KTMT iclası ilə eyni vaxtda Paşinyan Avroittifaq səfirləri ilə ilginc müzakirə apardı - Təsadüf?..
Elşad Musayev: “Eyni gündə bunların baş verməsi Rusiyaya ünvanlanan siyasi mesaj idi”
Minskdə KTMT-nin iclası getdiyi bir vaxtda baş nazir Nikol Paşinyan Avropa İttifaqının və Aİ-yə üzv ölkələrin Ermənistanda akkreditə olunmuş səfirləri ilə görüş keçirib.
Görüşdə Ermənistan-Aİ əməkdaşlığı məsələləri və birgə proqramlar, xüsusilə Ermənistanda islahatlar gündəliyi və Aİ-nin demokratik təsisatların gücləndirilməsinə davamlı dəstəyi müzakirə edilib. Cənubi Qafqaz regionunda baş verən proseslərlə bağlı fikir mübadiləsi aparılıb. Görüşdə, həmçinin, regional təhlükəsizlik və sabitlik məsələləri, Ermənistan-Azərbaycan münasibətlərinin tənzimlənməsi prosesi müzakirə olunub. Paşinyan səfirlərin suallarını cavablandırıb və Ermənistan hökumətinin mövqeyini təqdim edib.
Məlum olduğu kimi, Paşinyan Minskdə KTMT tədbirində iştirakdan imtina etdi. O baxımdan, bu iki hadisənin üst-üstə düşməsi və eyni vaxtda baş verməsi təsadüfən seçilib, yoxsa Paşinyan bununla Moskvaya hansısa mesajları verir?
“Paşinyan bununla demək istəyir ki, Ermənistan üzünü Avropaya çevirib və gələcək inkişafını Avroittifaqda görür”
Sözügedən məsələyə aydınlıq gətirən Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bununla bağlı bir neçə məqama toxundu: “Həqiqətən də Minskdə KTMT tədbirinin getdiyi bir vaxtda Paşinyanın Avropa səfirləri ilə görüşü diqqəti çəkən məqam idi. Hesab edirəm ki, burada əsla hansısa təsadüf yoxdur. Erməni tərəfi qəsdən və məqsədyönlü şəkildə eyni gündə bunları edir. Bununla Ermənistan rəhbərliyi sübut etmək istəyir ki, rəsmi İrəvan birdəfəlik KTMT və Rusiyadan uzaqlaşmaqda qərarlıdır. Eyni gündə bunların baş verməsi Rusiyaya ünvanlanan siyasi mesaj idi. Paşinyan bununla demək istəyir ki, Ermənistan üzünü Avropaya çevirib və gələcək inkişafını Avroittifaqda görür. Yəni Ermənistana arxa-dayaq qismində Avropa İttifaqını görmək istəyir. Biz nəzərə almalıyıq ki, Ermənistan dövləti yaranan gündən ələbaxım olub. Hər zaman kimdənsə nəsə umub. Böyük dövlətlərin himayəsinə sığınmağa çalışıb. SSRİ dağılandan sonra müstəqillik qazanan dövlətlərin siyahısına baxsaq görərik ki, Ermənistandan çox yardım alan ölkə olmayıb. Sövet dönəmində ən çox mərkəzdən dotasiya alan ölkələrdən biri Ermənistan idi. Müstəqillik dövründə Ermənistana təkcə erməni diasporası tərəfindən deyil, böyük dövlətlər tərəfindən də mütəmadi yardımlar olub. Elə Rusiyanın özü təkcə 1995-1997-ci illərdə bu ölkəyə 2 milyard dollarlıq silah yardımı edib. O cümlədən, Avropa ölkələrindən Ermənistana yardımlar olub. İndi Rusiya əvvəlki gücdə olmadığı üçün Qərbdən daha çox faydalanmaq istəyirlər. Ancaq nəzərə almaq lazımdır ki, Ermənistan iqtisadiyyatı əhəmiyyətli dərəcədə Rusiyadan asılıdır. Ermənistan məhsullarının bazarı Rusiyadır. Bu ölkənin sərhədlərini rus hərbçiləri qoruyur. Üstəlik, Rusiyanın orda hərbi bazaları var və s. Bütün bunlar onu deməyə əsas verir ki, Ermənistanın Rusiyadan qopması bu ölkəyə asan başa gəlməyəcək”.
Vidadi ORDAHALLI
