ABŞ bilmir ki, birbaşa danışıqlardan yayınan Ermənistandır?!.
Bəhruz Quliyev: "Bu gün rəsmi İrəvan birbaşa danışıqlar masasından qaçır"
ABŞ Dövlət Departamentinin sözçüsü Metyu Miller bəyan edib ki, Ermənistan və Azərbaycanın birbaşa regionun xeyrinə olan problemləri müzakirə edərək həll etməsi vacibdir:
"ABŞ Dövlət Departamenti hesab edir ki, hər iki ölkənin davamlı razılaşma əldə etməsi üçün birbaşa danışıqlar aparması vacibdir. Biz razılaşmanın əldə olunması üçün hər iki ölkənin rəhbərliyini cəlb etməyə davam edirik və bölgədə qalıcı, davamlı sülhə kömək etməyi təklif edirik. Biz digər ölkələrin bu danışıqları asanlaşdırmaq üçün təkliflərini görürük. Hesab edirik ki, iki ölkənin davamlı razılaşma əldə etmək üçün üz-üzə danışması vacibdir".
Bu nə riyakarlıqdır, məgər ABŞ bilmir ki, birbaşa danışıqlardan yayınan Ermənistandır? Prezident İlham Əliyevin Tbilisidə danışıqlar aparılması təklifinə Ermənistan hələ də reaksiya verməyib. Çünki birbaşa təmaslarda maraqlı deyil. Vaşinqton isə tərəflərə ümumi çağrışlar edir.
"ABŞ Dövlət Departamenti Azərbaycana yox, Ermənistana təzyiq etməlidir"
Sözügedən məsələni "Bakı-Xəbər"ə şərh edən "SƏS" Media Qrupunun rəhbəri, politoloq Bəhruz Quliyev hesab edir ki, ABŞ-ın Ermənistanın danışıqları pozmasını görməzdən gəlməsi qəbuledilməzdir: "Son zamanlar Amerika Birləşmiş Ştatlarında fəaliyyət göstərən beynəlxalq təşkilatlar Azərbaycana qarşı aqressiv hərəkətləri ilə seçilirlər. Biz bu kimi halları zaman-zaman da görmüşük. Hesab edirəm ki, bu da ABŞ-la Azərbaycan arasında olan münasibətlərin zəifləməsinə gətirib çıxarır. Sözsüz ki, ABŞ Cənubi Qafqazda maraqlıdır və buradakı hadisələrin mərkəzində olmaq istəyir. Çalışır ki, Azərbaycan-la Ermənistan arasında olan danışıqlar prosesində vasitəçi qismində iştirak etsin. Təbii ki, bu da Ermənistanın Rusiyanın əlindən çıxmasına yönəlib. Ermənistan indiyədək Rusiyanın forpostu idi və Qafqazda söz sahibi rəsmi Moskva idi. Ermənistan artıq Rusiyanın forpostluğundan çıxaraq Qərbə yönəlmişdir. Bu hal bir tərəfdən Rusiyanı qıcıqlandırır, digər tərəfdən isə danışıqlar prosesindən Rusiyanın kənarlaşması və Qərbin, ABŞ-ın fəallaşmasıdır. ABŞ Dövlət Departamentinin sözçüsü Metyu Miller ona görə bəyan edib ki, Ermənistan və Azərbaycanın birbaşa regionun xeyrinə olan problemləri müzakirə edərək həll etməsi vacibdir. Ümumiyyətlə, Azərbaycan və Ermənistan arasında bəzi məsələlər (sərhədlərin delimitasiyası, demarkasiyası və s.) hələ də qalmaqdadır. Biz hazırda bu məsələlərin üzərində çalışırıq. Prezident cənab İlham Əliyev də dəfələrlə danışıqlara hazır olduğunu və bu yöndə də addım atdığını göstərib. Təbii ki, danışıqlar prosesinə mane olan tərəf hər zaman Ermənistan olub və daimi olaraq da problemlərlə qarşılaşıb. Hesab edirəm ki, ABŞ Dövlət Departamenti Azərbaycana yox, əksinə, Ermənistan tərəfinə tövsiyə xarakterli çağırışlar etməlidir. Bu gün rəsmi İrəvan birbaşa danışıqlar masasından qaçır. ABŞ Dövlət Departamenti Azərbaycana yox, Ermənistana təzyiq etməlidir. ABŞ Azərbaycanla yalnız siyasi, diplomatik, iqtisadi münasibətlərin inkişafı, tənzmimlənməsi üçün müsbət addımlar atmalıdır. Əks təqdirdə Cənubi Qafqazda daha bir ölkəni itirə bilər".
Politoloq B.Quliyev onu da əlavə etdi ki, ABŞ 30 il ərzində ATƏT-in Minsk Qrupunun həmsədrlərindən biri olub və problemlərə də dərindən bələd idi: "Bu mənada hesab edirəm ki, ABŞ-ın Ermənistana olan münasibəti bəllidir və bu gün sülh danışıqları prosesində Ermənistan tərəfdən çıxış edir. 30 illik Minsk Qrupunun fəaliyyəti sıfır olduğu üçün Azərbaycan öz qərarını özü verdi və müharibə yolu ilə torpaqlarını işğaldan azad etdi".
Vidadi ORDAHALLI
