Paşinyan həm konstitusiyanı dəyişir, həm də bunun guya daxili iş olduğunu göstərmək istəyir...
Azər Həsrət: “İstənilən halda bütün bunlar bizim üçün əhəmiyyət kəsb etmir”
Ermənistan baş naziri Nikol Paşinyan ölkənin yeni Konstitusiyasının qəbul olunması zərurətini növbəti dəfə gündəmə gətirib.
Konstitusiya günü münasibəti ilə xalqa müraciətində Nikol Konstitusiyanın ölkədə həyat qaydaları, hüquq və vəzifələr haqqında vətəndaşların kollektiv müqaviləsi olduğunu vurğulayaraq, yeni əsas qanunun qəbul edilməsinə ehtiyac yarandığını bildirib: “Hazırkı Konstitusiya vətəndaşlar arasında ciddi sosial-psixoloji gərginlik yaradır. Məlum hallara görə, bu gün Ermənistan vətəndaşları indiki Konstitusiyada onların cəmiyyətdə və dövlətdə həyat qaydaları haqqında fikirlərini əks etdirdiyinə inanmırlar. Onlar buna hakim elitanın yaratdığı və həyata keçirdiyi sənəd kimi baxırlar”.
Paşinyan onu da qeyd edib ki, əsas problem təkcə Konstitusiyada yazılanlarla yox, həm də onun necə qəbul edilməsindədir. Onun sözlərinə görə, Ermənistana xalqın özününkü sayacağı, dövlət və onunla münasibətlər haqqında fikirlərini əks etdirən yeni Konstitusiya lazımdır: “Bizə xalqla - onun yaradıcısı ilə üzvi şəkildə bağlı olacaq yeni Konstitusiya lazımdır”.
Burada diqqəti çəkən məqam odur ki, Paşinyan bütün vasitələrlə bunu ölkədaxili tələb kimi təqdim etməyə çalışır. Yəni demək istəyir ki, ölkədə Konstitusiya dəyişikliklərini heç də Azərbaycanın tələbi ilə etmirik. Bu, daxili işimizdir, buna zərurət var, xalq bunu istəyir və s. Olsun da. Azərbaycan üçün əsas odur ki, Ermənistan Konstitusiyasını dəyişsin və oradan ərazi iddialarını çıxarsın.
Sözügedən məsələni baki-xeber.com-a şərh edən siyasi şərhçi Azər Həsrət hesab edir ki, Paşinyanın bu məsələni necə həll edəcəyi bizim üçün önəmli deyil: “Çünki onsuz da Azərbaycan açıq şəkildə mövqeyini ifadə edib. Ermənistan Konstitusiyası Azərbaycan Respublikası və qardaş Türkiyəyə ərazi iddiası irəli sürür. Təbii ki, dövlətlərarası münasibətləri normallaşdırmaq istəyirlərsə Konstitusiya dəyişdirilməli, yenilənməlidir və qonşulara torpaq iddiasından imtina edilməlidir. İndi bunu Ermənistan kimi ölkədə etmək o qədər də asan deyil. Çünki revanşist qüvvələr hər bəhanədən istifadə edərək Paşinyana qarşı hücuma keçirlər. Ona görə də belə, dolayısı ilə Konstitusiya dəyişiklikləri məsələlərinin üzərinə gedilir. Ancaq istənilən halda bütün bunlar bizim üçün əhəmiyyət kəsb etmir. Əsas odur ki, Ermənistan Konstitusiyasını dəyişəcək. Daha sonra Azərbaycan və Türkiyəyə ərazi iddialarından imtina edəcək. Əsas odur ki, bunu etsinlər. Digər Ermənistandaxili məsələlərin bizə heç bir dəxli yoxdur. Nə vaxtsa revanşa cəhd edəcəklərsə, daha ağır zərbə alacaqlar. Ermənistanın buna imkanı yoxdur. Ermənistan Konstitusiyasını dəyişməsə, o zaman sülh müqaviləsi də olmayacaq. Nəticədə bundan biz yox, itirən tərəf onlar olacaq. Ona görə də əsas odur ki, ərazi iddialarını qanunvericiliklərindən çıxarsınlar”.
Vidadi ORDAHALLI
