Paşinyanın delimitasiya siyasətində Zəngəzur planları - çox ilgincdir...
Abutalıb Səmədov: “Tamamilə mümkündür ki, delimitasiya komissiyaları müzakirələr zamanı növbəti prosesin Zəngəzur istiqamətində aparmasını razılaşdırıb”
Sərhədin delimitasiya və demarkasiyasının növbəti mərhələsi Zəngəzurda olacaq. Bugünlərdə Zəngəzurda səfərdə olan Ermənistanın baş naziri Nikol Paşinyan delimitasiya mövzusunu yenidən gündəmə gətirib.
Paşinyan növbədə Sünikin (Zəngəzurun) ola biləcəyini gizlətmədən bu mövzuya bir daha toxunub. O qeyd edib ki, bu barədə Ermənistan və Azərbaycanın sərhəd komissiyaları qərar verməlidir.
Erməni mediası bildirir ki, bura qədər Tavuşadan sonra demarkasiyanın harada aparılacağı bəlli deyildi, Paşinyanın son mesajlarından sonra isə məkan artıq dəqiqləşib. Söhbət Zəngəzurla yanaşı, hem də Göyçə və Dərələyəzdən gedir.
Erməni mediası iddia edir ki, tərəflər iyulun 1-dək delimitasiya və demarkasiyasının növbəti mərhələsini təsdiqləyəcək.
Paşinyan delimitasiyanın 2- ci mərhələsini niyə Zəngəzurdan başlamaq istəyir? Təbii ki, bizim üçün bunun fərqi yoxdur, ancaq Paşinyanın niyə belə istəməsi çox maraqlıdır.
Müstəqil siyasətçi Abutalıb Səmədov “Bakı-Xəbər”ə açıqlamasında bildirdi ki, delimitasiya prosesi komissiyaların müzakirələri və müəyyən razılaşmaları nəticəsində aparılır: “Burada bir tərəfin nə istəməsi, delimitasiyanı harda aparmaq istəməsi, ancaq təklif kimi qiymətləndirilə bilər. Son qərar təbii ki, iki tərəfin razılığı ilə verilir. Tamamilə mümkündür ki, delimitasiya komissiyaları müzakirələr zamanı qərara gəliblər ki, növbəti proses Zəngəzur istiqamətində aparılsın. Bunu səbəbi nə ola bilər? Məlumdur ki, Almatı bəyannaməsinə əsasən müəyyən razılaşma var ki, delimitasiya və demorkasiya prosesində inzibati sərhədlər nəzərə alınsın və onlar dövlət sərhədləri hesab olunsunlar. ADA universitetində son çıxışı zamanı Azərbaycan Prezidenti də bu məsələnin üzərində dayandı və dedi ki, Almatı bəyannaməsinin rəhbər tutulması, inzibati sərhədlərin dövlət sərhədlərinə çevrilməsi o qədər də asan deyil. Çünki, Azərbaycanla Ermənistan arasında bəzi yerlərdə inzibati sərhədlər yoxdur. Eyni zamanda izah etdi ki, söhbət dağlıq ərazilərdən gedir. Bu da mütləq delimitasiya zamanı nəzərə alınmalıdır. O yerlərdəki inzibati sərhədlər yoxdu, onu təbii ki, sona saxlamaq lazımdır. Çünki, bu mübahisələr uzana bilər. Sərhədlərin müəyyən olunması zamanı bəzi yerlərdə Ermənistan, bəzi yerlərdə də biz güzəştə getməli olarıq. Ancaq Zəngəzur istiqamətində görünür inzibati sərhədlər mövcuddur və bu da imkan verir ki, burada delimitasiya prosesi aparmaq mümkün olsun. Hansı xəritələr əsasında aparılacaq? Yəqin bu barədə də müəyyən razılaşmalar olub. Bundan əvvəl 1969 - 1976-cı illərin xəritələri əsasında delimitasiya reallaşmışdı, demorkasiya işləri də yerlərdə aparılmışdı. Ümid edək ki, bu dəfə də elə ciddi problem olmadan razılığa gəlmək mümkün olacaq və Azərbaycanla Ermənistan sərhəddinin növbəti hissələri müəyyənləşəcək. O zaman da delimitasiya və demorkasiya işləri baş tutacaq”.
Məhəmmədəli QƏRİBLİ
