Ermənilər 2 əsas nazirliyin xəttilə Rusiyadan xeyli uzaqlaşdılar...
Arzuxan Əlizadə: “Bu, iki ölkə arasında münasibətlərdə ciddi problemlərin olmasından xəbər verir”
“Ermənistan xarici işlər və müdafiə nazirlikləri xətti ilə Rusiya ilə təmaslara maraq göstərmir. Bu da Qərbin təzyiqinin nəticəsidir”. Bunu TASS-a müsahibəsində Rusiya xarici işlər nazirinin müavini Mixail Qaluzin bildirib.
“2023-cü ilin noyabrından bəri xarici işlər nazirlərinin görüşü olmayıb. Xarici işlər nazirlikləri arasında məsləhətləşmələr üçün başqa planın işlənib hazırlanması və yekunlaşdırılması təklifimizə tərəfdaşlar maraq göstərmədilər. Müdafiə nazirlikləri arasında əlaqələrin dinamikasının nəzərəçarpacaq dərəcədə azalması bizim günahımız deyil. Hərbi-texniki əməkdaşlıq da geriləyib. Biz bunu İrəvanın ölkəmizlə əlaqələri minimuma endirməyə məcbur etməyə çalışan qərbçilərin təzyiqinin nəticəsi kimi görürük”, - nazir müavini qeyd edib.
Bununla belə, Qaluzin ümidvar olduğunu bildirib ki, Ermənistan hakimiyyəti problemli məqamların aradan qaldırılması istiqamətində işləmək barədə açıq səsləndirdiyi niyyətini əməldə sübut edəcək: “Biz buna hazırıq”.
“Qərbin himayəsi olmadan Ermənistan Rusiya ilə təmasları bu dərəcədə azalda bilməzdi”
Sözügedən məsələni “Bakı-Xəbər”ə şərh edən AMİP sədri Arzuxan Əlizadə hesab edir ki, bütün bunlar iki ölkə arasında münasibətlərdə ciddi problemlərin olmasından xəbər verir: “Nəzərə almaq lazımdır ki, XİN ölkənin ən vacib qurumlarından biridir. Hansısa ölkə ilə münasibətlər ən kritik səviyyədə olanda belə, XİN səviyyəsində müəyyən kanallar çərçivəsində təmaslar olur. Ancaq görün tərəflər arasında necə sərin münasibətlər var ki, ötən ilin noyabrından bəri xarici işlər nazirlərinin görüşü keçirilmir. Nazirliklər arasında məsləhətləşmələr yox səviyyəsindədir. Özü də söhbət o ölkədən gedir ki, uzun illər Rusiyanın satelliti olub. Məhz Rusiyanın sayəsində Cənubi Qafqazda süni olaraq Ermənistan adında dövlət yaradılıb. Məsələnin təəccüb doğuran tərəfi həm də onunla əlaqədardır ki, Rusiyanın hərbi bazalarının olduğu, eyni hərbi ittifaqda olan ölkələrin müdafiə nazirlikləri arasında hərbi-texniki əməkdaşlıq zəifləyib. Təbii ki, Rusiya bunda maraqlı ola bilməz. Çünki Rusiya istəməz ki, Cənubi Qafqazda Ermənistan kimi forpostu, dayaq məntəqəsini itirsin. Ona görə ki, Rusiya uzun illər Ermənistandan bir maşa kimi istifadə edir. Belə məlum olur ki, artıq bu alınmır. Ona görə ki, Ermənistan artıq Rusiyanı Qərbə satıb. Ermənistanla Qərb arasında təmaslar artıb. Qərbin himayəsi olmadan Ermənistan Rusiya ilə təmasları bu dərəcədə azalda bilməzdi. Bu bir reallıqdır. Ermənistanla Rusiya arasında münasibətlərin gərgin olması Azərbaycanın maraqlarına uyğundur. Biz bundan maksimim istifadə etməliyik. Necə ki, edirik. Ona görə ki, belə fürsət hər zaman olmayacaq”.
Vidadi ORDAHALLI
