Paşinyan bu sözlərlə isbatlamaq istəyir ki, son təxribatlar onun işi deyil - “yorulmuşuq”...
Elşad Musayev: “Bu gərginliyi yaradan da Paşinyanın hakimiyyətdə olmasının əleyhinə olan qüvvələrdir”
“Biz artıq döyüşmək, sağ qalmaq, əziyyət çəkmək, özümüzü qurban vermək istəmirik. Sadəcə yaşamaq istəyirik”. Bunu Ermənistanın Baş naziri Nikol Paşinyan deyib.
O, sözügedən məsələ ilə bağlı qeyd edib ki, Ermənistan əhalisi mübarizədən, əzab-əziyyətdən və sağ qalmağa çalışmaqdan yorulub. Onun sözlərinə görə, xalq elitadan soruşur ki, onlar sadəcə yaşamağa, uşaqların xoşbəxt və firavan yaşamalarına şərait yarada biləcəklərmi? Siyasətçi vurğulayıb ki, bu suala yalnız dövlət cavab verə bilər.
Paşinyan belə deyirsə, o zaman Naxçıvan, Kəlbəcər istiqamətində atəşkəsi pozan kimdir? Bütün bunlar Nikolun iradəsi xaricində baş verir, yoxsa belə deyil?
“Müxtəlif təxribatçı, terrorçu, xaricdən himayə olunan qüvvələr sərhəd təxribatlarını törədir”
Sözügedən məsələni “Bakı-Xəbər”ə şərh edən Böyük Azərbaycan Partiyasının sədri Elşad Musayev deyilənlərə birmənalı yanaşmadı: “Məlum olduğu kimi, son dövrlər Paşinyan açıq bəyanatlar vermək məcburiyyətindədir. Belə ki, hökumətə qarşı keşiş Baqrat Qalstanyanın rəhbərliyi ilə mitinqlər keçirildi. Onlar bununla Paşinyana təzyiq etmək istəyirdilər. Paşinyana qarşı etiraz edənlər kilsə təmsilçiləri, əvvəlki hakimiyyət nümayəndələri və Qarabağdan Ermənistana köçən ermənilər idi. Onlara müxtəlif ölkələrdən ideoloji dəstək gəldi. O cümlədən, Rusiya keçirilən etiraz aksiyalarına hərtərəfli informasiya dəstəyi verdi. Açıq-aydın görünür ki, Paşinyandan nəsə qoparmaq, onu sıxışdırmaq istəyirlər. Qərbin də Nikoldan birmənalı tələbləri var. O da ondan ibarətdir ki, Nikolu birmənalı şəkildə Rusiya əleyhinə çıxmağa vadar etmək. Ona görə də yaranan gərgin vəziyyət Paşinyan üçün çox çətindir. Bir tərəfdən, yeri gəlsə Rusiya təzyiq göstərəcək, əlindəki rıçaqları işə salacaq. Onlardan biri də iqtisadi təsir rıçaqlarıdır ki, hələlik Rusiya buna əl atmır. Digər tərəfdən, Qərb artıq təzyiq göstərir. Başqa bir tərəfdən, Ermənistan üzərinə götürdüyü öhdəlikləri yerinə yetirməsə, o zaman Azərbaycan və Türkiyənin təzyiqləri ilə üzləşəcək. Ona görə də onun vəziyyəti gərgindir. Gərgin olduğu üçün də açıq-aşkar bəyanatlar verərək deyir ki, biz sağ qalmaq istəyirik. Bununla ölkə əhalisinə müraciət edir ki, siz hökumət əleyhinə çıxan qüvvələrlə vahid mövqedən çıxış etməyin. İndi Azərbaycan-Ermənistan sərhədində də gərginlik var. Bu gərginliyi yaradan da Paşinyanın hakimiyyətdə olmasının əleyhinə olan qüvvələrdir. Müxtəlif təxribatçı, terrorçu, xaricdən himayə olunan qüvvələr sərhəd təxribatlarını törədirlər. Məqsəd Azərbaycanı cavab addımları atmağa məcbur etmək və eskalasiyanı genişləndirməkdir. Onlar ordunun içinə sızıblar və bu təxribatları törədirlər. Paşinyanın qorxusu odur ki, əgər bu gərginlik artacaqsa, Azərbaycan Ordusu sahəyə enəcək. Bu zaman Azərbaycan Ordusu təhlükəsizlik zolağı yaratmağa məcbur olacaq. Digər tərəfdən, dəstək verən qüvvələrin sona qədər onu müdafiə edə bilməyəcəklərinə əmindir. Çünki Qərb liderləri Ukraynanı da qızışdırdılar, söz verdilər, amma sonda bəlli oldu ki, bu ölkə Rusiya ilə döyüşdə təkbətək qalıb. Zamanında lazım olan silahlar verilməyib. Ona görə də Paşinyan belə bəyanatlar verir”.
Vidadi ORDAHALLI
