“Şil-küt" edilmiş prezident Azərbaycanla açıq müharibə çağırışlarına başladı...
İbrahim Rüstəmli: "Sarkisyan yalnız ölsə haqq məhkəməsindən canını qurtara bilər"
Ermənistanın 3-cü prezidenti, Xocalı qatili Serj Sərkisyan xalqı müharibəyə səsləyib. Bu barədə onun 28 May - Müstəqillik Günü ilə bağlı yazılı müraciətində əks olunub.
Sarkisyan bildirib ki, "106 il əvvəl olduğu kimi", bu gün də milli şüur, tarixi məsuliyyət və fədakar şücaət dövrüdür.
O, "erməni xalqının sədaqətli övladlarının" 1918-ci ilin "may döyüşlərində" qəhrəmanlıqla vuruşaraq müstəqillik əldə etdiklərini bildirib:
"Dünən də, bu gün də türk zülmü altında təslim olmağa, alçaldıcı şərtlərlə sülh dilənməyə, acınacaqlı bir mövcudluğa çağıranlar bütöv milli hüquq, mənafe və təhlükələri dərk etməyə, reallığın gözünə baxmağa və hərəkət etməyə cəsarət etməmişlər və etmirlər.
Tarix şahiddir: zəfər layiq olanlara verilir və bu gün, may qəhrəmanlıq döyüşlərindən bir əsrdən artıq vaxt keçdikdən sonra hər birimizin seçimi qələbəyə layiq olmaq və ya lənətə gəlməkdir.
Əminəm ki, dövlət və kilsə öz missiyasına sadiq qalacaq və bu taleyüklü günlərdə Sərdarabadın rəmzi zəngləri həqiqətin və ləyaqətin qələbəsinin əlaməti olaraq çalınacaq".
Sarkisyanın bu tipli çağrışından hansı qənaətə gəlmək olar?
Hərbi-siyasi şərhçi, ehtiyatda olan polkovnik-leytenant İbrahim Rüstəmli "Bakı-Xəbər"ə açıqlamasında bildirdi ki, Sarkisyan Azərbaycan insanına çox tanış uşaq qatilidir: "Biri var qatil, biri də var uşaq qatili. Azərbaycan onu çox yaxşı tanıyır. Xocalı qətliamının törədilməsində xüsusi fəaliyyəti olub. Qarabağdan tutmuş bütün siyasi fəaliyyəti dövründə öz şəxsi ambisiyalarından məharətlə istifadə etməyi bacarıb. Azərbaycanla, Türkiyə ilə dostluq münasibəti qurmaq istəyən sadə erməni xalqının qanını axıdan, erməni xalqını daim təhdid altında saxlyan bir prezident olub. Bilirsiz ki, 44 günlük vətən müharibəsindən sonra Qarabağ məsələsi ilə bağlı Azərbaycanın qarşısında duran ən böyük məqsəd Azərbaycan insanını qətlə yetirən, Xocalıda, Çaylıda, Ağdabanda, Meşəlidə soyqırım törədən qatillərin tutulması idi. Azərbaycan artıq ərazi bütövlüyünü təmin edib. Hazırda tarixi torpağımız olan Zəngəzurla bağlı çox ciddi mübarizə aparır. İndi isə bizim qarşımızda dayanan ən böyük vəzifələrdən biri Sarkisyan və Köçəryan kimi qatillərin ikisini də qolları qandallı Azərbaycana gətirmək, onları cinayət məsuliyyətinə cəlb etməkdir. Bu vəziyyətdə Sarkisyanın hansı həyəcanla vurnuxduğunu aydın görmək olar. O, artıq çox ciddi bir təhlükə ilə üz - üzə qaldığını, haqqın qələbəsini görür. Haqqın qələbəsi isə Serj Sarkisyan kimi əli uşaq qanına batmış qatillərin cinayət məsulliyətinə cəlb olunması deməkdir. Ona görə də aranı daha çox qarışdırmağa, erməni xalqının adından populist çağırışlar etməyə başlayıb. O bilir ki, Azərbaycanın müzəffər Ali Baş komandanı, böyük rəhbəri İlham Əliyev onu dizin-dizin sürüyərək gətirəcək və haqq məhkəməsində ittiham edəcək. Belə bir vəziyyətdə Sarkisyan suyu bulandırmaqla özünü arxa plana çıxarmağa çalışır. Ancaq o bu məqsədinə heç vaxt çata bilməyəcək. Erməni xalqı da onların bu hiyləgərliyini aydın başa düşür. Eyni zamanda bir vacib məqamı da xüsusilə vurğulamaq istəyirəm ki, tarixin təkərini hərəkətə gətirmək çox çətindir, onu dayandırmaq ondan da çətindir. Bu gün artıq Azərbaycan öz haqq mübarizəsində inamlı addımlar atmaqla, qələbələr qazanmaqla beynəlxalaq hüquq normalarına uyğun öz sözünü deyir. Belə bir vəziyyətdə Sarkisyanın xalqa müraciəti də anlaşılandır. Onun hazırda vəziyyəti gərgindir. Azərbaycan onu haqq məhkəməsinə gətirib çıxaracaq. Onun başqa çıxış yolu yoxdur. O gizlənə bilməyəcək. Ona görə də mümkün qədər vaxtı uzatmağa çalışır. Sarkisyan yalnız ölsə haqq məhkəməsindən canını qurtara bilər. Başqa cür mümkün deyil".
Məhəmmədəli QƏRİBLİ
