Azərbaycan Kazanda BRİKS oyunlarında iştirak edəcəkmi? - Ermənistanın mövqeyi məlum deyil...
“100-dən çox ölkənin bu oyunlarda iştirak etmək istədiyi ilə bağlı məlumat sadəcə blefdir”
Dünyanın yüzə yaxın ölkəsi BRİKS 2024 Oyunlarında iştirak etmək qərarını təsdiqləyib. Rusiya mətbuatının yazdığına görə, 2024-cü il iyunun 11-dən 24-dək BRİKS İdman Oyunları 2024 Rusiya Federasiyasının Kazan şəhərində keçiriləcək.
Hazırda dünyanın 97 ölkəsi bu idman tədbirində iştirak etmək arzusunu təsdiqləyib. Məlumata görə, Oyunlar Rusiya prezidenti Vladimir Putinin himayəsi altında keçiriləcək. Tədbirin təşkilatçıları BRİKS assosiasiyasına daxil olan ölkələrdir (Braziliya-Rusiya-Hindistan-Çin-Cənubi Afrika - assosiasiyanın təsisçiləri; ona həmçinin BƏƏ, İran, Misir və Efiopiya daxildir). Bununla belə, Oyunların potensial iştirakçılarının sayını nəzərə alsaq, onların miqyasının müəyyən edilmiş assosiasiyadan xeyli kənara çıxdığı göz qabağındadır.
Rusiya mediasında qeyd edilir ki, dünyanın 100-ə yaxın ölkəsinin BRİKS 2024 Oyunlarında iştirak etmək qərarına gəlməsi faktı “kollektiv Qərb”in “qlobal Cənub” ölkələrinə təsir etmək cəhdlərində növbəti uğursuzluğundan xəbər verir. “Əslində, mövcud suveren dövlətlərin yarısı, Qərb ölkələrinin buna mənfi münasibət göstərməsinə baxmayaraq, artıq BRİKS ölkələri ilə əməkdaşlığa diqqət yetirməyə hazırdır. Digər diqqətçəkən nüans ondan ibarətdir ki, dünyanın 97 ölkəsi təkcə BRİKS Oyunlarında deyil, Rusiya Federasiyası ərazisində - Kazanda keçiriləcək tədbirdə iştirak etməyə razılıq verib. Bu, “kollektiv Qərb” ölkələri və onların peyklərinin açıq şəkildə Kiyev rejiminin tərəfini tutduqları və ölkəmizə qlobal boykot təşkil etməyə çalışdıqları Ukrayna münaqişəsi zamanı baş verir. Gördüyümüz kimi, Qərbin təbliğ etməyə çalışdığı Rusiyaya qarşı bu “qlobal boykot” strategiyası tamamilə iflasa uğradı”. Bu barədə rus mediası yazıb.
Azərbaycan Kazanda keçiriləcək BRİKS oyunlarında iştirak edəcək, ya yox? Etsə nə baş verər?
Bu ölkələrin, yəni deyildiyi kimi 100 ölkənin siyahısı açıqlanmayıb. Bilmirik ki, orada kim var, kim yoxdu. Məsələn, Ermənistanın da iştirakı hələ məlum deyil.
“Azərbaycan Kazan oyunlarında iştirakla bağlı qərar verərsə, ora gənclər göndəriləcək”
Tanınmış idman mütəxəssisi Natiq Muxtarlı “Bakı-Xəbər”ə şərhində “Rusiyanın Kazanda keçirəcəyi BRİKS oyunları sözün əsl mənasında “oyundur”. Siyasi oyun. Bu birmənalıdır. Dünya idmanından tam təcrid olunan Rusiya bununla Qərbə cavab vermək istəyir. Sözsüz, Rusiya bu oyunların təşkili zamanı siyasi təzyiqlərdən də yararlanacaq. Amma 100-dən çox ölkənin bu oyunlarda iştirak etmək istədiyi ilə bağlı məlumat sadəcə blefdir. İndi dünyanın bütün diqqəti Parisdə keçiriləcək Olimpiadaya yönəlib. Adlı-sanlı idmançılar yalnız bu yarış haqda düşünür, dördilliyin ən böyük turnirinə hazırlaşırlar. O cümlədən, BRİKS üzvü olan ölkələrin idmançıları da. Bəs onda Kazana kimlər göndərilə bilər? Böyük ehtimalla, həmin ölkələr Rusiyaya əsasən gəncləri göndərəcəklər. Yəni bir növ, Rusiyanın bu “oyun”undan elə candərdi “oyun”la qurtulmağa çalışacaqlar. Orada ancaq Rusiya və Belarus idmançıları tam tərkibdə təmsil olunacaqlar. Zatən bu iki ölkənin idmançılarının beynəlxalq arenalara çıxışı onsuz da bağlıdır. Ona görə də, Kazan turniri onlar üçün fürsətdir. Azərbaycan idmançılarının bu “siyasi oyun”da iştirakı da siyasi qərardan asılı olacaq. Amma bütün hallarda peşəkarların Rusiyaya göndəriləcəyini güman etmirəm. Azərbaycan Kazan oyunlarında iştirakla bağlı qərar verərsə, ora gənclər göndəriləcək”-deyə bildirdi.
N.Muxtarlının sözlərinə görə, bir ehtimalı da mütləq nəzərə almaq lazımdır ki, Qərb də siyasi oyundan geri çəkilməyəcək. “Sabah Qərbin nəzarəti altında olan beynəlxalq idman təşkilatları Kazan turnirində iştirak edəcək idmançılara qarşı sanksiyalar da tətbiq edə bilər. Tam ehtiyatlı olmaq lazımdır. Rusiya və Belarus idmançıları onsuz da sanksiyaya məruz qalıblar. İndi “cəhənnəmə gedənlər” özlərinə yoldaş axtarır. Niyə Azərbaycan idmançıları onlara “yoldaş” olmalıdır? Ona görə də, bu məsələ ilə bağlı qərar verilərkən bütün ehtimallar nəzərə alınmalıdır”-deyə N.Muxtarlı bildirdi.
İradə SARIYEVA
