İlham Əliyev Misirdə çox önəmli “Fələstin bəyanatları” verdi...
Məhərrəm Zülfüqarlı: "Ölkəmizin dövlətçilik mövqeyi müstəqil Fələstin dövlətinin yaradılmasını dəstəkləyir"
Prezident İlham Əliyev Qahirədə Misir prezidenti Əbdülfəttah əs-Sisi mətbuata bəyanatnda Fələstinlə bağlı çox önəmli məqamlara toxunub.
Ölkə başçısı qeyd edib ki, müstəqil Fələstin qurulmalıdır: "Fələstin-İsrail münasibətlərinin tənzimlənməsi və müstəqil Fələstin Dövlətinin yaradılması bizim Qoşulmama Hərəkatına sədrliyimiz dövründə hər zaman diqqət mərkəzində idi, bir çox tədbirlər keçirilmişdir və Azərbaycanın mövqeyi birmənalıdır - müstəqil Fələstin Dövləti qurulmalıdır, Şərqi Qüds onun paytaxtı olmalıdır. Bu gün Qəzzada yaşanan faciə tezliklə dayandırılmalıdır, müharibə dayandırılmalıdır və bütün məsələlər danışıqlar yolu ilə həll olunmalıdır. Mən Prezident əs-Sisiyə bildirdim ki, biz Misirin bu istiqamətlərdəki səylərini dəstəkləyirik və Misir tərəfindən irəli sürülmüş təşəbbüslər diqqətə alınmalıdır".
"Bu, Azərbaycan dövlətçiliyinin nüfuzunun artdığını və ölkəmizin gücünü göstərir"
Sözügedən məsələni "Bakı-Xəbər"ə şərh edən AVCİYA-nın vitse-prezidenti, professor Məhərrəm Zülfüqarlının fikrincə, Prezident Əliyevin Misirə səfəri, orada keçirdiyi görüşlər mühüm əhəmiyyət kəsb edir: "Bu, bir daha Azərbaycanın müstəqil siyasət yeritdiyini, güclü bir dövlət olduğunu sübut edir. O cümlədən, verdiyi bəyanatlar da bunu bir daha sübut edir. Bununla belə, görüşdə müxtəlif məsələlər müzakirə edildi. O cümlədən, Fələstin dövlətinin yaradılması ilə bağlı mövqe sərgiləndi. O da məlumdur ki, Azərbaycan İsraillə çox yaxın münasibətlərə malik ölkədir. 44 günlük müharibədə İsrailin verdiyi dəstək iki ölkə münasibətlərinin daha da inkişafına səbəb olub. Ancaq buna baxmayaraq, Prezident Əliyevin Fələstinlə bağlı verdiyi bəyanat bir daha onu göstərir ki, Azərbaycan müstəqil siyasət yeridən çox az sayda dövlətlərdən biridir. Yəni biz bilirik ki, bu mövqe, İsrailin mövqeyi ilə uyğun deyil, amma Azərbaycanın mövqeyinə uyğundur. Çünki Azərbaycan Qoşulmama Hərəkatının liderlərindən biridir. Son 4 ildə bu hərəkata rəhbərlik edib. QH-də əksər dövlətlər, xüsusən də müsəlman dövlətləri Fələstin dövlətinin yaradılmasını dəstəkləyib. Azərbaycan da QH-nin üzvü kimi buna dəstək verir. Baxmayaraq ki, İsraillə də münasibətlərimiz çox yüksək səviyyədədir. Hesab edirəm ki, bu, Azərbaycan dövlətçiliyinin nüfuzunun artdığını və ölkəmizin gücünü göstərir. Çünki heç də bütün ölkələr belə müstəqil və rassional siyasət yeridə bilmirlər. Azərbaycan uzun illərdir birtərəfli yox, balanslı siyasət yeridir. Həm Qərb, həm Rusiya, həm də İranla münasibətləri normallaşdırmışdı. İndi isə Azərbaycan biləvasitə öz müstəqil siyasətini davam etdirir. Baxmayaraq ki, biz İsraillə çox sıx əməkdaşlıq edirik, münasibətlərimiz çox normaldır. Ancaq buna baxmayaraq, Azərbaycanın dövlətçilik mövqeyi müstəqil Fələstin dövlətinin yaradılmasını dəstəkləyir. Azərbaycan rəsmi bəyanatla bir daha bunu göstərdi. Fikrimcə, İsrail bunu anlayışla qarşılayacaq".
Vidadi ORDAHALLI
