Polineziyanın hakim partiyası Kanakidə zorakılıq aktlarının Fransa tərəfindən məqsədli şəkildə törədildiyini açıqladı...
Fransa Maohi Nui (Fransız Polineziyası) ərazisinin BMT-nin özünü idarə etməyən ərazilər siyahısında olması faktını inkar etməkdədir. Bu sözləri Fransız Polineziyasının hakim “Tavini” partiyasının siyasi məsələlər üzrə direktoru Riçard Tuheyava deyib.
O bildirib ki, Fransa Fransız Polineziyası ilə istənilən danışıqlarda BMT-nin rolunu qəbul etmir. Direktor əlavə edib ki, Fransız Polineziyasında mövcud olan administrativ gücün davranışı və dekolonizasiya prosesinə maneə törətməsi ilə bağlı istənilən konfrans onun xalqı üçün vacibdir.
“Bakı Təşəbbüs Qrupu səsimizi çatdırmaq üçün çox yaxşı alternativ platformadır. Qrupun bütün fəaliyyətləri və səyləri üçün minnətdarıq. Bu platforma tək Maohi Nui üçün deyil, həm də Fransanın digər dənizaşırı müstəmləkələrində baş verən ədalətsizliklə bağlı dünyanın gözünü və qulaqlarını açmağa bizə kömək edir. Bizdəki administrativ güc BMT Baş Asambleyasının qətnaməsinə məhəl qoymur. Bakı Təşəbbüs Qrupu ilə işləmək bizim üçün çox vacibdir”,- deyə Riçard Tuhayeva diqqətə çatdırıb.
Yeni Kaledoniyada baş verən zorakılıq faktları ilə bağlı da danışan “Tavini” partiyasının rəsmisi bildirib ki, kanak xalqına qarşı törədilənlər çox kədərlidir və xoşagəlməzdir. “Kanakidə Fransa tərəfindən törədilən zorakılıq aktları bizi narahat edir. Orada baş verənlər Fransa tərəfindən məqsədli şəkildə edilib. Biz kanak qardaşlarımızla həmrəy olduğumuzu bildiririk. Onlar Yeni Kaledoniyanın yerli xalqının nümayəndələridir. Yeni Kaledoniya xalqı bu cür yanaşmaya layiq deyil. Fransanın öz müqəddəratını təyinetmə ilə bağlı referendum təşkil etməsi ədalətsizlikdir. İstənilən yerdə öz müqəddəratını təyinetmə prosesi BMT-nin nəzarəti altında baş tutmalıdır”, - deyə o əlavə edib.
ZÜMRÜD
