Paşinyanın deputatları kilsənin saysız əmlaklarını araşdırır...
Azər Həsrət: “Erməni kilsəsi həqiqətən də bu millətin başına bir bəladır”
Ermənistanda hakim “Vətəndaş müqaviləsi” partiyasının deputatları kilsə əmlakının vergiyə cəlb edilməsi ilə bağlı qanun layihəsi hazırlayırlar. Bu barədə hakim partiyanın deputatı Tsovinar Vardanyan məlumat yayıb.
Onun sözlərinə görə, hələ hazır sənədlər yoxdur, lakin bu istiqamətdə iş artıq aparılır: “Kilsə vergi ödəyicisidir, lakin söhbətin nədən getdiyini anlamaq lazımdır. Ola bilsin kilsə işçiləri gəlir vergisi ödəyirlər, bu, yaxşıdır. Amma deputatlar indi kilsənin idarə etdiyi minlərlə əmlakı araşdırırlar”.
Belə görünür ki, qanunla mərhələli şəkildə kilsənin əvvəlki hegemonluğuna son qoyulacaq. Maraqlıdır, Paşinyan hakimiyyətinin bu yöndə addımları nə kimi effekt verə bilər?
Sözügedən məsələni baki-xeber.com-a şərh edən siyasi şərhçi Azər Həsrət buna bir neçə prizmadan yanaşdı: “Kilsə min ildən çoxdur ki, erməni xalqının bütün faciələrinin səbəbkarı kimi öndə gedir. Yəni erməni kilsəsi həqiqətən də bu millətin başına bir bəladır. Erməni millətinin arasından normal, ağlı başında olan adamlar çıxıb. Ancaq onlar nəsə yaxşı bir iş görmək istəyəndə də kilsə onlara mane olur. İndinin özündə də görürük ki, Ermənistan Azərbaycanla normal münasibətlər qurmaq üçün çalışır. Sülh müqaviləsinə doğru addım-addım gedirik. Ancaq bu yerdə də yenə əl-ayağa dolaşan kilsədir. Təbiidir ki, kilsənin belə davranması səbəbsiz deyil. Çünki erməni kilsəsinin başında bir qayda olaraq cinayətkarlar və cinayət şəbəkəsi durur. Bu şəbəkə həm ölkə içində, həm ölkə xaricində erməni xalqını öz çirkin məqsədləri üçün istismar edir. Hazırda Ermənistanda “xalq etirazları”na başçılıq edən keşiş Baqrat Qalstanyan da o qəbildəndir. Adam bir tərəfdən Kanada vətəndaşıdır. İkinci bir tərəfdən onun çirkin işlərə bulaşması barədə məlumatlar yayımlanır. Belə bir şəraitdə adam durub iddia edir ki, guya erməni xalqının mənafeyini düşünür. Göründüyü kimi, bircə örnək onu göstərir ki, kilsə həqiqətən də baş ağrısından başqa bir şey deyil. Kilsə orada bir cinayət şəbəkəsidir. Ona görə də Paşinyan düşünür ki, erməniləri normal millət kimi ağ günə çıxarmağın yolu həm də kilsə ilə bağlı məsələlərə yenidən baxmaqdan keçir. Məsələ ondadır ki, kilsə böyük maliyyə resurslarına malikdir. Həmin vəsaitlərlə bağlı isə şəffaflıq ümumiyyətlə yoxdur. Ona görə də kilsə bundan müxtəlif çirkin siyasi məqsədlər üçün istifadə edir. Ermənistanda keçirilən məlum kütləvi aksiyalar da kilsə fitnəkarlığının nəticəsidir. Bu səbəbdən hakimiyyət kilsənin bütün əmlakını qeydə almaq və vergiyə cəlb etmək yolunu tutub”.
Vidadi ORDAHALLI
