Ermənistandan Rusiyaya yüksək tonda mesaj - “bizi hədələməyin, yetər!”...
Ceyhun Məmmədov: “Bu gərginlik bölgəmizə yaxşı heçnə vəd etmir”
Ermənistan parlament spikeri Alen Simonyan Moskvadan səslənən növbəti bəyanatı “cəfəng” adlandırıb. Rusiya bundan əvvəl bəyan etmişdi ki, əgər Ermənistan təhlükəsizliklə bağlı həssas informasiyanı Qərb ölkələrinə açsa, bu onun Rusiya ilə münasibətlərinə nəticəsi düzəlməyən zərbə vura bilər:
“Birincisi bizi hədələməyi dayandırsınlar. Bəsdir bizi qorxutdular. İkincisi bəsdir KTMT barədə danışdılar. Onlar hər dəfə KTMT-dən danışanda, bura gəlib KTMT-nin sərhədinin haradan keçdiyini göstərsinlər. KTMT partnyoru və Ermənistan-Rusiya müqaviləsinin tərəfi kimi öhdəliklərinin nə olduğunu desinlər. Amma bizim suveren ərazimiz haqqında bəyanatlar verdikləri yetər”.
Maraqlıdır, iki ölkə arasında bu gərginlik Ermənistan üçün nə vəd edir? Nəzərə almaq lazımdır ki, Rusiya Ermənistan üçün sıradan bir ölkə deyil.
“Məsələ ondadır ki, Ermənistan hakimiyyəti Qərbə arxalanaraq Rusiyaya qarşı belə sərt mövqe ortaya qoyur”
Sözügedən məsələni “Bakı-Xəbər”ə şərh edən millət vəkili Ceyhun Məmmədovun fikrincə, təəssüf ki, biz proseslərin yaxşı istiqamətdə getdiyini görmürük: “Ermənistanla Rusiya arasında münasibətlərin gərginləşməsi fonunda, Azərbaycan-Rusiya münasibətləri sürətlə inkişaf edir. Digər tərəfdən isə, bu gərginlik bölgəmizə yaxşı heçnə vəd etmir. Ona görə ki, Rusiyanın Ermənistana təsir rıçaqları çoxşaxəlidir. Hətta Rusiya Ermənistana hərbi güc də tətbiq edə bilər. KTMT ilə bağlı olan məsələ, elə məsələdir ki, o, uzun müddətdir müzakirə olunur. Bu məsələdə hər iki tərəf müxtəlif arqumentlərlə çıxış edir. Bu da tərəflər arasında olan gərginliyin daha da artmasına ciddi təkan verir. Hesab edirəm ki, bu, Ermənistan üçün yaxşı nəticələnməyəcək. Ona görə ki, Ermənistan həm kiçik ölkədir, həm də Rusiyadan asılılığı böyükdür. Ona görə də bu qarşıdurma Ermənistan üçün ağır nəticələr doğura bilər. Təbii ki, qarşıdurma belə davam edərsə. Məsələ ondadır ki, Ermənistan hakimiyyəti Qərbə arxalanaraq Rusiyaya qarşı belə sərt mövqe ortaya qoyur. Yoxsa onlar buna cəsarət etməzdilər. Ancaq Ermənistanın coğrafi mövqeyini, açıq dənizlərə çıxışının olmamasını nəzərə alsaq, bu, onlar üçün yaxşı nəticələnməyə bilər. Nəzərə almaq lazımdır ki, Qərbdən fərqli olaraq Rusiya regiondadır. Bu baxımdan hesab edirəm ki, Ermənistan daha çox münasibətlərin normallaşmasına çalışmalıdır, nəinki gərginləşməsinə. Ona görə ki, mövcud reallıqlar fərqlidir”.
Vidadi ORDAHALLI
