə prezidenti əhalidə qıcıq yaradır. Apardığı siyasət nəticəsində Fransa xalqının sevgisini yox, nifrətini qazanmış Makron siyasətdən getməlidir”.
Məhəmmədəli QƏRİBLİ
