O`Braynın gəlişi və Paşinyanın sülh bəyanatı - Naxçıvana hücum təsadüf deyil...
Emin Həsənli: "Paşinyanın verdiyi bəyanatla Naxçıvan istiqamətində üç rayonumuzun atəşə tutulması ziddiyyət təşkil edir"
Son günlər Ermənistan silahlı qüvvələrinin bölmələri Azərbaycan Ordusunun Naxçıvan Muxtar Respublikasının Şərur rayonunun Havuş, Ordubad rayonunun Nürgüt, Şahbuz rayonunun Güney Qışlaq yaşayış məntəqələri istiqamətlərində yerləşən mövqelərini bir neçə dəfə atıcı silahlardan atəşə tutub. Bu barədə Müdafiə Nazirliyi məlumat yayıb.
Ordumuzun bölmələri tərəfindən qeyd olunan istiqamətlərdə cavab tədbirləri görülüb.
Çox maraqlıdır ki, yüksək ABŞ rəsmisi O`Braynın səfərindən sonra Ermənistanın davranışlarında ciddi dəyişiklik müşahidə olunur. Bunu müxtəlif mövzularla bağlı səsləndirilən bəyanatlardan və atılan addımlardan da görmək olar. Məhz belə bir məqamda Ermənistanın Naxçıvanı atəşə tutması nədən xəbər verir? Xatırladaq ki, bu hadisə həm də Paşinyanın hökumətin iclasında Azərbaycanla sülh sazişini imzalamağa hazır olduğunu bəyan edəndən sonra baş verib. Bu, ordudakı revanşistlərin təxribatı ola bilərmi?
Hərbi-siyasi şərhçi Emin Həsənli "Bakı-Xəbər"ə açıqlamasında bildirdi ki, atəşkəsin pozulmasının bir neçə səbəbi ola bilər: "Bəzi dünya gücləri istəyir ki, bölgədə sabitlik olmasın. Müharibə olanda onlar siıah satır, münaqişə olan ölkələri asan idarə edə bilirlər. Belə ölkələrdə sülh əldə etmək üçün danışıqlar imitasiyası edirlər. Onlar istəmir ki, dünyada tam əminamanlıq olsun. Paşinyanın özü də bu işdə maraqlı ola bilər. Həm keşişin, həm də Sarkisyan və Köçəryanın rəhbərliyi ilə dalbadal etiraz aksiyaları keçirildi. Ermənistan cəmiyyəti müharibədən çox qorxur. Azərbaycan ordusunun gücünü bildikləri üçün Azərbaycan əhalisini müharibə ilə qorxudur ki, bunun qarşısını mən alıram kimi fikir formalaşdırsın. Onlar yaxşı başa düşür ki, ard-arda atəşkəs pozulsa, Azərbaycan dövləti Ermənistanı cəzalandıracaq. Cəmiyyəti təhdid etmək üçün bu vasitələrdən istifadə edirlər".
Hərbi şərhçi hesab edir ki, əgər bu təxribatdırsa, onu təşkil edənlərin Ermənistan dövləti tərəfindən cəzalandırılması vacibdir: "Azərbaycan və Ermənistan bu cür təxribatlar baş verəndə hər iki tərəfin araşdırma aparması barədə razılıq əldə etmişdi. Talış istiqamətində erməni silahlı birləşmələri atəş açıb bir nəfəri yaralamışdı. Azərbaycan bununla bağlı Ermənistana xəbərdarlıq etdi. Araşdırma apardılar və günahkarı tapıb cəzalandırdılar.
Mənə elə gəlir ki, Naxçıvan istiqamətində baş verən təxribata görə erməni tərəfindən tələb etmək lazımdır ki, araşdırma aparsınlar. Çünki Paşinyanın kommunikasiyaların açılması və sülh sazişinin yaxın bir aya imzalanması ilə bağlı verdiyi bəyanatla Naxçıvan istiqamətində üç rayonumuzun atəşə tutulması ziddiyyət təşkil edir".
Naxçıvan ərazisi uzun fasilədən sonra təzədən Ermənistan tərəfdən atəşə tutulub – özü də amerikalı yüksək postlu şəxsin qonşu ölkədə olduğu vaxt. Təsadüfmü? Məqsəd Ermənistan ordusunu növbəti təxribatlara hazırlamaqdır. İrəvan bununla gərginlik görüntüsü yaradıb Azərbaycanı beynəlxalq aləmdə çətin vəziyyətə salmaq məqsədi güdür. Yeni eskalasiya, toqquşma yaratmaqla AB və ABŞ-dan hərbi-siyasi dəstək almaq və ölkəmizə qarşı istifadə etmək istəyir.
Məhəmmədəli QƏRİBLİ
