"Naxçıvanbank" bank kimi mövcud olmaq şansını çoxdan itirmişdi...
Əkrəm Həsənov: “Bank çevrilib BOKT olmaq istəyirsə, bu kapital çatışmazlığından xəbər verir”
Məlum olduğu kimi, "Naxçıvanbank" ASC adını və təşkilati-hüquqi formasını dəyişərək “E-Kredit" MMC bank olmayan kredit təşkilatına (BOKT) çevrildiyini elan edib. Bu barədə İqtisadiyyat Nazirliyi yanında Dövlət Vergi Xidmətinin "Vergilər" qəzetinə istinadən xəbər verib.
Xatırladaq ki, “Naxçıvan Bank” 2008-ci ildə yaradılıb, ölkənin yeganə regional bank idi. Məlumat üçün bildirək ki, hələ ötən il "Naxçıvanbank"ın bağlanacağı ilə bağlı şayiələr yayıldı. Ötən ilin sonlarında Mərkəzi Bankın təsdiqlədiyi məlumata görə, "Naxçıvan Bank" ASC-nin kredit portfeli "Kapital Bank" ASC-yə ötürülüb. Bununla da tənzimləyici qurum portfelin satılmasının bankın lisenziyasının ləğv ediləcəyi anlamına gəlmədiyini bəyan edib.
“Naxçıvanbank" da artıq bank kimi fəaliyyət göstərə bilmir, nəsə problemləri var, çevrilib BOKT olacaq və yalnız kredit fəaliyyəti ilə məşğul olacaq”
Bank məsələləri üzrə ekspert Əkrəm Həsənov “Bakı-Xəbər”ə şərhində bildirdi ki, "Naxçıvanbank" da artıq bank kimi fəaliyyət göstərə bilmir, nəsə problemləri var, çevrilib BOKT olacaq və yalnız kredit fəaliyyəti ilə məşğul olacaq: “Belə olan təqdirdə o, artıq digər fəaliyyətləri həyata keçirə bilməyəcək. Məlumat üçün deyim ki, bankların BOKT-lara nisbətən fəaliyyət dairəsi daha genişdir və onlar kredit məsələləri ilə yanaşı bir sıra əməliyyatları da həyata keçirə bilirlər. BOKT-lar yalnız kredit məsələləri ilə məğul ola bilirlər. Banklar isə əmanət cəlb edə, bank hesablarını apara, pul köçürmələrini və s. həyata keçirə bilərlər. Buna görə də dövlətin banklara olan tələbləri daha sərt, ciddidir. Bankların minimal kapitalı 50 milyon manat, BOKT-un isə 300 mindir. Yəni fərq çox böyükdür. Bank çevrilib BOKT olmaq istəyirsə, bu, onun artıq bank kimi artıq fəaliyyət göstərə bilmədiyindən, nəsə problemlərinin olmasından, kapital çatışmazlığından xəbər verir. Onu da deyim ki, bankın BOKT-a çevrilməsi ölkəmizdə ilk təcrübə deyil. Bundan öncə "Parabank"ın lisenziyası ləğv edildi, sonradan lisenziya verilərək BOKT oldu".
Günel CƏLİLOVA
