Fələstin administrasiyası dağılacaq - Netanyahunu hədələdilər...
Tural İsmayılov: "Avropa İttifaqının bəzi ölkələri tərəfindən bağlı qapılar arxasında Qəzzada yeni bir idarəetmə modelinin, ya da yeni idarəetmə modelini dəstəkləyən hansısa bir hökumət strukturunun yaradılmasına çalışılır"
Fələstin Administrasiyası ola bilsin yaxın aylarda dağılsın. Bunu Norveçin xarici işlər naziri Espen Bart Eide deyib. Nazir maliyyə çatışmazlığını, zorakılığın davam etməsini və yarım milyon fələstinlinin İsraildə işləməsinə icazə verilməməsini buna səbəb kimi göstərib.
"Vəziyyət son dərəcə ağırdır. Sıx əməkdaşlıq etdiyimiz Fələstin administrasiyası ola bilsin bu yay dağıla biləcəyinə dair bizə xəbərdarlıq edir. Süquta uğrasa, ola bilsin başqa bir Qəzza yaransın, bu da hamı, o cümlədən İsrail əhalisi üçün dəhşətli olacaq" - deyə norveçli diplomat bildirib.
Qeyd edək ki, Norveç Fələstinlilərə Yardım üzrə Beynəlxalq Donorlar Qrupunun sədridir və Fələstin administrasiyasının tərəfdarıdır.
İsrailə bu xəbərdarıq nə deməkdi? Başqa bir Qəzza deyəndə norveçli diplomat nəyi nəzərdə tutur?
"Norveçli diplomatın bu açıqlamasını həm də Şimali Avropanın bu məsələdə həm Həmasa, həm də İsrailə bir xəbərdarlığı kimi qəbul etmək olar"
Politoloq Tural İsmayılov "Bakı-Xəbər"ə şərhində "Norveçin son dövrlərdə Fələstin məsələsini qabartması Avropanın bir sıra ölkələrinin İsrailinin addımları ilə razılaşmadığını göstərir. Norveçin özəlliklə bu məsələdə tutduğu prinsipial mövqe insan hüquqları baxımından izahla sərhədlənir. Amma məncə, burada söhbət təkcə insan hüquqları məsələsindən getmir, bir sıra məsələrdə Avropa İttifaqı ilə İsrail ortaq nöqtəyə gələ bilmir. Məhz bu anlaşılmazlıqlar fonunda da hesab eidrəm ki, Qəzza faktorundan, Fələstin məsələsindən İsrailə münasibətlərdə Avropa həm də təzyiq vasitəsi kimi istifadə etməyi nəzərdə turur. Əlbəttə, norveçli diplomatın "başqa bir Qəzza" deməsi Norveçin məqsədini ortaya qoyur, Avropa İttifaqının üzvü olan bəzi ölkələrin, xüsusən də Norveçin dəstəklədiyi yeni bir idarəetmə modelindən söhbət gedir" - deyə bildirdi.
T.İsmayılovun sözlərinə görə, əslində Avropa Həmas məsələsində razılaşmasa da, Qəzza bölgəsində Həmasın yerinə alternativ yeni bir idarəetmə modeli təqdim etmək istəyir: "Qəzza bölgəsindəki yeni bir Fələstin idarəetmə modeli yaradıla bilər. Əslində, Norveçli diplomatın bu açıqlamasını həm də Şimali Avropanın bu məsələdə həm Həmasa, həm də İsrailə bir xəbərdarlığı kimi qəbul etmək olar. Belə hesab edirəm ki, Avropa İttifaqının bəzi ölkələri tərəfindən bağlı qapılar arxasında Qəzzada yeni bir idarəetmə modelinin, ya da yeni idarəetmə modelini dəstəkləyən hansısa bir hökumət strukturunun yaradılmasına çalışılır və bəri başdan da həm Həmasa, həm İsrailə xəbərdarlıq edilir ki, bu prosesin arxasında Qərb, konkret olaraq isə Şimali Avropa və Norveç dayanır".
İradə SARIYEVA
