Ən ucuz faizlə və komissiyasız kredit verən banklar rəqabətə necə dözür? - Azərbaycan təcrübəsi...
Əkrəm Həsənov: “Aşağı faizlə kredit verən bankların tələbi olduqca sərtdir”
Azərbaycanda ən ucuz və baha nağd kredit verən bankların siyahısı açıqlanıb. Araşdırmaya əsasən, manatla istehlak krediti verən bankların faiz dərəcələri 9.5%-26% aralığında müəyyən edilib. Ən aşağı faiz dərəcələri ilə kredit verən banklar Yelo Bank, TuranBank,AccessBank, ABB, Azer Turk Bankdır. Bu banklar 9,5 – 11 faiz aralığında nağd kredit verir.
Digər banklar isə daha yüksək faizlə kredit verir. Məsələn, 16-17 faiz aralığında nağd krediti təklif edən banklar var. Maraqlıdır, banklar təklif etdikləri faiz dərəcəsi ilə rəqabətə necə dözür?
“Fərqli faiz siyasətinə baxmayaraq, banklar bu rəqabətə davam gətirir, bunun da səbəbi kreditə olan tələbatın yüksək olması ilə bağlıdır”
Bank sahəsi üzrə ekspert Əkrəm Həsənov “Bakı-Xəbər”ə şərhində bildirdi ki, banklar nağd kredit üzrə fərqli kredit faizləri təklif edir: “Fərqli faiz siyasətinə baxmayaraq, banklar bu rəqabətə davam gətirir. Bunun da səbəbi kreditə olan tələbatın yüksək olmasıdır. Elə insanlar var ki, kredit götürmək üçün sələm, lombarda üz tutur. Həmin lombardların faizi 60-dan başlayır. Bank olmayan kredit təşkilatlarının (BOKT) kredit faizi banklardan daha çoxdur. Bu səbəbdən də bank kreditlərinə tələbat yüksəkdir. Ancaq onu da nəzərə almaq lazımdır ki, banklar hər kəsə aşağı faizlə kredit vermir. Aşağı faizlə kredit verən bankların tələbi olduqca sərtdir. Maaş yüksək olmalı, ailə üzvlərinin sayı çox olmamalıdır və s”.
Həmsöhbətimiz onu da əlavə etdi ki, kredit faizi risq deməkdir: “Kredit faizi nə qədər yüksəkdirsə kreditin qaytarılmama ehtimalı da yüksəkdir. Banklar hamının tələbatını təmin edə bilmir. Azərbaycanda kredit faizlərinin yüksək olması kredit risqinin yüksək olması ilə bağlıdır. Yəni kreditin qaytarılmaması ehtimalının yüksək olması, bu zaman yaranan problemlər məcbur edir ki, hamı faizləri yüksək təqdim etsin”.
Günel CƏLİLOVA
