Tavuş kəndlərində daşı daş üstündə qoymurlar - ənənəvi erməni üslubu...
Mübariz Göyüşlü: “Ermənilər beynəlxalq aləmin diqqətini çəkmək üçün etdikləri bu vandalizm hərəkətləri ilə əslində özlərini ifşa edirlər”
Tavuş vilayətinin Kirants kənd sakinləri onlara məxsus binaları Azərbaycana buraxmamaq üçün sökür və yandırırlar. Bu barədə Ermənistan mətbuatı yazır, eyni zamanda da söküntü və yandırma prosesini əks etdirən foto və videolar paylaşır.
Qeyd olunur ki, Ermənistanın Tavuş rayonunun Kirants kəndində sakinlər Paşinyan hökuməti ilə Azərbaycan tərəfindən aparılan sərhəd delimitasiyasından sonra Azərbaycan tərəfinə keçəcəyi üçün sahib olduqları daşınmaz əmlakları sökürlər və yandırırlar.
Erməni mətbuatının özü açıq şəkildə olayı yayır. Bildiyimiz kimi, bu sırf erməni xarakterinə məxsus keyfiyyətlərdən biridir, onlar vaxtilə sahibləndikləri azərbaycanlılara məxsus evləri tərk edərkən onları sökür və od vurub yandırırlar. Adını da qoyurlar ki, əmlaklarına azərbaycanlılar sahiblənməsin. Guya bu əmlak onlara məxsus imiş.
“Yandırmaq, dağıtmaq, sökmək, məhv etmək dəyişməz erməni xarakteridir”
Müasir İnkişaf Birliyinin sədri, siyasi şərhçi Mübariz Göyüşlü “Bakı-Xəbər”ə bildirdi ki, bu ənənəvi erməni davranışıdır, biz bu zaman-zaman bunu görmüşük. “Biz bunu təkcə Tavuş vilayətində görmürük, bunu Laçında da, Kəlbəcərdə də müşahidə etdik. Üçtərəfli bəyanata uyğun olaraq onlar bizim ərazilərdən çıxıb gedəndə evləri söküb aparırdılar, apara bilmədiklərini isə od vurub yandırırdılar. Hətta unitazı belə aparırdılar. Bu da gülüş obyektinə çevrilirdi, istehza doğururdu. Bu həm də məğlubiyyətin, zəifliyin göstəricisidir. Bu gün o hərəkətləri Tasvuşda davam etdirirlər. Onların evləri sökməsi, yandırması ənənəvi erməni xarakterindən irəli gələn ziyanlı bir davranışdır.
Bunun da erməni mediasında yayılması onu göstərir ki, bu toplum heç zaman öz ziyanverici əməllərindən əl çəkmir. Ermənistan mediası özü ermənilərin Kirants kəndində insanların yaşadıqları evləri yandırdığını, söküb dağıtdığını, daşı daş üstə qoymadığını yazır, etiraf edir. Yandırmaq, dağıtmaq, sökmək, məhv etmək dəyişməz erməni xarakteridir”-deyə bildirən M.Göyüşlü qeyd etdi ki, onlar bununla azərbaycanlıların öz doğma kəndlərinə qayıdışının qarşısını ala bilməzlər. M.Göyüşlü eyni zamanda vurğuladı ki, ermənilər bunlarla bizim qarşıya qoyduğumuz hədəflərə çatmağımıza əngəl olmaq gücündə deyillər.
M.Göyüşlü hesab edir ki, bu cür addımlar əlacsızlıqdan atılır və heç bir nəticə verməyəcək. “Biz öz doğma kəndlərimizə qayıdacağıq və o kəndləri yenidən bərpa edəcəyik. Ermənilər beynəlxalq aləmin diqqətini çəkmək üçün etdikləri bu vandalizm hərəkətləri ilə əslində özlərini ifşa edirlər. Heç kəs bizim qayıdışımıza mane ola bilməz. O kəndlərimiz yenidən qurulacaq və onun əsl sahibləri orada öz həyatlarını davam etdirəcəklər, oranın dirçəldilməsində öz mühüm rollarını oynayacaqlar”-deyə M.Göyüşlü vurğuladı.
İradə SARIYEVA
